သျှမ်းပြည် ကွတ်ခိုင်မြို့နယ် မုံးစီးဒေသတွင် MNDAA ၏ ရွှေတူးဖော်မှုကို သွားရောက်ကန့်ကွက်စဉ် သေနတ်ပစ်ခတ်ခံရပြီး သေဆုံးခဲ့သူ (၆) ဦးကို ယနေ့ အသုဘချမည်ဖြစ်ကြောင်း စုံစမ်းသိရသည်။

မတ်လ ၅ ရက်နေ့တွင် ကွတ်ခိုင်မြို့နယ် မုံးစီးကျေးရွာအုပ်စု ပိန်းခမ်ရွာရှိ ရေထွက်နေရာ၌ ရွှေတူးဖော်နေသည့် တရုတ်လူမျိုးများနှင့် ကိုးကန့်တပ်ဖွဲ့ MNDAA ကို ရွာသားများမှ သွားရောက်ကန့်ကွက်ခဲ့ရာ ရုန်းရင်းဆန်ခတ် ဖြစ်ပွားပြီး MNDAA တပ်သားများမှ သေနတ်ဖြင့် ပြန်လည်ပစ်ခတ်ခဲ့ခြင်းကြောင့် အရပ်သား (၅) ဦးနှင့် KIA တပ်သားတစ်ဦး စုစုပေါင်း (၆) ဦး သေဆုံးသွားခဲ့သည်။

ယနေ့ (မတ်လ ၇ ရက်) နေ့လယ်ပိုင်း၌ ပန်ယန်းခါးကျေးရွာတွင် ထားရှိသည့် ၎င်းသေဆုံးသူတို့၏ ရုပ်အလောင်းများကို မြေမြှုပ်သင်္ဂြိုဟ်မည်ဖြစ်ပြီး ရွာသားများမှ မုံးစီးကျေးရွာရှိ MNDAA ရုံးသို့ ထပ်မံသွားရောက်ကာ ဆန္ဒထုတ်ဖော်မည်ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ဒီနေ့ အသုဘ ချမယ်လို့ ပြောတာ၊ အလောင်းတွေကိုတော့ ပန်ယန်းခါးရွာမှာပဲ ထားထားတာ။ ကိုးကန့်စစ်သားတွေကော စောင့်နေတယ်။ ဒေသခံတွေ ဒီနေ့လည်း ထပ်ပြီး ဆန္ဒလာပြမယ်လို့ ပြောတယ်။ အခု စကားပြောနေတာကတော့ ဒေသက ကချင်လူကြီးတွေနဲ့ မုံးကိုးက လာတဲ့ ကိုးကန့်လူကြီးတွေ စကားပြောနေကြတယ်”ဟု မုံးစီးဒေသခံ ၎င်အမျိုးသားက ပြောသည်။

ယမန်နေ့ (မတ်လ ၆ ရက်) ညပိုင်း၌ မုံးစီးကျေးရွာတွင် တရားဟောဆရာ၊ ကချင်လူကြီးများနှင့် ကိုးကန့်အရာရှိများ ဆွေးနွေးခဲ့စဉ် သေဆုံးသူများ၏ အသုဘစရိတ်နှင့် ထိခိုက်ဒဏ်ရာရသူများအတွက် ဆေးကုသစရိတ်တို့ကို တာဝန်ယူမည်ဖြစ်ပြီး ရွှေတူးဖော်မှုကိုလည်း ရပ်နားမည်ဖြစ်ကြောင်း ပြောဆိုခဲ့သည်ဟု ဆိုသည်။

