သျှမ်းပြည် ကွတ်ခိုင်မြို့နယ် မုံးစီးဒေသတွင် ရွှေတူးဖော်မှုကို သွားရောက်ကန့်ကွက်သည့် ဒေသခံများနှင့် MNDAA ရုံးရင်းဆန်ခတ်ဖြစ်ပွားပြီး‌ သေနတ်ပစ်ခတ်မှု ဖြစ်ပွားခဲ့ရာ စုစုပေါင်း (၆) ဦး သေဆုံးပြီး (၆) ဦး ဒဏ်ရာရရှိခဲ့ကြောင်း စုံစမ်းသိရသည်။

ယမန်နေ့ (မတ်လ ၅ ရက်) နေ့လယ်ပိုင်းတွင် ကွတ်ခိုင်မြို့နယ် မုံးစီးကျေးရွာအုပ်စု ပိန်းခမ်ရွာရှိ ရေထွက်နေရာ၌ ရွှေတူးဖော်နေသည့် တရုတ်လူမျိုးများနှင့် ကိုးကန့်တပ်ဖွဲ့ MNDAA ကို ရွာသားများမှ သွားရောက်ကန့်ကွက်ခဲ့ရာ ရုန်းရင်းဆန်ခတ် ဖြစ်ပွားပြီး MNDAA တပ်သားများမှ သေနတ်ဖြင့် ပြန်လည်ပစ်ခတ်ခဲ့ခြင်းကြောင့် စုစုပေါင်း (၆) ဦး သေဆုံးပြီး (၆) ဦး ဒဏ်ရာရရှိခဲ့ကြောင်း ဒေသခံများက ပြောသည်။

“ကိုးကန့်တွေကို ရွာမှာ ရှိတဲ့ ရေထွက်နေရာ ရွှေတူးတာ ရပ်ဖို့ ဒေသခံတွေ သွားတားကြတာ။ တရုတ်တွေကလည်း ဗမာစကား မပေါက်တော့ အစပိုင်း ပြဿနာတက်ကြတယ်။ ရန်ဖြစ်ကြတော့ တရုတ်ဘက်က ၂ ယောက် ခြေထောက်ကျိုးတယ်၊ အဲ့မှာ စကားပြောကြပြီးတော့ အဆင်ပြေလို့ ပြန်ထွက်လာတဲ့အချိန် ကိုးကန့်စစ်သားတွေက သေနတ်နဲ့ ပစ်လိုက်တာ ၅ ယောက် ပွဲချင်းပြီး ဆုံးသွားတယ်”ဟု မုံးစီးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မုံးစီးကျေးရွာမှ ၇ မိုင်ခန့် ကွာဝေးသည့် ပိန်းခမ်ကျေးရွာရှိ နမ့်လင်းချောင်း ရေထွက်နေရာနှင့် လယ်ယာမြေများတွင် ရွှေမတူးဖော်ရန် ကိုးကန့်တပ်ဖွဲ့ MNDAA ထံသို့ ဒေသခံများမှ စာပို့တောင်းဆိုထားသော်လည်း MNDAA ဘက်မှ စက်ယန္တရားကြီးများဖြင့် ရွှေတူးဖော်ရန် လုပ်ဆောင်လာခြင်းကြောင့် ထပ်မံသွားရောက် ကန့်ကွက်နေစဉ် သေနတ်ပစ်ခံရခြင်းဖြစ်ကြောင်း သိရသည်။

MNDAA ၏ သေနတ်ပစ်ခံရပြီး သေဆုံးသူ (၆) ဦးစလုံးမှာ အမျိုးသားများဖြစ်ပြီး ၎င်းအထဲတွင် KIA တပ်သားနှစ်ဦး ပါဝင်ကြောင်း ဒေသခံများက ပြောဆိုသော်လည်း သျှမ်းသံတော်ဆင့်မှ သီးခြားအတည်မပြုနိုင်သေးပါ။

