ထိုင်းနိုင်ငံ ချင်းမိုင်မြို့အတွင်း ရွှေ့ပြောင်းအလုပ်သမားများ ဖွင့်လှစ်ထားသည့် စားသောက်ဆိုင်၊ ကာရာအိုကေဆိုင်များကို ထိုင်းရဲတပ်ဖွဲ့မှ ဝင်ရောက်စစ်ဆေး ဖမ်းဆီးမှုများ ပြုလုပ်ခဲ့ရာ ၈ ဦး ဖမ်းဆီးခံရကြောင်း သတင်းသိရသည်။

ချင်းမိုင်မြို့တွင် ရွှေ့ပြောင်းအလုပ်သမားများမှ ဖွင့်လှစ်ထားသည့် စားသောက်ဆိုင်နှင့် တွဲဖွင့်ထားသော ကာရာအိုကေ ဆိုင်တစ်ခုကို ထိုင်းရဲတပ်ဖွဲ့က ပြီးခဲ့သည့် ဖေဖော်ဝါရီလ ၁၈ ရက် ညအချိန်တွင် ဝင်ရောက်စစ်‌ဆေးခဲ့ရာ အလုပ်ရှင် ၂ ဦး နှင့် ရွှေ့ပြောင်း အလုပ်သမား ၆ ဦး ဖမ်းဆီးခံခဲ့‌ရကြောင်း အသက် (၄၀) ဝန်းကျင် ရွှေ့ပြောင်းအလုပ်သမားတစ်ဦးက သျှမ်းသံတော်ဆင့်ကို ပြောသည်။

“အဲ့ဆိုင်ကို ဝင်စစ်တော့ ဆိုင်ရှင် ၂ ယောက်နဲ့ ရွှေ့ပြောင်းအလုပ်သမား ၆ ယောက် ဖမ်းခံရတာ၊ ၅ ယောက် အထောက်အထား ရှိတယ်။ အလုပ်လုပ်တဲ့ကတ် (Work Permit) မှာ ဘယ်လို ပြဿနာရှိလဲ မသိဘူး၊ အဲ့တာ ဖမ်းသွားတာ။ နောက်တစ်ယောက်ကတော့ အထောက်အထား လုံးဝ ကို မရှိတာ။ ဖြေရှင်းလို့ အဆင်မပြေရင်တော့ ဆိုင်ပိတ်ခံရဖို့ များတယ်”ဟု ၎င်းရွှေ့ပြောင်း အလုပ်သမားက ပြောသည်။

ဖေဖော်ဝါရီလ ၁၈ ရက် ညပိုင်းတွင် ချင်းမိုင်မြို့တွင်းရှိ အခြားသော ကာရာအိုကေ ဆိုင်များကိုလည်း ထိုင်းရဲများက ဝင်ရောက်စစ်ဆေးခဲ့ကြောင်း သိရသည်။

လက်ရှိတွင် ချင်းမိုင်မြို့အတွင်းရှိ ညဘား (ဘီယာ၊အရက်) စားသောက်ဆိုင်များကို ထိုင်းရဲများက နေ့စဉ်နှင့်အမျှ ရှောင်တခင် ဝင်ရောက်စစ်ဆေးမှု ပြုလုပ်နေပြီး၊ လာရောက်စားသုံးသူများကိုပါ အထောက်အထားများ စစ်ဆေးနေကြောင်း ကိုယ်တိုင်ကြုံတွေ့နေရသည့် ရွှေ့ပြောင်းအလုပ်သမား လူငယ်တစ်ဉီးက သျှမ်းသံတော်ဆင့်ကို ပြောသည်။

“ဆိုင်မှာ ဘီယာ ထိုင်သောက်တာတောင် စစ်ဆေးခံရတယ်။ အဓိက အထောက်အထားတွေ စစ်တယ်။ သွားလေရာမှာ အထောက်အထားတွေ ပါဖို့ပါပဲ။ လူစုလူဝေး မလုပ်ဖို့လည်း လိုအပ်တယ်။ အခုတော့ ဆိုင်ထိုင်ရမှာ ကြောက်နေရတယ်”ဟု ၎င်းလူငယ်က ဆိုသည်။

