သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသတွင် ရေခမ်းခြောက်မှု ပိုမိုဆိုးရွာလာသောကြောင့် ဒေသခံများ သွားလာမှု ခက်ခဲဖြစ်နေကြကြောင်း စုံစမ်းသိရှိရသည်။

ယခင်က လှေဖြင့်သွားလာရသော အင်းလေးဒေသ ရွာမ ရွာနှင့် မင်းချောင်းရွာ တွင် ယခုလမှ စတင်၍ အပူချိန်မြင့်တက် လာသည်နှင့် အမျှ ရေများခမ်းခြောက်လာပြီး ကုန်းနေရွာသဖွယ် လမ်းများတွင် နှုန်းမြေများဖြင့် ပိတ်ဆို့နေမှုကြောင့် သွားလာရခက်ခဲ နေကြသည်ဟု ဒေသခံများထံမှ သိရသည်။

“ရွာမဘက်ဆို လုံးဝကို ခမ်းသွားတာ။ကုန်းနေရွာလိုမျိုး ဖြစ်သွားတာ။ ကျနော်တို့ မင်းချောင်းဘက်တော့ ရေစခမ်းနေပြီ။ ကုန်းမြေအထိတော့ မရောက်သေးဘူး။ ရွာမဖက်ဆို လှေနဲ့လည်း သွားမရ ၊ခြေကျင်လည်း သွားမရနဲ့ တော်တော် ဒုက္ခရောက်နေတာ။ သွားရလာရအဆင်မပြေနေဘူး။” ဟု ဒေသခံ မျိုးသားတစ်ဦးက သျှမ်းသံတော်ဆင့်ကို ပြောသည်။

ထိုကဲ့သို့ ရေခမ်းခြောက်လာမှုကြောင့် သောက်သုံးရေရှားပါးမှုနှင့် ကြုံတွေ့နေရပြီး စိုက်ပျိုးရေး လုပ်ရန်အတွက် ခက်ခဲမှု ကြုံခဲ့ရကြောင်း အသက်(၃၀)ကျော်အရွယ် အမျိုးသမီးတစ်ဦးက ပြောသည်။

“ကျမတို့က ချောင်းရေတွေကို အဓိကထားပြီး သောက်သုံးရေအတွက်ရော စိုက်ပျိုးရေး အတွက်ပါ အဓိကထားသုံးရတာလေ။အခုတော့ ရေတွေ ခမ်းကုန်တော့ စိုက်ပျိုးရေးလဲ လုပ်လို့ မရတော့ဘူး။ သောက်ရေတွေဆို ပုံးဝါနဲ့ တစ်ပုံးကို ကျပ်(၁၈၀၀)ပေးပြီး ဝယ်သောက်နေရတယ်။” ဟု အဆိုပါ အမျိုးသားတစ်ဦးက ပြောသည်။

ထို့အပြင် ယခင်က အင်းလေးဒေသတွင် ရေခမ်းခြောက်ရာတွင် ယခုကဲ့သို့ အခြေနေမဆိုးခဲ့ကြောင်းနှင့် ယခုနှစ်တွင် ရေများခမ်းခြောက်လာသည်မှာ ကျေးရွာပိုများလာနိုင်ကြောင်း ၎င်းက ထပ်လောင်းပြောသည်။

အင်းလေးရွာမ ကျေးရွာဘက်တွင် နှုန်းမြေများကြောင့် လမ်းပန်းဆက်သွယ်ရေး ခက်ခဲ နေမှုကိုဖြေရှင်းရန် သဲနုန်းများ ကို စုပ်ထုတ်ပစ်ရန် ကုန်ကျစရိတ်များသောကြောင့် အလှူရှင်နှင့် အကူညီများလိုအပ်လျှက်ရှိကြောင်း သိရသည်။

ယခုနှစ် အင်းလေးဒေသတွင် အင်းလေးရေပေါ်သင်္ကြန်ပွဲတော်ကို စည်ကားသိပ်မြိုက်စွာ ကျင်းပမည်ဖြစ်ကြောင်း စစ်ကောင်စီအစိုးရ ဟိုတယ်နှင့် ခရီးသွားညွှန်ကြားမှု ဦးစီးဌာ (သျှမ်းပြည်နယ်)မှ ပြီးခဲ့သည့် မတ်လ (၁၇)ရက်နေ့တွင် ထုတ်ပြန်လာသည်။

အဆိုပါ အင်းလေး ရေပေါ်သင်္ကြန် ပွဲတော်ကာလအတွင်း နှစ်ဦးရေပေါ်ဆွမ်းလောင်းပွဲ၊ နှစ်ဦးရေပေါ်မှု သဘင်ကျင်းပခြင်း၊ တိုင်းရင်းသားရိုးရာ အကအလှပြိုင်ပွဲ အစီအစဉ်များ၊ လှေသမ္မန်များ၊ ဖောင်များဖြင့် အတာရေကစားခြင်း နှင့် ယိမ်းအကအလှများဖြင့် ဖျော်ဖြေခြင်း စသည့် အစီအစဉ်များ ထည့်သွင်းကျင်းပသွားမည်ဟု ဖော်ပြထားသည်။

ပြီးခဲ့သည့် ၂၀၂၄ ခုနှစ် ဩဂုတ်လမှ စတင်ပြီး အောက်တိုဘာလ အထိ အင်းလေး အပါဝင် မြန်မာနိုင်ငံတွင် ရေကြီးရေလျှံမှုများ ဖြစ်ပေါ်ခဲ့ပြီး တစ်နိုင်ငံလုံးနီးပါးမျှ ရေဘေးကို တွေ့ကြုံခံစားခဲ့ကြရသေးသည်။