ထိုင်းနိုင်ငံ မြောက်ပိုင်း ချင်းမိုင်မြို့တွင် တရားမဝင် အလုပ်လုပ်ကိုင်နေသည့် မြန်မာနိုင်ငံသား ၃ ဦးနှင့်အတူ ထိုင်းအလုပ်ရှင်အား ဖမ်းဆီးရမိကြောင်း ချင်းမိုင်လူဝင်မှုကြီးကြပ်ရေးက သတင်းထုတ်ပြန်သည်။

ယမန်နေ့ (မတ်လ ၂၇ ရက်)တွင် ချင်းမိုင်ခရိုင် Fa Ham တွင် တရားမဝင် အလုပ်လုပ်ကိုင်နေသည့် မြန်မာနိုင်ငံသားများရှိနေကြောင်း သတင်းပို့ပေးချက် ရရှိသဖြင့် ချင်းမိုင်ခရိုင် လူဝင်မှုကြီးကြပ်ရေးနှင့်အဖွဲ့များက သွားရောက်စစ်ဆေးဖမ်းဆီးခဲ့ကြောင်း သိရသည်။

အဆိုပါ ဖမ်းဆီးမှုတွင် တရားမဝင် အလုပ်လုပ်ကိုင်နေသည့် မြန်မာနိုင်ငံသား အမျိုးသမီး ၃ ဦးနှင့် အသိပေးခြင်းမရှိဘဲ အလုပ်ခန့်ထားခြင်းကြောင့် ထိုင်းအလုပ်ရှင်အား ဖမ်းဆီးအရေးယူခဲ့ကြောင်း ထုတ်ပြန်ချပ်၌ ဖော်ပြသည်။

ဝန်ထမ်းအမျိုးသမီး ၃ ဦးသည် တရားဝင် အလုပ်လုပ်ကိုင်ခွင့် Work Permit လျှောက်ထားခြင်းမရှိဘဲ ဆိုင်တွင် ၅ လခန့် အလုပ်လုပ်ကိုင်နေသည်ဟု ထွက်ဆိုခဲ့ကြောင်း၊ ထိုကြောင့် ထိုင်းနိုင်ငံ၏ တရားဥပဒေနှင့်အညီ ဖမ်းဆီးအရေးယူသွားမည်ဖြစ်ကြောင်း ချင်းမိုင်လူဝင်မှုကြီးကြပ်ရေးက ဖော်ပြသည်။