သျှမ်းပြည် လားရှိုးမြို့နယ် မိုင်းယော်ကျေးရွာအုပ်စုတွင် ကိုးကန့်တပ်သားနှစ်ဦးသည် အရွယ်မရောက်သေးသည့် မိန်းကလေးငယ်ကို အပြိုင်လိုက်ကြိုက်ရာမှ အချင်းချင်း ပစ်သတ်ခဲ့၍ တစ်ဦးသေဆုံးသွားပြီး စွပ်စွဲခံရသည့် မိန်းကလေးကို MNDAA က ဖမ်းဆီးထားကြောင်း စုံစမ်းသိရသည်။

ဖြစ်စဉ်မှာ ဖေဖော်ဝါရီ (၇) ရက် နံနက် (၆) နာရီကျော်တွင် လားရှိုးမြို့နယ် မိုင်းယော်တိုက်နယ်ရှိ လုံမွန်းကျေးရွာ ဘုန်းကြီးကျောင်းတွင် တပ်စွဲထားသည့် ကိုးကန့်တပ်သား နှစ်ဦးသည် အရွယ်မရောက်သေးသည့် မိန်းကလေးငယ်ကို အပြိုင်လိုက်ကြိုက်သည့် ကိစ္စကြောင့် ရန်ဖြစ်ကြပြီး အချင်းချင်း သေနတ်ပစ်သတ်ခဲ့ရာ တစ်ဦးသေဆုံးသွားခဲ့သည်။

၎င်းတစ်ရက်တည်းတွင် နေ့လယ်ခင်း (၂) နာရီခန့်၌ မိုင်းယော်တိုက်နယ်ရှိ နားပင်းကျေးရွာ ရှင်လောင်းပွဲသို့ ကိုးကန့်တပ်သားများ ရောက်ရှိလာပြီး အသက် (၁၅) နှစ်အရွယ်ရှိ မိန်းကလေးတစ်ဦးကို သမီးရည်းစားကိစ္စဖြင့် အချင်းချင်း ပြန်ပစ်သတ်ခဲ့သည့် ကိုးကန့်တပ်သားများနှင့် ဆက်စပ်သည်ဟု စွပ်စွဲကာ ဖမ်းဆီးသွားခဲ့ကြောင်း ဒေသခံများက ပြောသည်။

“မိုင်းယော်ဘက် လုံမွန်းဘုန်းကြီးကျောင်းမှာ ကိုးကန့်စစ်သား ၂ ယောက်က ကောင်မလေး တစ်ယောက်တည်းကို ကြိုက်မိတော့ သဝန်တိုပြီး အချင်းချင်း ပစ်သတ်ကြတာ။ နေ့လယ်ပိုင်းကျတော့ နားပင်းရွာ ရှင်လောင်းပွဲမှာ စစ်သားနှစ်ယောက် ကြိုက်နေတဲ့ ကောင်မလေးကို ကိုးကန့်စစ်သားတွေက ပွဲခင်းထဲထိ ဝင်ဖမ်းသွားတယ်။ အခုထိ ပြန်မလွှတ်သေးဘူး”ဟု ဖြစ်စဉ်သိရှိသူ လားရှိုးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

မိုင်းယော်တိုက်နယ် လုံမွန်းရွာ ဘုန်းကြီးကျောင်းတွင် MNDAA ဖမ်းဆီးခံထားရသည့် မိန်းကလေးမှာ အသက် (၁၅) နှစ်အရွယ်ရှိ နန်းယိင်းဟွမ် ဖြစ်ပြီး မိုင်းယော်ရှိ ဖုန်းဆိုင်တစ်ဆိုင်တွင် အလုပ်လုပ်နေသူဖြစ်ကြောင်း သိရသည်။

နားပင်းရွာ ရှင်ပြုပွဲအကြို သွားရောက်နေသည့် ၎င်းမိန်းကလေးကို ကိုးကန့်တပ်သားများမှ ဝင်ရောက်ဖမ်းဆီးခဲ့စဉ် ဖခင်နှင့် အခြားမိန်းကလေးတစ်ဦးလည်း အတူရှိနေပြီး လိုက်သွားရန် ပြောဆိုခဲ့သော်လည်း ခွင့်မပြုကြောင်း မိသားစုနှင့် နီးစပ်သူများက ပြောဆိုသည်။

