သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသတွင် စက်သုံးဆီကို အကန့်အသတ်ဖြင့် ရောင်းချပေးနေသဖြင့် စက်လှေသမားများ အခက်ကြုံနေကြောင်း သတင်းရရှိသည်။

‌ညောင်ရွှေမြို့နယ် အင်းလေးဒေသတွင် ပြီးခဲ့သည့် ၂၀၂၄ အောက်တိုဘာလမှ စတင်ပြီး စက်သုံးဆီ ဒီဇယ်များကို အကန့်အသတ်ဖြင့်သာ ရောင်းချနေပြီး ကန့်သတ်မှုထက် ပိုသုံးလိုလျှင် ငွေပိုပေးရကြောင်း စက်လှေသမား တစ်ဦးက သျှမ်းသံတော်ဆင့်ကို ပြောသည်။

“စက်သုံးဆီတွေ ဝယ်ရတာလည်း အခက်အခဲဖြစ်တယ်။ တစ်ယောက်ကို ၂ သောင်းနဲ့ပဲ ရောင်းပေးတာ။ ၂ သောင်းကျော်သွားရင် ဒီဇယ်တစ်လီတာကို ၃ ထောင်ဝန်းကျင်နဲ့ ပြန်ရောင်းတာ။ တခါတလေ မရောင်းပေးရင်တော့ အပြင်မှာ တစ်ဂါလန် ၁သောင်းခွဲလောက်နဲ့ ဝယ်ရတာ။ စက်လှေသမားတွေအတွက် ဒီဇယ်ဝယ်ရတာ ခက်ခဲတယ်၊ တစ်ကြောင်းသွားရင် တခါတလေ ၂ သောင်း ကျပ်ဆို မလောက်ဘူးလေ”ဟု စက်လှေသမားတစ်ဦးက ပြောသည်။

ညောင်‌ရွှေမြို့နယ်တွင် စက်သုံးဆီ ဒီဇယ် တစ်လီတာလျှင် ၂၆၀၀ ကျပ်ခန့် ပေးဝယ်ရပြီး ပြင်ပတွင် ပြန်လည်ရောင်းချသည့် ဈေးနှုန်းသည် တစ်လီတာလျှင် ၃ ထောင်ကျပ်ထိ ပေးဝယ်နေရကြောင်း သိရသည်။

အင်းလေးဒေသသည် စက်လှေကိုသာ အသုံးပြုနေရသဖြင့် စက်သုံးဆီကို ကန့်သတ်ရောင်းချလျှင် ပြည်သူများ စားဝတ်နေရေး ပိုမိုကြပ်တည်းလာနိုင်ကြောင်း ဒေသခံများက ပြောသည်။

ထို့အပြင် ယခုနောက်ပိုင်း သဘာဝပတ်ဝန်းကျင် ပျက်စီးမှုသည် တစ်နှစ်ထက်တစ်နှစ် ပိုမိုဆိုးရွားလာသဖြင့် အင်းလေးဒေသသည် မိုးရာသီတွင် နေအိမ်ရေလွှမ်းမိုးမှု၊ ရေကြီးရေလျှံမှု ကြုံတွေ့ရပြီး၊ နွေရာသီတွင် ရေခမ်းခြောက်မှု ပြဿနာ ရင်ဆိုင်နေရကြောင်း အင်းလေးဒေသခံများက ပြောဆိုသည်။

ထိုအခက်အခဲများကြား ယခုနှစ်အတွင်း အင်းလေးဒေသတွင် ရေပေါ်သင်္ကြန်ပွဲတော်ကို စည်ကားသိုက်မြိုက်စွာ ကျင်းပသွားမည်ဟု စစ်ကောင်စီ၏ သျှမ်းပြည် ဟိုတယ်နှင့် ခရီးသွားညွှန်ကြားမှု ဦးစီးဌာမှ ပြီးခဲ့သည့် မတ်လ (၁၇)ရက်တွင် ထုတ်ပြန်ခဲ့သည်။