မန္တလေး-မူဆယ်လမ်း ခရီးတကြောရှိ စစ်ကောင်စီဂိတ်တွင် ခရီးသည်နှင့်ကားသမားများ သယ်ဆောင်လာသော စားနပ်ရိက္ခာများကို သိမ်းဆည်းမှု ပြုလုပ်နေကြောင်း စုံစမ်းသိရသည်။

“၁၀၂၇ စစ်ဆင်ရေး” ဖြစ်ပွားပြီးနောက် ယခင်အသုံးပြုနေသည့် မန္တလေး-မူဆယ် ပြည်ထောင်စုလမ်းကို ပျက်စီးမှုကြောင့် လက်ရှိတွင် မန္တလေး – တောင်ကြီး – လဲချား – မိုင်းနောင် – မိုင်းရယ် – သိန္နီ – ကွတ်ခိုင် – မူဆယ် လမ်းကို အသုံးပြုနေရသည်။

ထိုလမ်းကြော တလျောက်တွင် စစ်ကောင်စီ စစ်ဆေးရေးဂိတ်သည် ယခင်ကထက်ပိုများလာသည်။

စစ်ကောင်စီ မှ သျှမ်းပြည်မြောက်ပိုင်း “၁၀၂၇ စစ်ဆင်ရေး” လမ်းတကြောသို့ တင်ပို့ရန် ကန့်သတ်ခံထားရသည့် ကုန်ပစ္စည်းနှင့် စားနပ်ရိက္ခာများမှာ ဆန်၊ ဆီ၊ ဆားအပြင် လျှစ်စစ်ပစ္စည်း၊ ကုန်မာ ၊ ရေပိုက် နှင့် စက်သုံးဆီများဖြစ်ကြောင်း သိရသည်။

“ အဓိကတော့ စစ်ကောင်စီဂိတ်မှာ စစ်ဆေးမှုကြမ်းတဲ့အပြင် သူတို့တားမြစ်ထားတဲ့ စားနပ်ရိက္ခာ ဆန်၊ဆီ၊ဆားတွေ ပါရင်လည်းသိမ်းတယ်။ နောက် စက်သုံးဆီပါရင်လည်း သိမ်းတယ်” ဟု လမ်းခရီးတွင် ကိုယ်တိုင်ကြုံတွေ့သည့် အသက် ၄၀ အရွယ်ရှိ ကားသမားတစ်ဉီးက သျှမ်းသံတော်ဆင့်ကို ပြောသည်။

မန္တလေး-မူဆယ်လမ်းကြောတွင် အစစ်ဆေးကြမ်းသည့်ဂိတ်များမှာ တောင်ကြီး ၄ မိုင်းဂိတ်၊ မိုင်းနောင် စစ်ဆေးရးဂိတ် အပြင် ပင်လုံမြို့ ၊ လဲချားမြို့ ၊ မိုင်းကိုင်မြို့ရှိ စစ်ဆေးရေးဂိတ်များဖြစ်ကြောင်း ၎င်းကပြောသည်။

“ အခုက ကုန်ပစ္စည်းတင်ရင်လည်းရစ်တယ် ဆန်ဆီဆာတင်ရင်သိမ်း၊ တချို့ကားသမားတွေ စက်သုံးဆီကို လမ်းမှာထည့်ဖို့တင်လာလည်း သိမ်းတယ်။ “ ဟု ၎င်းက ဆိုသည်။

ထို့အပြင် သျှမ်းပြည်မြောက်ပိုင်းသို့ သွားမည့် ပြည်သူများသည် ၁၃မျဉ်းစောင်း မဟုတ်လျှင်လည်း ငွေကြေး ကောက်ခံမှုများရှိကြောင်း သိရသည်။

“ ၁၃မျဉ်းစောင်း မဟုတ်ရင်တော့ ရစ်တယ်။ပြီးတော့ တစ်ယောက်ကို ၁ သောင်းလောက် တောင်းတယ်။” ဟု အသက် ၅၀နှစ်အရွယ် ကားသမားတစ်ဉီးက ပြောသည်။

လက်ရှိ မန္တလေး-မူဆယ် အသုံးပြုနေသည့်လမ်းကြောသည် စစ်ကောင်စီတပ်အပြင် တိုင်းရင်းသား လက်နက်ကိုင်တပ်ဖွဲ့များလည်း လှုပ်ရှားသည့်နယ်မြေဖြစ်သဖြင့် ယခင်ကထက် ခရီးစရိတ် ပိုကုန်ကြောင်း လည်း ၎င်းကားသမားက ထပ်လောင်းပြောသည်။

“ စစ်ကောင်စီရော သျှမ်းတပ်ရောပေးရတယ်။ အဲ့မှာလှုပ်ရှားနေတဲ့တပ်တွေပေါ့။ သူတို့တောင်းရင်တော့ ပေးရမှာပဲလေ။” ဟု ၎င်းက ထပ်လောင်းပြောသည်။

ကားသမားများနှင့် ခရီးသည်များလည်း ဝမ်းရေး၊ ကျန်းမာရေး အတွက်သာ သွားလာနေရသည့်အတွက် အစစရာရာ ခက်ခဲနေကြောင်း၊ မန္တလေး -မူဆယ်သည် ယခင်”၁၀၂၇စစ်ဆင်ရေး” မတိုင်ခင်တွင် တရက်တည်း ရောက်သည့်ခရီးဖြစ်ကာ လက်ရှိတွင် လမ်းတွင် နှစ်ညအိပ် ၃ရက်ခရီးဖြစ်သဖြင့် ငွေကြေးကုန်ကြမှုများကြောင်းလည်း ခရီးသွား အမျိုးသမီး တစ်ဉီးက သျှမ်းသံတော်ဆင့်ကိုပြောသည်။

“ ကျမတို့လည်း ကျန်းမာရေးပြစရာရှိလို့သာ မန္တလေးသွားနေရတာ၊ ကုန်ကျစရိတ်က အရင်နဲ့ဆိုရင် ၃ဆရှိတယ်။ အချိန်လည်းကုန်တယ်။ လမ်းမှာလည်း စိုးရိမ်စိတ်နဲ့သွားနေရတာ” ဟု ၎င်းအမျိုးသမီးကဆိုသည်။

ဆက်လက်ပြီး အသက် ၄၀အရွယ်ရှိကားသမားက “ ကျနော်တို့ တခါသွားရင် ဘယ်လောက်မှ မကျန်ဘူး။ လမ်းမှာဂိတ်တွေကလည်း များတော့ ဘာဂိတ် ဘာကြေးတွေလဲမသိဘူး မပေးလို့လည်းမရဘူးလေ။ လုပ်စားရတာ အရမ်းကျပ်တည်းလာတယ်” ဟု ကားသမားက ဆိုပြန်သည်။

သျှမ်းပြည်တွင် “၁၀၂၇ စစ်ဆင်ရေး” စစ်ကောစီနှင့် ညီနောင်မဟာမိတ်တို့၏ တိုက်ပွဲများကြောင့် လမ်းပန်း ဆက်သွယ်‌ရေးများ၊တံတား ပျက်စီးမှုများဖြစ်ပွားခဲ့ပြီး လက်ရှိအချိန်ထိ မူဆယ် – လားရှိုး – ကျောက်မဲ – ပြင်ဦးလွင် – မန္တလေး လမ်းပိုင်းကို လက်နက်ကိုင်များက ဖြတ်သန်းသွားလာခွင့် မပြုသေးကြောင်း သိရသည်။