သျှမ်းပြည် လားရှိုးမြို့တွင် သင်္ကြန်ပွဲတော် ကျင်းပရန်အတွက် ကိုးကန့်တပ်ဖွဲ့ MNDAA က အစည်းအဝေး ခေါ်ယူပြီး ရပ်ကွက်အလိုက် ယိမ်းအကအဖွဲ့များ ပြင်ဆင်လေ့ကျင့်နေကြောင်း စုံစမ်းသိရသည်။

မတ်လ ၁၆ ရက် နေ့လယ်ပိုင်းတွင် ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့တွင် သင်္ကြန်ပွဲတော်ကို စည်ကားသိုက်မြိုက်စွာ ကျင်းပနိုင်ရန် လားရှိုးဧရိယာ စစ်ရေးအုပ်ချုပ်မှု ကော်မတီက အစည်းအဝေး ခေါ်ယူခဲ့ပြီး မြို့ပေါ်ရှိ လူမှုအဖွဲ့အစည်းများနှင့် တိုင်းရင်းသား ကိုယ်စားလှယ်များ တက်ရောက်ခဲ့ကြောင်း ဒေသခံများက ပြောသည်။

“လားရှိုးမြို့ပေါ်မှာက တိုင်းရင်းသား ၁၀ မျိုး ရှိတော့ အားလုံးကို ခေါ်တယ်။ ပြီးတော့ ရပ်ကွက်အလိုက် ယိမ်းအကတွေ ထွက်ပေးဖို့ ကိုးကန့်တပ်က ပြောထားတယ်။ ဗဟိုမဏ္ဍပ် အကြီးဆုံးကတော့ မြို့တော်ခန်းမမှာ လုပ်သွားမယ်။ သင်္ကြန်ကို လူစည်အောင် အစီအစဉ် စုံနိုင်သမျှ စုံအောင် ထည့်သွားမယ်”ဟု လားရှိုးမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

၎င်းအစည်းအဝေးကို MNDAA မှ ဖွဲ့စည်းထားသည့် ကွတ်ခိုင်ခရိုင် အုပ်ချုပ်ရေးကော်မတီနှင့် လားရှိုးဧရိယာ စစ်ရေးအုပ်ချုပ်မှုကော်မတီ အဖွဲ့ဝင် Li Xin Hai မှ ဦးဆောင်ကျင်းပခဲ့ပြီး သင်္ကြန်ကာလအတွင်း ပျော်ပွဲရွှင်ပွဲများဖြင့် စည်ကားသိုက်မြိုက်စွာ ပြုလုပ်ရန် တိုက်တွန်းခဲ့ကြောင်း ကိုးကန့်သတင်းအေဂျင်စီမှ ယမန်နေ့ (မတ်လ ၁၈ ရက်) တွင် သတင်းထုတ်ပြန်သည်။

ဧပြီလ ၁၃ ရက်မှ ၁၇ ရက်နေ့အတွင်း သင်္ကြန်အကြိုနေ့မှ မြန်မာနှစ်ဆန်းတစ်ရက်နေ့အထိ ငါးရက်တိုင်တိုင် လားရှိုးမြို့တော်ခန်းမတွင် ဗဟိုမဏ္ဍပ် ထားရှိကာ ရပ်ကွက်အလိုက် ယိမ်းအကအဖွဲ့များနှင့် တိုင်းရင်းသား ရိုးရာအကများဖြင့် ဖျော်ဖြေနိုင်ရန် စီစဉ်နေကြောင်း အစည်းအဝေး တက်ရောက်ခဲ့သူတစ်ဦးမှ သျှမ်းသံတော်ဆင့်ကို ပြောသည်။

“၆ လပိုင်း မတိုင်ခင်အထိတော့ စစ်ရေးပိုင်း လှုပ်လှုပ်ရှားရှား မရှိလောက်သေးဘူး အခု အားလုံးပုံမှန်ပဲ၊ ၆ လပိုင်း ကျော်သွားရင်တော့ မပြောတတ်ဘူး။ အခုတော့ ပွဲလမ်းသဘင်တွေ လုပ်ပေးပြီး ပြည်သူပါဝင်မှု ထောက်ခံမှုရအောင် ကြိုးစားနေတာတော့ သတိထားမိတယ်။ အဓိကတော့ သူတို့ဘက်မှာ လုံခြုံရေး အာမခံချက် ရှိထားလို့ လုပ်နိုင်တယ်ထင်တယ်”ဟု ၎င်းဒေသခံ အမျိုးသားက ထပ်လောင်းပြောကြားသည်။

