မြန်မာ-ထိုင်းနယ်စပ် သျှမ်းပြည်အရှေ့ပိုင်း တာချီလိတ်မြို့ လွယ်စတုံဘက်ရှိ ကုန်စုံဆိုင်တစ်ဆိုင် ဓားပြတိုက်ခံကာ ငွေကြေးများယူဆောင်သွားကြောင်း ဒေသခံများထံ စုံစမ်းသိရသည်။

ယမန်နေ့ (မတ်လ ၃)ရက် ည(၈)နာရီဝန်းကျင်တွင် တာချီလိတ်မြို့ ဝမ်လုံးကျေးရွာအုပ်စု၊ လွယ်စတုံ(အောက်)ရွာ ရှိ လမ်းမကြီးဘေးတွင်ဖွင့်လှစ်ထားသော “ကျေးသီး” ကုန်စုံဆိုင်ကို အမည်မသိ လက်နက်ကိုင် (၃)ဦးမှ လာရောက်ပြီး ဆိုင်ရှင်အား ကြိုးဖြင့်တုတ်၍ ဘတ်ငွေ ၇၀၀၀ (မြန်မာကာလပေါက်စျေး ကျပ်ငွေ ၈သိန်းခွဲကျော်) နှင့် ကားတစ်စီးယူဆောင်သွားကြောင်း ဖြစ်စဉ်ကို သိသည့် အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“မနေ့ညက (၈)နာရီအချိန်မှာ လွယ်စထုံအောက်ရွာက ယမ်းခေါင်ရွာသွား လမ်းမကြီးနားရှိတဲ့ “ကျေးသီး” ကုန်စုံဆိုင် ကို ဓားပြတိုက်သွားတယ်။ ဆိုင်ရှင်ကိုလည်း ကြိုးနဲ့တုတ်ခဲ့တယ်။ ဘတ်(၇၀၀၀)လည်း ပါသွားတယ်။ ကားတစ်စီးလည်း ပါသွားတယ်။” ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထို့အပြင် အဆိုပါ ဓားပြမှုနှင့် ခိုးဆိုးလုယက်မှုများကို တာဝန်ဖြေရှင်းပေးမည့် အဖွဲ့မရှိကြောင်းနှင့် ရဲဌာနများမှလည်း အားကိုးမရကြောင်း ၎င်းကထပ်လောင်း ပြောသည်။

ယခုကဲ့သို့ ခိုးဆိုးလုယက်မှု များပြားလာခြင်းကြောင့် ဒေသခံများအနေဖြင့် အပြင်သွားလျှင် ဆိုင်ကယ်နှင့် မသွားရဲတော့ဘဲ ကားဖြင်သာ သွားလာနေရပြီး စိုးရိမ်စိတ်ဖြင့် နေထိုင်နေရကြောင်း အမျိုးသားတစ်ဦးက ပြောသည်။

“ခိုးဆိုးလုယက်မှုကတော့ ဖြစ်တယ် မကြာခဏပဲ။ သူခိုးတွေက ခိုးမယ် နဲနဲအခြေနေမကောင်းရင် ငြိမ်မယ်။ပြီးရင် ပြန်ခိုးမယ်။ အခုဆို ဆိုင်ကယ်တွေပါ ပျောက်နေတာ။ဆိုင်ကယ်နဲ့ သွားရင်လည်း လူကိုရိုက်ပြီး ဆိုင်ကယ်လုသွားတာတွေလည်း အများကြီးပဲ။ အပြင်သွားရင် ကားနဲ့ပဲ သွားဖြစ်တယ်။ ဆိုင်ကယ် မစီးရဲဘူး။ ဘယ်အချိန် သေမလဲ မသိလို့။ ကြောက်ရတာပေါ့။ခုက ခေတ်ပျက်နေတာဆိုတော့ ကြောက်နေရတယ်။” ဟု အမျိုးသားတစ်ဦးက ပြောသည်။

တာချီလိတ်မြို့တွင် လုယက်မှုများ နေ့စဉ်နီးပါး ဖြစ်ပွားနေသော်လည်း သက်ဆိုင်ရာ ရဲများက အရေးယူဆောင်ရွက်ပေးခြင်း မရှိခြင်းကြောင့် ခိုးဆိုးလုယက်မှုများ ကိုအရေးယူ ဆောင်ရွက်ပေးမည့် အဖွဲ့အစည်း တစ်ခုလိုအပ်နေသည်ဟု အဆိုပါ အမျိုးသားက ဆိုသည်။

ပြီးခဲ့သည့် ဇန်နဝါရီလ (၁၆)ရက်နေ့တွင် ဆိုင်ကယ်တက္ကစီသမားတစ်ဦးကို ခရီးသည်က သတ်ဖြတ်ပြီး ဆိုင်ကယ်လုယူသည့် ဖြစ်စဉ်လည်း ရှိခဲ့သည်။

ထို့နောက် စားဝတ်နေရေးအတွက် ရုန်းကန်ပြီး အသက်မွေးဝမ်းကြောင်း ပြုနေရသည့် ဆိုင်ကယ်တက္ကစီ သမားများအတွက် စိုးရိမ်ပူပမ်မှုများ ဖြစ်စေပြီး မြို့နှင့် ဝေးသည့် နေရာသို့ ခရီးသည်များကို မပို့ရဲကြကြောင်း သိရသည်။