ရပ်မိရပ်ဖနှင့် ရွာလူကြီးများမှ ဖေဖော်ဝါရီ (၈) ရက်တွင် ကိုးကန့်တပ်ဖွဲ့ စခန်းချနေရာသို့ သွားရောက်၍ ဖမ်းဆီးခံထားရသည့် မိန်းကလေးကို ပြန်လွှတ်ပေးရန် တောင်းဆိုခဲ့သော်လည်း ၎င်းတို့ကိုးကန့်တပ်သား အချင်းချင်း ပစ်သတ်သည့် ဖြစ်စဉ်နှင့် ဆက်စပ်နေ၍ အထက်လူကြီးမှ အကြောင်းပြန်ကြားခြင်း မရှိသေးကြောင်း ပြောဆိုခဲ့သည်ဟု ဒေသခံများထံမှ သိရသည်။

“ကောင်မလေးရဲ့ အမေ ပြောတာတော့ သူ့သမီးက မိုင်းယော်မှာရှိတဲ့ ဖုန်းဆိုင်မှာ အလုပ်လုပ်နေတာ။ အဲ့စစ်သား ၂ ယောက်ကလည်း သွားသွားလာလာနဲ့ ကောင်မလေးကို စနှောက်တာမျိုး လုပ်တယ်။ စစ်သားတစ်ယောက်ယောက်နဲ့ ပြန်ကြိုက်တာ၊ ချိန်းတွေ့ပြီး စကားပြောတာမျိုးလည်း မရှိဘူး မလုပ်ရဘူးလို့ ပြောတယ်”ဟု မိသားစုနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

ထို့အပြင် မိသားစုဝင်များမှ လားရှိုးမြို့ရှိ MNDAA ဆက်ဆံရေးရုံးသို့ သွားရောက်ကာ အသက်မပြည့်သေးသည့် ၎င်းတို့သမီးကို ပြန်လွှတ်ပေးရန် တောင်းဆိုခဲ့သော်လည်း နှစ်ပတ်ကျော် ကြာသည်အထိ ပြန်မလွှတ်သေးကြောင်း သိရသည်။

အသက်မပြည့်သေးသည့် မိန်းကလေးတစ်ဦးကို သမီးရည်းစားကိစ္စ အကြောင်းပြကာ MNDAA တပ်စခန်းတွင် ဥပဒေမဲ့ ထိန်းသိမ်းခံထားရခြင်းကြောင့် ၎င်းအတွက် ကျန်းမာရေး၊ လုံခြုံရေး အဘက်ဘက်က စိုးရိမ်ရပြီး ချွင်းချက်မရှိ အမြန်ဆုံး ပြန်လွှတ်ပေးစေလိုကြောင်း မိသားစုနှင့် နီးစပ်သူများက ပြောဆိုသည်။

ယမန်နှစ် ဒီဇင်ဘာလအတွင်း ပန်ဆိုင်းမြို့တွင် အသက် (၃)နှစ်အရွယ်ခန့် ကလေးကို မုဒိမ်းပြုကျင့်ခဲ့သည့် ကိုးကန့်တပ်အရာရှိတစ်ဦးကို MNDAA မှ ဇန်နဝါရီ တတိယပတ်အတွင်း ထောင်ဒဏ် တစ်သက်တစ်ကျွန်းနှင့် ငွေဒဏ် ချမှတ်လိုက်ကြောင်း ဒေသခံများထံမှ သိရသည်။

လားရှိုးမြို့နယ် မိုင်းယော်တိုက်နယ်အတွင်း ကိုးကန့်တပ် MNDAA အပြင် တအာင်း(ပလောင်)တပ်ဖွဲ့ TNLA နှင့် ‘ဝ’တပ်ဖွဲ့ UWSA တို့လည်း သွားလာလှုပ်ရှားနေသည်။