သျှမ်းပြည်တောင်ပိုင်း နမ့်စန်မြို့နယ်တွင် KTV (ကေတီဗွီ) ဆိုင်များ ယခင်ကထက် ပိုများလာပြီး အထဲတွင် မူးယစ်ဆေးဝါးများပါ ပေါ်ပေါ်ထင်ထင် သုံးစွဲခွင့်ရနေကြောင်း စုံစမ်းသိရသည်။

စစ်တပ်အာဏာသိမ်းပြီးနောက် နမ့်စန်မြို့အတွင်းရှိ နာမည်ကြီး ကလပ်၊ ဘားများနှင့် KTV များ၊ လောင်းကစားရုံ၊ ပွဲများတွင် မူးယစ်ဆေးဝါးများကို လွယ်ကူစွာ သုံးစွဲခွင့် ရရှိနေပြီး ၂၄ နာရီ မပြတ် ဖွင့်လှစ်ထားကြောင်း နမ့်စန်မြို့ဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

စစ်ကောင်စီ အာဏာသိမ်းပြီး ၄ နှစ်ကျော်အတွင်း အဆိုပါ KTV ဆိုင်ကြီးနှင့် ဆိုင်ငယ်များ (၄၀) နီးပါးလောက်ထိ တိုးချဲ့ ဖွင့်လှစ်လာသည်။

“အရင်က ရှိတယ် ဆိုရင်တောင် KTV က အလွန်ဆုံး ၃ ခုလောက်ပဲ ရှိတာ။ စစ်အာဏာသိမ်းပြီး ၄ နှစ်အတွင်းမှာပဲ KTV ဆိုင်ကြီးဆိုင်ငယ်တွေ ၄၀ နီးပါးလောက် ရှိလာတယ်။ ဒါတောင် လက်ရှိ ဆောက်နေကြတဲ့ အဆောက်အဦတွေ၊ မဖွင့်ရသေးတဲ့ အသစ်တွေ ရှိသေးတယ်။ ၂၄ နာရီ လုံးလုံးကို ဖွင့်တာ၊ ပြီးတော့ မူးယစ်ဆေးတွေလည်း စိတ်ကြိုက်ရတော့ ပိုဆိုးတာပေါ့” ဟု ၎င်းဒေသခံ အမျိုးသားက ပြောသည်။

လက်ရှိ နမ့်စန်မြို့တွင် KTV ဆိုင်အတွင်းရှိ ဟိုင်းခန်း (သီးသန့်ခန်း) များအတွက် ဈေးနှုန်း အမျိုးမျိုးရှိပြီး တစ်နာရီ အနည်းဆုံးဈေး တစ်သိန်းကျပ်မှ စတင်ပြီး ကျပ်သိန်းရာချီအထိ ပေးရကြောင်း ၎င်းက ဆက်ပြောသည်။

KTV များတွင် မူးယစ်ဆေး အမျိုးအစား စုံစုံလင်လင် ရရှိပြီး လက်ရှိခေတ်စားနေသည့် မူးယစ်ဆေးဝါး အမျိုးအစားများဖြစ်သည့် ကေ K ၊ အီး E ၊ ဟက်ပီးဝါးတား Happy Water ၊ ရွှေ၊ ဂျယ်လီ စသည်ဖြင့် ရရှိနိုင်ပြီး စိတ်ကြွဆေးများကို တစ်လုံးလျှင် ကျပ်လေးသောင်းနှင့် ကေ K မူးယစ်ဆေးဝါး တစ်ထုပ်လျှင် ကျပ်ငါးသောင်း ဈေးပေါက်သည်ဟု ဒေသခံ အမျိုးသားတစ်ဦးက ပြောသည်။

