သျှမ်းပြည် သိန္နီမြို့နယ်တွင် ကိုးကန့်တပ်ဖွဲ့ MNDAA က ယာဉ်မောင်းနှင်ခွင့် ယာယီကတ်ပြားများကို ပြုလုပ်ပေးပြီး ၎င်းတို့ သတ်မှတ်ထားသည့် နယ်မြေအတွင်းသာ အကျုံးဝင်ကြောင်း စုံစမ်းသိရသည်။

ဖေဖော်ဝါရီလ ၁၉ ရက်မှ စတင်ကာ သိန္နီမြို့အဝင်တွင် ကိုးကန့်တပ်ဖွဲ့ (MNDAA)က ၎င်းတို့ ပြုလုပ်ပေးသည့် ယာဉ်မောင်းနှင်ခွင့် ယာယီကတ်ပြားများကို စစ်ဆေးမှုများ ပြုလုပ်ခဲ့ပြီး ယာဉ်မောင်းနှင်ခွင့် ကတ်ပြားမရှိသော သူများကို သက်ဆိုင်ရာထံ ပြန်လည်ပြုလုပ်ခိုင်းကြောင်း လောက်ကိုင် – လားရှိုး ခရီးစဉ် ပြေးဆွဲသည့် ကားသမား တစ်ဦးက သျှမ်းသံတော်ဆင့်ကို ပြောသည်။

“ဘယ်နေ့ကနေ ဘယ်နေ့ထိ ဂိတ်လုပ်ပြီး စစ်ဆေးမယ်ဆိုတာ မသိရဘူး။ သူတို့ စစ်တဲ့ ကတ်ပြားက နှစ်မျိုး ရှိတယ်၊ တစ်မျိုးက ကားလိုင်စင်ပေါ့။ နောက်တစ်မျိုးက ကုန်တင်တဲ့ လိုင်စင် အခွန်လိုင်စင်လိုပေါ့။ သူတို့က အဲ့ကတ်ပြားတွေ မရှိတဲ့ ကားတွေကို စစ်မိရင်တော့ သွားလုပ်ခိုင်းတယ်။ အဲ့အခွန်စာရွက်တွေ ကလည်း ပိုက်ဆံပေးပြီးလုပ်ရတာ”ဟု လောက်ကိုင် – လားရှိုး ခရီးစဉ်ပြေးဆွဲသည့် ကားသမား တစ်ဦးက ပြောသည်။

ထိုယာဉ်မောင်းနှင်ခွင့် ယာယီကတ်ပြားများကို လက်ရှိတွင် သိန္နီမြို့ စည်ပင်ရုံးတွင် ကိုးကန့်တပ်ဖွဲ့ MNDAA က ပြုလုပ်ပေးနေပြီး မြန်မာငွေ ၈ သောင်းမှ ၁ သိန်း ကျပ်အထိ ပေး၍ လုပ်ယူနေရကြောင်း သိန္နီမြို့ ဒေသခံအမျိုးသမီး တစ်ဦးက ထပ်လောင်းပြောသည်။

“အရင်တုန်းကတော့ လဝက ရုံးမှာ လုပ်ပေးတာ။ စလုပ်တုန်းကတော့ ၁ သောင်းကျော်‌လောက်ပဲ။ အခုကတော့ စည်ပင်ရုံးမှာ ပြန်လုပ်ပေးနေတာ၊ သူတို့ ကိုးကန့်ရုံးရှိတယ် အဲ့မှာ လိုင်စင်လုပ်ပေးဖို့ ဖွင့်ထားတာ။ အဲ့လိုင်စင်ကတ် တွေက ၈ သောင်းကနေ ၁ သိန်း လောက်ထိ ပေးပြီး လုပ်နေရတာ အခုတော့”ဟု ၎င်းအမျိုးသမီးက ပြောသည်။

ထိုယာဉ်မောင်းနှင်ခွင့် ယာယီကတ်ပြားသည် ၆ လ သက်တမ်းရှိပြီး၊ သျှမ်းပြည် မြောင်ပိုင်းရှိ ကိုးကန့်တပ်ဖွဲ့ MNDAA နှင့် TNLA တအာင်း(ပလောင်) အမျိုးသားလွတ်မြောက်ရေးတပ်မတော် တို့ ထိန်းချုပ်သည့် နယ်မြေ အတွင်းသာ အကျုံးဝင်သော်လည်း ကားသမားများက ထိုကတ်ပြားများကို လုပ်နေရကြောင်း လောက်ကိုင် – လားရှိုး ခရီးစဉ်ပြေးဆွဲသည့် ကားသမားများထံမှ သိရသည်။

“ကျနော်တို့လည်း စားဝတ်နေရေး ရှိတော့ သူတို့ တောင်းသလောက် ပေးပြီးတော့ အဲ့ကတ်ကို လုပ်ရတာပေါ့ ဘယ်တက်နိုင်မှာလည်း။ ပိုက်ဆံမရှိလည်း ခဏ ချေးငှားပြီးတော့ လုပ်ရတာပေါ့။ အဲ့ကတ်မရှိရင် နောက်ကြရင် လိုင်းကားမပေးဆွဲတာ အဲ့လိုဖြစ်မှာ ကြောက်ရသေးတယ်။ ကုန်တင်တာလည်း ဆီဈေးကမြင့်တော့ အရင်လို သိပ်မရဘူး။ တခြားအလုပ် လုပ်ဖို့လည်း မရှိဘူးလေ”ဟု လောက်ကိုင် – လားရှိုး ခရီးစဉ်ပြေးဆွဲသည့် ၎င်းကားသမား က ပြောသည်။

ယမန်နှစ် ၂၀၂၄ နှစ်ကုန်ပိုင်းမှ စတင်ပြီး လားရှိုးမြို့ အဝင်အထွက်ဂိတ်များတွင် MNDAA ထံ ဘီးလှိမ့်ခွန်အဖြစ် ယာဉ်တစ်စီးလျှင် ကျပ်ငွေ ၁၀၀၀ ပေးဆောင်ရပြီး ကုန်တင်ကားများအတွက် သယ်ဆောင်လာသည့် ကုန်ပမာဏပေါ် မူတည်ကာ အခွန်အဖြစ် (၁%) ကောက်ခံကြောင်းသိရသည်။

အလားတူ ပြီးခဲ့သည့် ဇန်နဝါရီလတွင် ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ပေါ်တွင် လိုင်စင်ရှိ၊ လိုင်စင်မဲ့ ကားနှင့် ဆိုင်ကယ်များအားလုံးကို ယာဉ်မောင်းနှင်ခွင့် ယာယီကတ်ပြားများ ပြုလုပ်ပေးခဲ့သည်။