သျှမ်းပြည်တောင်ပိုင်း ကလောမြို့နယ် ဘော်ဆိုင်းကျေးရွာအုပ်စုတွင် တရားမဝင် နေထိုင်သည့် တရုတ်နိုင်ငံသား (၇)ဦးကို စစ်ကောင်စီ လက်အောက်ခံ ရဲများက ဖမ်းဆီးခေါ်ဆောင်သွားကြောင်း သတင်းရင်းမြစ်များထံမှ သိရသည်။

ပြီးခဲ့သည့် မတ်လ (၁၆) ရက် ည ၇ နာရီခန့်၌ ကလောမြို့နယ် စစ်ကောင်စီ လက်အောက်ခံ ရဲတပ်ဖွဲ့နှင့် အုပ်ချုပ်ရေးမှူးက ဘော်ဆိုင်းကျေးရွာရှိ တရားမဝင် တရုတ်နိုင်ငံသား (၇)ဦးကို လာရောက်ဖမ်းဆီးခဲ့ပြီး ၎င်းတို့အချင်းချင်း သတ္တလုပ်ငန်းမှ အဝေမတည့်သောကြောင့် အတိုင်ခံရခြင်း ဖြစ်နိုင်သည်ဟု ဒေသခံ တစ်ဦးက ပြောသည်။

“သူတို့အချင်းချင်း အဝေမတည့်တာဖြစ်မယ်၊ အဲ့တာကြောင့် အတိုင်ခံထားရတာ ထင်တယ်။ လောလောဆယ်တော့ သူတို့ကို ရဲတွေ လာခေါ်သွားတယ်။ ရဲစခန်းမှာပဲ ချုပ်ထားသေးတယ် ပြောတယ်၊ ဘယ်ရဲစခန်းလဲတော့ မသိဘူး။ ခုထိတော့ ဘယ်လိုဆက်လုပ်မယ် မသိရသေးဘူး”ဟု ဖြစ်စဉ်သိရှိသူ ဘော်ဆိုင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဘော်ဆိုင်းသတ္တုတူးဖော်ရေး ကုမ္ပဏီဖြစ်သည့် မြေနဂါးကုမ္ပဏီမှ (၂) ဦး၊ တောင်ကြီးသိန်း ကုမ္ပဏီမှ (၄) ဦးနှင့် ကောင်းသောအင်အားကြယ် ကုမ္ပဏီမှ တစ်ဦး၊ စုစုပေါင်း (၇)ဦး ဖမ်းဆီးခံထားရခြင်းဖြစ်ကြောင်း ဒေသခံများထံမှ သိရသည်။

အဆိုပါ ဖမ်းဆီးခံရသည့် တရုတ်နိုင်ငံသား (၇)ဦးသည် ဘော်ဆိုင်းကျေးရွာတွင် ဆယ်စုနှစ်ချီ တရားမဝင် နေထိုင်သူများဖြစ်ပြီး အခြားသော တရုတ်နိုင်ငံသားများလည်း ဘော်ဆိုင်းတွင် တရားမဝင် နေထိုင်မှု ရှိနေသေးကြောင်း ၎င်းက ဆက်ပြောသည်။

ယခုကာလတွင် ဘော်ဆိုင်းဒေသရှိ ခဲသတ္တုများကို ဝယ်ယူသူ မရှိသည့်အတွက် ရပ်နားထားရပြီး ပြည်ပ တင်ပို့ရန် စစ်ကောင်စီဘက်မှ ခွင့်ပြုချက်မရသဖြင့် တရုတ်ကုမ္ပဏီများမှ သတ္တုဝယ်ယူခြင်း ယာယီရပ်နားထားသည်ဟု သတ္တလုပ်ငန်း လုပ်ကိုင်နေသူတစ်ဦးက ပြောသည်။

“ကုမ္ပဏီဘက်ကလည်း သူတို့ ပြည်ပထွက်လို့ မရသေးတော့ မဝယ်သေးတာ၊ လမ်းပိတ်နေတယ် လို့တော့ ပြောတာပဲ။ နောက်ပြီး သူတို့ တရုတ်အချင်းချင်း ဘာပြဿနာရှိလဲတော့ မသိဘူး။ တူးထားတဲ့ သတ္တုတွေက ခုထိ မရောင်းရသေးဘူး။ ခုတော့ ဈေးတက်နေတယ်၊ တစ်ပိဿာကို ကျပ် (၃ ထောင်) ကနေ ကျပ် (၅ ထောင်) အထိ ရှိတယ်”ဟု အဆိုပါ သတ္တုလုပ်ငန်း လုပ်ကိုင်နေသူက ပြောသည်။

ခဲသတ္တု တူးဖော်မှုများကို တရုတ်ကုမ္ပဏီလက်အောက်တွင် ဒေသခံအချို့ လုပ်ကိုင်ကြပြီး အချို့သော ဒေသခံများမှာ ကိုယ်တိုင်တူးဖော် ရောင်းချနေကြသည်ဟု ၎င်းက ဆက်ပြောသည်။

ကလောမြို့နယ် ဘော်ဆိုင်းကျေးရွာအုပ်စုတွင် တရားမဝင် လာရောက်နေထိုင်ပြီး သတ္တုတူးဖော်နေသည့် တရုတ်နိုင်ငံသား အများအပြား ရှိနေကာ ပြီးခဲ့သည့် ၂၀၂၄ ခုနှစ် မေလတွင်လည်း ဘော်ဆိုင်းကျေးရွာတွင် တရားမဝင် နေထိုင်နေသည့် တရုတ်နိုင်ငံသား (၂)ဦးကို ဖမ်းဆီး၍ ပြည်နှင်ဒဏ်ပေးခဲ့သည်ဟု ဒေသခံများထံမှ သိရသည်။

ထို့အပြင် ဘော်ဆိုင်းကျေးရွာတွင် ရေရှားပါးမှုများ နှစ်စဉ်ဖြစ်ပေါ်နေပြီး အများစုမှာ သတ္တုတူးဖော်မှု နောက်ဆက်တွဲအနေဖြင့် ရေရှားပါးခြင်းနှင့် အပူချိန်ပိုမြင့်လာခြင်းများ ဖြစ်နေသည်ဟု ဒေသခံများက ပြောသည်။