စစ်ကောင်စီ အာဏာသိမ်းပြီးနောက် နမ့်စန်မြို့ရှိ နာမည်ကြီး ကလပ် Club နှင့် ဘား Bar များတွင် Party Drug ကို လွယ်ကူစွာ ရရှိနေသကဲ့သို့ သုံးစွဲသည့် လူငယ်များ ပိုမိုများပြားလာကာ အသက် ၁၅ နှစ်၊ ၁၆ နှစ်အရွယ် လူငယ်များပါ ပေါ်ပေါ်ထင်ထင် သုံးစွဲနေကြောင်း နမ့်စန်ဒေသခံ အသက် ၅၀ ကျော် အမျိုးသားတစ်ဉီးက သျှမ်းသံတော်ဆင့်ကို ပြောသည်။

ဘေးထွက်ဆိုးကျိုး များစွာရှိနေသော်လည်း လွယ်ကူစွာ သုံးခွင့်ရနေသည့် မူးယစ်ဆေးဝါးကို လူငယ်များက စိတ်ထွက်ပေါက် တစ်ခုအဖြစ် သုံးစွဲမှု များလာနေခြင်း ဖြစ်သည်ဟု ၎င်းက ပြောသည်။

“KTV နဲ့ Bar တို့ ဆိုင်တွေမှာဆို K ၊ E ၊ Happy Water တို့ တခြား အမျိုးအစားတွေ အများကြီးထဲမှာ ဈေးနှုန်းအမျိုးမျိုး ရှိတယ်။ အသက် ၁၅ နှစ်၊ ၁၆ နှစ်တွေတောင် သုံးကြတယ်။ လူငယ်တွေက စိတ်ထွက်ပေါက်အနေနဲ့ သုံးရင်း စွဲသွားတာမျိုးလည်း တော်တော်များလာတယ်။ KTV အခန်း ၁နာရီ အနည်းဆုံးဈေး တစ်သိန်းကနေ ညလုံးပေါက်နေရင် သိန်းရာချီထိ ကုန်တယ်”ဟု ၎င်းဒေသခံ အမျိုးသားက ရှင်းပြသည်။

Ketamine Hydrochloride အတိုကောက်အားဖြင့် ကေ K ဟု ခေါ်ဆိုကြသည့် ၎င်းမူးယစ်ဆေးဝါးသည် အဖြူရောင် အမှုန့်ဖြစ်ပြီး နှာခေါင်းရှူရှိုက်ရသည့် စိတ်ကြွမူးယစ်ဆေးတစ်မျိုး ဖြစ်ကြောင်း သိရသည်။

Happy Water ဆိုသည်မှာ ကော်ဖီအမှုန့်ပုံစံ ကော်ဖီအနံ့နှင့် သစ်သီးအနံ့ စသဖြင့် အရသာ အမျိုးမျိုးရှိပြီး ရေနွေးကြမ်းခွက် ပမာဏကို ကျွဲရိုင်းအချိုရည်ဖြင့် ရောကာ သောက်သုံးရသည်။

သျှမ်းပြည်တောင်ပိုင်းတင် မကဘဲ သျှမ်းပြည်မြောက်ပိုင်း၊ သျှမ်းပြည်အရှေ့ပိုင်း ၊ ထိုင်း-မြန်မာနယ်စပ်နှင့် တရုတ်-မြန်မာ နယ်စပ်တကြော မြန်မာနိုင်ငံဘက်ခြမ်းရှိ မြို့များတွင် ဖွင့်လှစ်ထားသော ကေတီဗွီ(KTV)များ၌ မူးယစ်ဆေးဝါး ရောင်းချမှု ပိုမိုမြင့်တက်နေကြောင်း သိရသည်။

မြို့နယ်အသီးသီးတွင်ရှိ စစ်ကောင်စီနှင့် လက်အောက်ခံ ပြည်သူစစ် ပူးပေါင်းပြီး KTV များတွင် မူးယစ်ဆေးဝါးများကို စိတ်တိုင်းကျ ရောင်းချခွင့်ရနေပြီး၊ ၎င်းနေရာတွင် စိတ်ကြွဆေးဝါးများကို အလွယ်တကူ သုံးစွဲနိုင်ကြသည်ဟု ဒေသခံပြောပြချက်အရ သိရသည်။