အာဏာသိမ်း ၄ နှစ်ကျော်ကာလအတွင်း နိုင်ငံတစ်ဝှမ်း ဖြစ်ပွားနေသည့် တိုက်ပွဲများနှင့် ကျားဖြန့်နှိမ်နှင်းရေး ကြောင့် စစ်ကောင်စီသည် အဘက်ဘက်မှ ဖိအားများရင်ဆိုင်နေရသည်။

တရုတ်ဖိအားပေးမှုကြောင့် ၂၀၂၃ ခုနှစ် နိုဝင်ဘာလကတည်းက စစ်ကောင်စီသည် တရုတ်-မြန်မာနယ်စပ် ဒေသတစ်လျှောက်ရှိ ကျားဖြန့်လုပ်ငန်းများနှင့် ဆက်နွယ်နေသည့် ကိုးကန့်ခေါင်းဆောင်များအပါအဝင် တရုတ်နိုင်ငံသားအများအပြားကို ဖမ်းဆီးပြီး တရုတ်နိုင်ငံသို့ ပို့ဆောင်ပေးခဲ့ရသည်။

ထိုအချိန်တွင် မြောက်ပိုင်းညီနောင်မဟာမိတ် သုံးဖွဲ့၏ စစ်အာဏာရှင် အမြစ်ဖြတ်ရေးဆိုသည့် “၁၀၂၇ စစ်ဆင်ရေး” သည်လည်း တရုတ်အစိုးရ၏ ကျားဖြန့်နှိမ်နင်းရေးနှင့်အတူ ဆက်စပ်ပေါ်ပေါက်လာခဲ့ပြီး စစ်ကောင်စီ၏ တပ်စခန်းပေါင်းများစွာကို တိုက်ခိုက်သိမ်းပိုက်နိုင်ခဲ့သည်။

“၁၀၂၇ စစ်ဆင်ရေး” တစ်နှစ်ကျော်ကာလအတွင်း သျှမ်းပြည်မြောက်ပိုင်းက မြို့ပေါင်း ၂၄ မြို့နှင့် ရာနှင့်ချီရှိ တပ်စခန်းများစွာကို စစ်ကောင်စီက လက်လွှတ်လိုက်ရသည်။

ထိုသို့ ကျားဖြန့်နှိမ်နင်းမှုများ ငြိမ်သက်သွားပြီး တစ်နှစ်အကြာ ထိုင်း-မြန်မာနယ်စပ် မြဝတီမြို့နယ်တွင် ကျားဖြန့်နှိမ်နင်းမှုများ ပြန်လည်လှုပ်ရှားအသက်ဝင်လာသည်။

ပြီးခဲ့သည့် ဇန်နဝါရီလဆန်းပိုင်းက တရုတ် ရုပ်ရှင်မင်းသားဝမ်ရှင်း ထိုင်းနယ်စပ်မှ တစ်ဖက်ကမ်းရှိ မြဝတီသို့ လူကုန်ကူးခံရသည့် သတင်းထွက်ပေါ်လာပြီးနောက်ပိုင်း ထိုင်း-မြန်မာနယ်စပ် လူကုန်ကူးမှုနှင့် အွန်လိုင်းငွေလိမ်ဂိုဏ်များ၏ ရာဇဝတ်မှုသတင်းများ ဆက်တိုက်ဆိုသလို ထွက်ပေါ်လာခဲ့သည်။

တရုတ်ကွန်မြူနစ်ပါတီ ဗဟိုကော်မတီ၊ နိုင်ငံခြားရေးကောင်မရှင် ညွှန်ကြားရေးမှူးလည်းဖြစ်၊ နိုင်ငံခြားရေး ဝန်ကြီးလည်းဖြစ်သည့် မစ္စတာ ဝမ်ယိကလည်း ထိုင်း-မြန်မာနယ်စပ်တလျောက် ဖြစ်ပွားနေသည့် အွန်လိုင်းလောင်ကစားနှင့် အွန်လိုင်းလိမ်လည်မှုများကို အာဆီယံနိုင်ငံများနှင့် ပူးပေါင်းပြီး နယ်စပ်ဖြတ်ကျော် နှိမ်နင်းသွားမည်ဟု ပြီးခဲ့သည့်ဇန်နဝါရီလက ပြောဆိုခဲ့သည်။

ထိုအခြေအနေတွင် စစ်ကောင်စီသည် ကျားဖြန့်တိုက်ဖျက်ရေးကို အမျိုးသားရေးတာဝန်အဖြစ်ခံယူကာ ပြတ်ပြတ်သားသား အရေးယူဆောင်ရွက်နေကြောင်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ဖေဖော်ဝါရီလ ၂၂ ရက်က ထိုင်းနိုင်ငံခြားရေးဝန်းကြီးနှင့် နေပြည်တော်၌ တွေ့ဆုံစဉ် ပြောသည်။

စစ်ကောင်စီသည် ထိုင်းစစ်တပ်နှင့် ပူးပေါင်းပြီး ကျားဖြန့်တိုက်ဖျက်ရေး၊ နှစ်နိုင်ငံ နယ်စပ်ဒေသ တည်ငြိမ်အေးချမ်းရေး၊ တရားဥပဒေစိုးမိုးရေး၊ သတင်းအချက်အလက်များ ဖလှယ်ရေး၊ တရားမဝင်ကုန်စည်စီးဆင်းမှုနှင့် အကြမ်းဖက်မှုတိုက်ဖျက်ရေး ကဏ္ဍပေါင်းစုံ ပူးပေါင်းဆောင်ရွက်သွားမည်ဟု ဆိုသည်။

တစ်ဖက်တွင် နယ်မြေချဲ့ထွင်ရေး တိုက်ပွဲဖော်ဆော်မှုများကြောင့် စစ်ကိုဆက်လက်ဆင်နွှဲရမည်ဖြစ်ကြောင်း ဖေဖော်ဝါရီလ ၂၁ ရက်က ကျင်းပသည့် ဗိုလ်သင်တန်းကျောင်း (ဗထူး) ဗိုလ်လောင်းသင်တန်းအမှတ်စဉ် (၁၂၈) သူရတပ်ခွဲသင်တန်းဆင်းပွဲ၌ ပြောသည်။

လက်နက်ကိုင်လမ်းစဉ် မစွန့်လွှတ်လိုသည့် တိုင်းရင်းသားလက်နက်ကိုင်အဖွဲ့များက NUG၊ CRPH၊ PDF များနှင့် ပေါင်းကာ ထိန်းချုပ်နယ်မြေချဲ့ထွင်ရေးအတွက် နိုင်ငံရေးအကြောင်းပြကာ လက်နက်ကိုင် တိုက်ခိုက်မှုများ ပြုလုပ်နေကြောင်း စစ်ကောင်စီခေါင်းဆောင် က ဆိုသည်။