ယမန်နေ့ ညနေပိုင်းတွင် ပိန်းခမ်၊ ပန်ယန်းခါး၊ မန်ဘုံနှင့် နားလေးရွာရှိ သျှမ်းနှင့် ကချင်ဒေသခံများမှ ပစ်ခတ်မှုအတွင်း သေဆုံးခဲ့သူများ၏ ရုပ်အလောင်းကို ကားပေါ်တင်ဆောင်ကာ မုံးစီးကျေးရွာရှိ MNDAA ရုံးသို့ လာရောက်ဆန္ဒပြခဲ့ပြီး ထိခိုက်ဒဏ်ရာရသူများကို ကွတ်ခိုင်ဆေးရုံသို့ ခေါ်ဆောင်သွားကာ ဆေးကုသပေးလျက်ရှိကြောင်း သိရသည်။

“ဆေးရုံတင်သွားတာ ၇ ယောက်ထဲက တစ်ယောက်က အခြေအနေ မကောင်းလို့ လမ်းမှာဆုံးပြီး ပြန်ခေါ်လာတာ၊ ကချင်စစ်သားတွေလည်း ပါတယ်။ ဆန္ဒပြတုန်းကတော့ ဖယောင်းတိုင်မီးတွေ ထွန်းပြီး ပြည်သူကိုသတ်တဲ့ MNDAA အလိုမရှိလို့ ကြွေးကြော်ကြတာ။ အခု ဘာမှတော့ မသိရသေးဘူး၊ ကိုးကန့်ဘက်က လူကြီးကို စောင့်ပီးမှပဲ ပြောမယ်လို့ပြောတာ”ဟု မုံးစီးဒေသခံ ၎င်းအမျိုးသားက သျှမ်းသံတော်ဆင့်ကို ပြောသည်။

ရေထွက်နေရာတွင် ရွှေမတူးဖော်ရန် သွားရောက်ကန့်ကွက်ခဲ့သည့် လက်နက်မဲ့ ဒေသခံပြည်သူများကို MNDAA မှ တရားလက်လွှတ် သေနတ်ပစ်ခတ်ခြင်းကြောင့် (၆) ဦးထက်မနည်း သေဆုံးခဲ့သည့် ဖြစ်စဉ်ကို စုံစမ်းစစ်ဆေးပြီး တရားမျှတမှုအတွက် ဖြေရှင်းပေးရန် ဒေသခံများက မုံးစီးကျေးရွာရှိ MNDAA ရုံးတွင် စောင့်ဆိုင်းနေကြောင်း သိရသည်။

ကွတ်ခိုင်မြို့နယ် မိုင်းယုလေးကျေးရွာတွင် ဇန်နဝါရီ လဆန်းပိုင်းမှ စတင်ပြီး ရွှေတူးဖော်မှုကို TNLA ဘက်က ပြန်လည်ခွင့်ပြုခဲ့ရာ ဒေသခံ ကိုယ်ထူကိုယ်ထနှင့် မိုင်းပေါက်မြို့နယ်ဘက်မှ ရောက်လာသည့် တရုတ် သို့မဟုတ် ‘ဝ’ကုမ္ပဏီများ ရွှေအလွန်အကျွံ တူးဖော်မှုကြောင့် နမ့်မောချောင်းရေ အရောင်ပြောင်းကာ ရေနှောက်လာပြီး အသုံးပြုရန် ခက်ခဲနေကြောင်း ဒေသခံများထံမှ သိရသည်။

ယမန်နှစ် ၂၀၂၄ ဒီဇင်ဘာလ တတိယပတ်ကလည်း ကွတ်ခိုင်မြို့နယ် မုံးစီးကျေးရွာအုပ်စု ပန်ယန်ခါးကျေးရွာအနီးရှိ KIA လက်အောက်ခံ ပြည်သူ့စစ်တပ်စခန်း တစ်ခုကို MNDAA မှ ကြိုတင်အကြောင်းကြားခြင်း မရှိဘဲ ဝင်ရောက်နှောင့်ယှက်ခဲ့ရာ နှစ်ဘက်တပ်ဖွဲ့ဝင်များ ငြင်းခုံပြီး ရိုက်နှက်မှုဖြစ်ပွားခဲ့ကြောင်း ဒေသခံများထံမှ သိရသည်။