သျှမ်းပြည် တန့်ယန်းမြို့နယ်အခြေစိုက် အရှေ့မြောက်တိုင်းစစ်ဌာနချုပ် (ရမခ) တိုင်းမှူး၊ မိုင်းရယ်နှင့် တန့်ယန်းမြို့ရှိ စစ်ဗျူဟာမှူးများကို စစ်ကောင်စီက ကျားဖြန့်ကိစ္စ ဆက်နွှယ်မှုဖြင့် အချင်းချင်း ပြန်လည်ဖမ်းဆီးပြီး စစ်ဆေးနေကြောင်း စုံစမ်းသိရသည်။

ဖေဖော်ဝါရီလ နောက်ဆုံးပတ်တွင် တန့်ယန်းမြို့နယ်အတွင်း ပြောင်းရွှေ့အခြေစိုက်ထားသည့် အရှေ့မြောက်တိုင်း စစ်ဌာနချုပ် (ရမခ) တိုင်းမှူး ဗိုလ်ချုပ် ကျော်မြင့်ထွန်း အပါအဝင် တန့်ယန်းနှင့် မိုင်းရယ်စစ်ဗျူဟာမှူး တို့ကို စစ်ကောင်စီက ကျားဖြန့်ကိစ္စနှင့် ဆက်စပ်၍ ဖမ်းဆီးပြီး နေပြည်တော်သို့ ခေါ်ယူစစ်ဆေးနေကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“တန့်ယန်းနဲ့ မိုင်းရယ် ဗျူဟာမှူး (၂) ယောက်ကတော့ ၂၆ ရက်က အပြောင်းအလဲ လုပ်တယ်။ အရင် ဗျူဟာမှူးကို နေပြည်တော် ခေါ်သွားပြီး စစ်နေတယ်လို့ ကြားတယ်၊ ကျားဖြန့်လုပ်ငန်းနဲ့ ပတ်သက်မယ်ထင်တယ်။ အောက်ခြေက ရသလောက် အပေါ်က မရလို့ ခေါ်စစ်တယ်လို့လည်း အသံထွက်နေတယ်၊ ဒီမှာ တစ်ရာရရင် အထက်ကို တစ်ကျပ်လောက်ပဲ ပြောတာမျိုး။ အရင်တစ်ခါ ဖမ်းတာက အပေါ်ကို စာရင်းတက်တာ နည်းလို့ ခေါ်စစ်ခံရတယ်လည်း ပြောတယ်”ဟု တန့်ယန်းမြို့နယ်မှ ၎င်းစစ်ရေးသတင်းရင်းမြစ်က ပြောသည်။

လက်ရှိတွင် မိုင်းရယ်စစ်ဗျူဟာမှူး အသစ်မှာ ဗိုလ်မှူးကြီး ဇေယျာနိုင်ဟု သိရပြီး အောက်ခြေတပ် အပြောင်းအရွှေ့မှာ ပုံမှန်အတိုင်း ဆက်ရှိနေကြောင်း ဒေသခံများက ပြောဆိုသည်။

အလားတူ ရမခ တိုင်းမှူး အဖြစ် ယမန်နှစ်က MNDAA ထံ လက်နက်ချ အညံ့ခံခဲ့သည့် ဗိုလ်မှူးချုပ် အေးမင်းဦးကို စစ်ကောင်စီက အသစ်ခန့်အပ်လိုက်ကြောင်း စစ်တပ်သတင်းရင်းမြစ်ကို ကိုးကား၍ CDM ဗိုလ်ကြီး ဇင်ယော်က ခေတ်သစ်သတင်းဌာနကို ယနေ့ (မတ် ၃ ရက်) တွင် ပြောကြားထားသည်။

ပြီးခဲ့သည့် ဖေဖော်ဝါရီလ ပထမပတ်တွင် မိုင်းရယ်မြို့နယ်အတွင်းရှိ ကျားဖြန့်လုပ်ငန်း နေရာများကို တိုက်ပွဲဖော်ဆောင်ပြီး ဝင်ရောက်ဖမ်းဆီးခဲ့သည့် ဖြစ်စဉ်ကို ဦးဆောင်ခဲ့သူမှာ လက်ရှိဖမ်းဆီး စစ်ဆေးခံနေရသည့် တန့်ယန်းနှင့် မိုင်းရယ် စစ်ဗျူဟာမှူး (၂) ဦးတို့ဖြစ်ကြောင်း သိရသည်။

ထိုစဉ်က မိုင်းရယ်မြို့နယ် မိုင်းဟဒေသရှိ မုံးဟ-မုံးဟင်းပြည်သူ့စစ် နယ်မြေတွင် ဖွင့်လှစ်လုပ်ကိုင်နေသည့် အွန်လိုင်းကျားဖြန့် ငွေလိမ်ဂိုဏ်းများကို စစ်ကောင်စီတပ်မှ ဝင်ရောက်ဖမ်းဆီးခဲ့ရာ ဗီယက်နမ်နှင့် တရုတ်နိုင်ငံသား အပါအဝင် (၁၀၂) ဦးကို ဖမ်းဆီးရမိခဲ့ကြောင်း စစ်ကောင်စီဘက်က ထုတ်ပြန်သည်။

ယင်းမတိုင်မီ ဖေဖော်ဝါရီလ (၃) ရက်တွင် နေပြည်တော်၌ ပြုလုပ်ခဲ့သည့် စစ်ကောင်စီ လုပ်ငန်းညှိနှိုင်း အစည်းအဝေးတွင် တရားမဝင် အွန်လိုင်းလောင်းကစားနှင့် ငွေကြေးလိမ်လည်မှု ကျားဖြန့်လုပ်ငန်းကို နယ်မြေအလိုက် တာဝန်ရှိသည့် စစ်ကောင်စီဘက်တော်သားများ ပတ်သက်မှု ရှိပါက ထိရောက်စွာ အရေးယူမည်ဟု စစ်ခေါင်းဆောင် မင်းအောင်လှိုင်က ပြောကြားခဲ့သည်။

သျှမ်းပြည်မြောက်ပိုင်းရှိ စစ်ကောင်စီ ထိန်းချုပ်ထားနိုင်သည့် တန့်ယန်းနှင့် မိုင်းရယ်မြို့နယ်တို့တွင် ‘ဝ’တပ်ဖွဲ့ UWSA ၊ သျှမ်းတပ် SSPP/SSA ၊ ကိုးကန့်တပ် MNDAA တို့လည်း တပ်စွဲထားပြီး ပြည်သူ့စစ်ထိန်းချုပ် နယ်မြေအတွင်း ရွှေ့ပြောင်းလုပ်ကိုင်နေသည့် ကျားဖြန့်ရုံ အများအပြား ကျန်ရှိနေသေးကြောင်း ဒေသခံများက ပြောသည်။