“မနေ့ညက အစည်းအဝေး ထိုင်ကြတာ ကိုးကန့်နဲ့။ လောလောဆယ်တော့ အခု အသုဘအတွက်ရော၊ ဆေးရုံတင်ထားရတဲ့ လူနာတွေရောအကုန် ကိုးကန့်ဘက်က ကုန်ကျစရိတ် ထွက်ပေးမယ်။ ရွှေလည်း မတူးဖော်တော့ဘူး။ ကျန်တာတော့ နောက်မှ ပြန်ရှင်းမယ်၊ အခု အသုဘချဖို့အရင် ညှိကြတာတဲ့။ တရားဟောဆရာနဲ့ ဒီဒေသရဲ့ ကချင်လူကြီးပိုင်းတွေ မနေ့ညက လာရှင်းကြတာ”ဟု မုံးစီးဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

ယခုကိစ္စနှင့် စပ်လျဉ်း၍ သိရှိနိုင်ရန် ကချင်လွတ်လပ်ရေးတပ် KIA ပြောရေးဆိုခွင့်ရှိသူ ဗိုလ်မှူးကြီးနော်ဘူထံသို့ သျှမ်းသံတော်ဆင့်မှ ဖုန်းဖြင့်ဆက်သွယ်ခဲ့သော်လည်း အဆက်အသွယ် မရရှိခဲ့ပေ။

မတ်လ ၅ ရက်နေ့တွင် မုံးစီးကျေးရွာရှိ MNDAA ရုံးသို့ ရွာသားများမှ သေနတ်ပစ်ခံရပြီး သေဆုံးသူများ၏ အလောင်းကို ကားပေါ်တင်ဆောင်ကာ လာရောက်ဆန္ဒပြချိန်တွင် မုံးဟွမ်ဘက်မှ လာသည့် ကိုးကန့်တပ်သားများ ကျူးလွန်ခြင်းဖြစ်ပြီး မုံးစီးအပိုင် နယ်မြေအတွင်း ဖြစ်ပွားခြင်း မဟုတ်ကြောင်း ပြောဆိုခဲ့သည်ဟု ဒေသခံများထံမှ သိရသည်။

“တကယ်ဖြစ်တဲ့ နေရာက မုံးဟွမ်အုပ်စုဘက်က၊ သေနတ်ပစ်တဲ့ ကိုးကန့်စစ်သားကလည်း မုံးဟွမ်က လာတာ။ မုံးစီးက စစ်သားကလည်း သူတို့နဲ့ မဆိုင်ဘူး၊ ရွှေတူးတဲ့ကိစ္စကို မုံးစီးကလည်း မသိဘူး သူတို့လည်း ခွင့်မပြုထားဘူးလို့ ပြောထားတာ။ ဖြစ်စဉ်ကို သုံးသပ်ရရင်တော့ နှစ်ဘက်စလုံးက မှားတယ်လို့ ပြောရမယ်။ အဲ့နေ့က ကချင်စစ်သားတွေလည်း ပါသွားတယ်၊ ဒါပေမယ့် သူတို့က အရပ်သားဝတ်စုံနဲ့ သွားတာ”ဟု ဖြစ်စဉ်သိရှိသူ ဒေသခံလူငယ်တစ်ဦးက သျှမ်းသံတော်ဆင့်ကို ပြောသည်။

ထို့ကြောင့် ရွာသားများမှ မုံးကိုးဘက်မှ လာရောက်ဖြေရှင်းပေးမည့် MNDAA အရာရှိများကို စောင့်ဆိုင်းနေပြီး လက်နက်မဲ့ ဒေသခံပြည်သူများကို ကိုးကန့်တပ်သားများမှ တရားလက်လွှတ် သေနတ်ပစ်ခတ်ခြင်းကြောင့် (၆) ဦး သေဆုံးခဲ့သည့် ဖြစ်စဉ်ကို စုံစမ်းစစ်ဆေးပြီး တရားမျှတမှု ရှာဖွေသွားရန် ထပ်မံတောင်းဆိုထားကြောင်း သိရသည်။

ပုံစာ – ပန်ယန်းခါးကျေးရွာတွင် ထားရှိသည့် သေဆုံးသူများ၏ ရုပ်အလောင်း