သျှမ်းပြည် လားရှိုးမြို့မှ ကိုးကန့်တပ်သား အင်အားအများအပြားသည် စစ်လက်နက် အပြည့်အစုံ ကိုင်ဆောင်ပြီး ကား (၇) စီးဖြင့် သိန္နီမြို့ဘက်သို့ မျက်နှာမူ၍ ချီတက်သွားခဲ့ကြောင်း စုံစမ်းသိရသည်။

ယမန်နေ့ (မတ်လ ၁၀ ရက်) နံနက်ပိုင်းတွင် ကိုးကန့်တပ်ဖွဲ့ MNDAA သိမ်းပိုက်ထားသည့် လားရှိုးမြို့မှ ကိုးကန့်တပ်သားများသည် စစ်လက်နက် အပြည့်အစုံ ကိုင်ဆောင်ပြီး ကား (၇) စီးဖြင့် အင်အား ရာနှင့်ချီ၍ သိန္နီမြို့ဘက်သို့ ယာဉ်တန်းဖြင့် ချီတက်သွားခဲ့ကြောင်း ဒေသခံများက ပြောသည်။

“လားရှိုးဘက်က လာတာ၊ ကိုးကန့်စစ်သားတွေ ကားပေါ်အပြည့်ပဲ။ ၆ ဘီးကားနဲ့ (၇) စီးလောက် လာတယ်၊ ဘယ်ကို သွားမလဲတော့ မပြောတတ်ဘူး”ဟု သိန္နီမြို့နယ်အတွင်း ကိုယ်တိုင်မြင်တွေ့ခဲ့ရသည့် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လားရှိုးမြို့အခြေစိုက် ကိုးကန့်တပ်သားများမှ လက်နက်အပြည့်အစုံဖြင့် ထွက်ခွာသွားခြင်းကြောင့် ယခင်လက သတင်းထွက်ပေါ်ခဲ့သည့်အတိုင်း ဇွန်လမတိုင်မီ လားရှိုးမြို့ပေါ်မှ ကိုးကန့်တပ်များ အသုတ်လိုက် ဆုတ်ခွာသွားမည်ကို ဒေသခံများက စိုးရိမ်နေပြီး စစ်ကောင်စီနှင့် တိုက်ပွဲထပ်မံ ဖြစ်ပွားလာနိုင်ကြောင်း သုံးသပ်ပြောဆိုမှုများ ရှိနေသည်။

အလားတူ မတ်လဆန်းပိုင်းတွင်လည်း လားရှိုးမြို့မှ ထွက်ခွာသွားသည့် ကိုးကန့်တပ်သားများကို လားရှိုး-သိန္နီ လမ်းပိုင်းတွင် မြင်တွေ့ရပြီး ထိုမှတဆင့် ကွတ်ခိုင်မြို့နယ်ဘက်သို့ ဆက်လက်ထွက်ခွာသွားနိုင်သည်ဟု မျက်မြင်တွေ့ရှိသူများက ပြောဆိုသည်။

“အရင်တစ်ပတ်က ကိုးကန့်စစ်သားတွေ သိန္နီဘက် တက်သွားတယ်။ လူကော လက်နက်ကော ပါတယ်ဆိုတော့ ထူးဆန်းတယ်။ သိန္နီကနေ ကွတ်ခိုင်ဘက်ကို ဆက်သွားမှာ၊ ဘယ်ကို ဦးတည်လဲ သေချာမပြောတတ်ဘူး”ဟု လားရှိုး-ကွတ်ခိုင် ကုန်ရောင်းဝယ်သည့် ဈေးသည်တစ်ဦးက သျှမ်းသံတော်ဆင့်ကို ပြောသည်။

ကိုးကန့်တပ်ဖွဲ့ MNDAA နှင့် စစ်ကောင်စီအကြား တရုတ်နိုင်ငံ၏ ကြားဝင်စေ့စပ်မှုဖြင့် ကူမင်းမြို့တွင် (၇) ကြိမ်မြောက် တွေ့ဆုံဆွေးနွေးမှုအပြီး ဇန်နဝါရီလ ၁၈ ရက်နေ့မှ စတင်၍ တရားဝင် အပစ်ရပ် သဘောတူညီချက် အသက်ဝင်ကြောင်း ဇန်နဝါရီလ (၂၀) ရက်တွင် ပြုလုပ်ခဲ့သည့် တရုတ်နိုင်ငံခြားရေးဝန်ကြီးဌာန သတင်းစာရှင်းလင်းပွဲတွင် မစ္စ မော်နင်းက ထုတ်ဖော်ပြောကြားခဲ့သည်။

၎င်းအပစ်ရပ် သဘောတူညီမှုတွင် အရှေ့မြောက် တိုင်းစစ်ဌာနချုပ် အခြေစိုက်ရာ လားရှိုးမြို့ကို ထိန်းချုပ်ထားသည့် ကိုးကန့်တပ်ဖွဲ့ MNDAA မှ ၂၀၂၅ ခုနှစ် ဇွန်လမတိုင်မီ တစ်သုတ်ပြီးတစ်သုတ် ပြန်လည်ဆုတ်ခွာ ပေးရမည်ဖြစ်ကြောင်း သတင်းထွက်ပေါ်ခဲ့သော်လည်း ကာယကံရှင်ဖြစ်သည့် စစ်ကောင်စီနှင့် MNDAA တို့မှ အတည်ပြု ထုတ်ပြန်ထားခြင်း မရှိသေးပေ။

စစ်ကောင်စီနှင့် ကိုးကန့်တပ်ဖွဲ့ MNDAA တို့သည့် ပြီးခဲ့သည့် ၂၀၂၄ ခုနှစ် ဒီဇင်ဘာလတွင် တစ်ကြိမ်၊ ၂၀၂၅ ခုနှစ် ဇန်နဝါရီလအတွင်း တစ်ကြိမ်တွေ့ဆုံခဲ့ပြီး ယခု မတ်လအတွင်း ထပ်မံတွေ့ဆုံနိုင်သည့် သတင်းများလည်း ထွက်ပေါ်နေလျက်ရှိသည်။

ပုံစာ – လက်နက်အပြည့်အစုံဖြင့် ထွက်ခွာလာသည့် ကိုးကန့်တပ်သားများကို လားရှိုး-သိန္နီလမ်းပိုင်းတစ်နေရာတွင် တွေ့ရစဉ်