ထိုင်းနိုင်ငံ ချင်းမိုင်မြို့တွင် လူငယ်ဂိုဏ်းတစ်ခုမှ ထိုင်းလူငယ် အမျိုးသားတစ်ဦးကို ဓားဖြင့်ထိုးသတ်မှု ဖြစ်ပွားခဲ့ကြောင်း Chiang Mai News ကဖော်ပြသည်။

ယနေ့ (မတ်လ ၄ ရက်) နံနက် ၄ နာရီဝန်းကျင်တွင် ချင်းမိုင်မြို့ရှိ ဖက်တူ ချင်းမိုင် (ด้านหลังตลาดประตูเชียงใหม่) အနောက်ဘက်စျေးတွင် အသက် ၁၈ နှစ်အရွယ် ထိုင်းအမျိုးသားတစ်ဦးကို မြန်မာရွှေ့ပြောင်းအလုပ်သမား လူငယ် ၈ ဦးက ဓား၊ တုတ်နှင့် အခြားလက်နက်ဖြင့် လိုက်လံရိုက်နှက်ထိုးသတ်ခဲ့ကြောင်း ဆိုသည်။

ယင်းကဲ့သို့ ဓားထိုးမှုဖြစ်ပွားရခြင်းမှာ လူငယ်အချင်းချင်း အကြည့်ချင်းဆုံရာမှ စပြီး ဖြစ်ပွားခဲ့သည်။

ဓားထိုးခံရသူ အသက် ၁၈ နှစ်အရွယ် ထိုင်းအမျိုးသားသည် ၎င်း၏ညာဖက် နံရိုးမှာပြင်းထန်စွာ ဒဏ်ရာရရှိခဲ့ပြီး Suan Dok ဆေးရုံသို့ပို့ဆောင်နေစဉ် သေဆုံးသွားခဲ့ကြောင်း သိရသည်။

လက်ရှိတွင် တရားခံလူငယ် ၆ ဦးကို ချင်းမိုင်ရဲတပ်ဖွဲ့က ဖမ်းဆီးရမိပြီး ကျန်သည့် တရားခံ ၂ ဦးကို ဆက်လက် ရှာဖွေ ဖမ်းဆီးနေကြောင်း သိရသည်။

၎င်းတို့သည် ချင်းမိုင်မြို့ရှိ လူငယ်ဂိုဏ်းတစ်ခုဖြစ်သော (၅၇၅) ဂိုဏ်းအဖွဲ့မှ လူငယ်များဖြစ်ကြောင်း ဆိုသည်။

ချင်းမိုင်မြို့တွင် လူငယ်ချင်းချင်း ဓားထိုးမှုဖြစ်ပွားပြီးနောက် စစ်ဆေးမှုများ တင်းကြပ်နေသဖြင့် ထိုင်းရောက် မြန်မာပြောင်းရွှေနေထိုင်သူများအနေဖြင့်လည်း သတိထားသွားလာကြပါရန် အသိပေးအပ်ပါသည်။

ပြီးခဲ့သည့် ရက်ပိုင်းအတွင်း ထိုင်းနိုင်ငံ ဆန်ဆိုင်းမြို့နယ်တွင် မြန်မာရွှေ့ပြောင်းအလုပ်သမား လူငယ် ၄ ဦးသည် ဦးထုပ်သွားဝယ်နေစဉ် ပိုက်ဆံမလုံလောက်သဖြင့် ဈေးဆိုင်ပိုင်ရှင်အမျိုးသားတစ်ဦးကို ဓားဖြင့်ခုတ်ခဲ့ကြောင်း ထိုင်းသတင်းဌာနများက ဖော်ပြသည်။