သျှမ်းပြည် နမ့်ခမ်းမြို့တွင် ဖွင့်လှစ်ထားသည့် ပုဂ္ဂလိက ဆေးဆိုင်ဆေးခန်းများကို TNLA မှ အခွန်ကောက်ခံခြင်းကြောင့် ပြည်သူကျန်းမာရေး အခက်အခဲ ရင်ဆိုင်နေရကြောင်း စုံစမ်းသိရသည်။
ဖေဖော်ဝါရီ နောက်ဆုံးပတ်မှ စတင်ပြီး တအာင်း(ပလောင်) အမျိုးသားလွတ်မြောက်ရေး တပ်မတော် TNLA ထိန်းချုပ်ထားသည့် နမ့်ခမ်းမြို့ပေါ်တွင် ပုဂ္ဂလိက ဆေးရုံဆေးခန်းနှင့် ဆေးပစ္စည်းဆိုင်များကို အခွန်ကောက်ခံခဲ့ရာ ပုဂ္ဂလိက ဆေးရုံအချို့ ယာယီပိတ်ထားရပြီး ဆေးဝါးများလည်း ဈေးကြီးပေး ဝယ်ယူနေရခြင်းကြောင့် ပြည်သူကျန်းမာရေး အခက်အခဲ ကြုံတွေ့နေရကြောင်း ဒေသခံများက ပြောသည်။
“အခု အခွန်ကောက်တာ ကြမ်းနေတယ်၊ ဆေးခန်းတွေဆိုရင် TNLA က သိန်း ၁၂၀ တောင်းတယ် တစ်ခါတည်း ချက်ချင်းပေးရမှာ ခွဲပေးရင် လက်မခံဘူး။ ဆေးဆိုင် အကြီးအသေး သိန်း ၄၀ ကနေ ၆၀ အထိ တစ်နှစ်စာ အဲ့လိုလာတာ။ ဒါကတော့ ကျန်းမာရေးပိုင်း တိုက်ရိုက်ပေါ့၊ ပြည်သူတွေ စားဆေး သောက်ဆေး သွားဝယ်ရင် ဈေးတက်ကုန်တယ်”ဟု နမ့်ခမ်းဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောဆိုသည်။
နမ့်ခမ်းမြို့ပေါ် ဖွင့်လှစ်ထားသည့် ပုဂ္ဂလိက ဆေးရုံဆေးခန်းနှင့် ဆေးပစ္စည်း အရောင်းဆိုင်များကို TNLA မှ အခွန်ကောက်ခံနေခြင်းနှင့် ပတ်သက်၍ TNLA ပြောရေးဆိုခွင့်ရှိသူ လွေးယေဦးထံသို့ သျှမ်းသံတော်ဆင့်မှ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။
ယခုကဲ့သို့ ဆေးပစ္စည်းအရောင်းဆိုင်များကို TNLA မှ အခွန်ကောက်ခံခြင်းကြောင့် ပြည်သူများ ဖျားနာလာပါက ဆေးဖိုးဝါးခ အဆမတန် ကုန်ကျနေရပြီး ယခင်က တစ်သောင်းကျပ် ပေးဝယ်ရသည့် ဆေးတစ်ကဒ်သည် ကျပ်နှစ်သောင်းနီးပါးအထိ ဈေးနှုန်းနှစ်ဆ မြင့်တက်သွားကြောင်း ဒေသခံများထံမှ သိရသည်။
“ဆေးထိုးရင် အပ်တစ်ချောင်းကို အရင်က ၆ ထောင်၊ အခုဆို ၈ ထောင်ကနေ တစ်သောင်းခွဲအထိ တက်သွားတယ်။ သောက်ဆေးကတော့ ဘယ်ဆေးဖြစ်ဖြစ် နှစ်ဆနီးပါး ဈေးတက်သွားတယ်။ ဆေးတစ်ကဒ်ကို အရင်က တစ်သောင်းဆိုရင် အခုက နှစ်သောင်းဖြစ်သွားပြီ။ ပြည်သူတွေရဲ့ ကျန်းမာရေး ပညာရေးက အခြေခံလိုအပ်ချက်ဖြစ်လို့ အခွန်တွေ အများကြီး လျော့ပေးရမှာ”ဟု ၎င်းဒေသခံ အမျိုးသမီးက ဆက်ပြောသည်။
အလားတူ TNLA မှ ဦးဆောင်ဖွင့်လှစ်ထားပြီး CDM ကျန်းမာရေးဝန်ထမ်းများဖြင့် လည်ပတ်နေသည့် နမ့်ခမ်းပြည်သူ့ဆေးရုံတွင် လူနာများ သွားရောက်ကုသမှု ရှိနေသော်လည်း ဆေးဖိုးဝါးခ ကုန်ကျစရိတ် များပြားကြောင်း ဒေသခံများက ပြောဆိုသည်။
“ဆေးရုံကြီးမှာလည်း လူနာတွေ သွားတာရှိတယ်၊ သူလည်း ပုဂ္ဂလိကလိုပဲ ငွေကုန်တာများတယ်။ ဆိုင်ကယ်မှောက်လို့ သွားချုပ်တာ ၇ ချက် ၈ ချက် ချုပ်တာကို ၁၄ သိန်း၊ ၁၅ သိန်း ကုန်တယ်။ ဒါက TNLA ထိုင်ထားတဲ့ နမ့်ခမ်းဆေးရုံကြီးမှာ။ ပြည်သူကျန်းမာရေးအတွက်က မြို့နယ်ဆေးရုံကြီး တစ်ခုထဲ မလုံလောက်နိုင်ဘူး”ဟု နမ့်ခမ်းဒေသခံ အမျိုးသမီးက ထပ်လောင်းပြောကြားသည်။
ထို့အပြင် နမ့်ခမ်းမြို့ နောင်စန့်ရပ်ကွက်တွင် ဖွင့်လှစ်ထားသည့် ချယ်ရီမြေ ပုဂ္ဂလိကဆေးရုံကိုလည်း TNLA ဘက်မှ အကြောင်းပြချက် ခိုင်လုံမှုမရှိဘဲ ပိတ်ခိုင်းထားခြင်းကြောင့် မတ်လ (၁) ရက်နေ့မှ စတင်ပြီး ယာယီပိတ်ထားရကြောင်း သိရသည်။
ကိုဗစ်ကာလ ကျန်းမာရေး အကြပ်အတည်း ဖြစ်ပွားစဉ်ကတည်းက အားထားခဲ့ရသည့် ၎င်းပုဂ္ဂလိက ဆေးရုံကို မပိတ်သိမ်းရန်အတွက် ရပ်ကွက်နေပြည်သူများကလည်း နမ့်ခမ်းမြို့ရှိ TNLA အုပ်ချုပ်ရေးရုံးသို့ သွားရောက်တောင်းဆိုထားကြောင်း ဒေသခံများက ပြောသည်။
Leave a Comments