ထို့အပြင် မြို့သိမ်းတိုက်ပွဲ ကာလအတွင်း စစ်ကောင်စီ လေကြောင်းတိုက်ခိုက်မှုကြောင့် သေဆုံးခဲ့ရသော အပြစ်မဲ့ ပြည်သူများအတွက် သာဓုခေါ် အမျှဝေ ဆုတောင်းပွဲကိုလည်း သင်္ကြန်ကာလအတွင်း ကျင်းပရန် စီစဉ်ထားကြောင်း ဒေသခံများထံမှ သိရသည်။

ကိုးကန့်တပ်ဖွဲ့ MNDAA နှင့် စစ်ကောင်စီကြား တရားဝင် အပစ်အခတ်ရပ်စဲမှုသည် ဇန်နဝါရီလ ၁၈ ရက်နေ့က စတင်အသက်ဝင်ခဲ့ကြောင်း တရုတ်နိုင်ငံဘက်မှ ထုတ်ဖော်ပြောကြားခဲ့ပြီးနောက် MNDAA ထိန်းချုပ်ထားသည့် လားရှိုးမြို့ပေါ်တွင် တရုတ်နှစ်သစ်ကူးပွဲတော်ကို ဖေဖော်ဝါရီ တစ်လပတ်လုံး ကျင်းပခဲ့သည်။

အလားတူ MNDAA ထိန်းချုပ်ထားသည့် သိန္နီမြို့တွင်လည်း တပေါင်းပွဲတော်ကို မတ်လ ၁၀ ရက်နေ့မှ စတင်၍ ဦးဆောင်ကျင်းပခဲ့ပြီး မတ်လ ၁၄ ရက်တွင် ကျရောက်ခဲ့သည့် ဟိန္ဒူရိုးရာ သင်္ကြန်ဖြစ်သည့် Holi ပွဲတော်ကိုလည်း လားရှိုးမြို့တွင် ကျင်းပခဲ့သည်။

အခြားတစ်ဘက်တွင် စစ်ကောင်စီဘက်မှ အချိန်မရွေး တိုက်ခိုက်လာနိုင်သည့် လေကြောင်းအန္တရာယ်ကိုလည်း စိုးရိမ်ရပြီး ကိုးကန့်တပ်ဖွဲ့ ဦးဆောင်မှုဖြင့် တရုတ်နှစ်သစ်ကူး ကာလမှ စ၍ တပေါင်းပွဲအချိန်ထိ ပွဲအကြောင်းပြကာ လောင်းကစားဝိုင်းများကို အဆက်မပြတ် ဖွင့်လှစ်ခွင့် ပြုထားခြင်းကြောင့် ခိုးဆိုးလုနှိုက်နှင့် ဓားပြတိုက်မှု အန္တရာယ်အပြင် လုံခြုံရေး စိုးရိမ်ရကြောင်း ဒေသခံများထံမှ သိရသည်။

MNDAA ဖွဲ့စည်းသတ်မှတ်ထားသည့် ကိုးကန့်ခရိုင်၊ ကွတ်ခိုင်ခရိုင်၊ သိန္နီခရိုင်နှင့် မုံးကိုးခရိုင်တို့မှ စစ်ဦးစီးမှူးများကို မတ်လ (၁၃) ရက်မှ စတင်၍ တရုတ်အာဏာပိုင်များမှ ကူမင်းမြို့သို့ အရေးပေါ် ခေါ်ယူတွေ့ဆုံနေပြီး မတ်လ (၂၂) ရက်တွင် စစ်ကောင်စီနှင့် ထပ်မံတွေ့ဆုံမည်ဖြစ်ရာ ဆွေးနွေးပွဲရလဒ်ကို စောင့်ကြည့်ရမည်ဖြစ်ကြောင်း ဒေသခံများက ပြောဆိုသည်။