ထို့ပြင် မြန်မာစားသောက်ဆိုင်များ၊ မြန်မာစားသုံးကုန် ပစ္စည်းများ ရောင်းချသည့် ဆိုင်များလည်း သတိထားရန် လိုအပ်ကြောင်း၊ ယမန်နေ့တွင်လည်း ထိုင်းနိုင်ငံ စူရတ်ဌာနီခရိုင် အတွင်း ရောင်းချနေသည့် မြန်မာစားသောက်ကုန်ဆိုင် တစ်ဆိုင်သည် FDA (ဆေးဝါးထောက်ခံချက်) မရှိမှုကြောင့် ဖမ်းဆီးခံခဲ့ရကြောင်း သိရသည်။

“တကယ်တော့ တရုတ်ကျားဖြန့် ကိစ္စကနေ ဖြစ်လာတဲ့ အကျိုးဆက်ပါ။ ဒီတစ်ခါက မဲဆောက်နဲ့ ချင်းမိုင်ကို ဦးတည်ပြီး စစ်ဆေးဖမ်းဆီးတာ။ ကျနော်တို့ မြန်မာတွေက ကြားညှပ်တဲ့သဘော ဖြစ်သွားတယ်။ ဒီကာလမှာတော့ အနေအထိုင် အသွားအလာ ဆင်ခြေဖို့ လိုအပ်တယ်” ဟု ထိုင်းနိုင်ငံအတွင်း ရွှေ့ပြောင်း အလုပ်သမားအရေး ဆောင်ရွက်နေသူ တစ်ဉီးက သုံးသပ်ပြောကြားသည်။

ဆက်လက်ပြီး ယမန်နေ့ (ဖေဖော်ဝါရီလ ၂၀ ရက်)တွင်လည်း ချင်းမိုင်မြို့ရှိ အိမ်ယာအတွင်း နေအိမ်များကို ထိုင်းရဲတပ်ဖွဲ့က ဝင်ရောက်စစ်ဆေးခဲ့ရာ အထောက်အထားမဲ့ ‌ရွှေ့ပြောင်းအလုပ်သမား ၈ ဦးဖမ်းဆီးခံရပြီး ၎င်းတို့အထဲမှ ၆ ဦးကို မူးယစ်ဆေးဝါးနှင့် အတူ ဖမ်းဆီးရမိခဲ့ကြောင်း ချင်းမိုင်လူဝင်မှုကြီးကြပ်ရေးဌာနမှ ထုတ်ပြန်သည်။

ယခုရက်ပိုင်းတွင် ထိုင်းနိုင်ငံတဝှမ်း စစ်ဆေးမှုတင်းကြပ်နေသည့်အတွက် မြန်မာရွှေ့ပြောင်း အလုပ်သမားများကို အထောက်အထားရရှိရန် ကူညီ ဆောက်ရွက်ပေးသည့် ရုံးများ၊ စားသောက်ဆိုင်များ၊ ကာရာအိုကေဆိုင်များအပြင် နေအိမ်ထဲအထိ ဝင်ရောက်စစ်ဆေးမှုများ ပြုလုပ်ခံနေရခြင်းကြောင့် ထိုင်းနိုင်ငံရောက် မြန်မာပြည်သူများ အနေဖြင့် အသွားအလာ သတိရှိကြရန် လိုအပ်‌ပါသည်။

ထိုင်းနိုင်ငံတဝှမ်းရှိ ရဲတပ်ဖွဲ့ဝင်များအနေဖြင့် သက်ဆိုင်ရာ တရားစီရင်ပိုင်ခွင့် အတွင်းမှ နေ၍ နိုင်ငံခြားသားများ၏ အပြုအမူများကို စောင့်ကြည့် ကြပ်မတ်ရန် ထိုင်းရဲချုပ် Kitrat Panphet က ဖေဖော်ဝါရီ ၁၇ ရက်တွင် အရေးပေါ် အမိန့် ထုတ်ပြန်ခဲ့သည်။

ထို့ကြောင့် မြန်မာရွှေ့ပြောင်း အလုပ်သမားကတ် ကိုင်ဆောင်ထားသူများသည် နယ်မြေကျော်လွန်ပြီး ခရီးမသွားသင့်ကြောင်း၊ ခရီးသွားမည်ဆိုလျှင် သက်ဆိုင်ရာ နယ်မြေ အာဏာပိုင်များ၏ ခရီးသွားထောက်ခံချက်များ ရယူရန်၊ အိမ်ပြင်သို့ ထွက်လျှင်လည်း အထောက်အထားများကို တပါတည်း ယူဆောင်သွားရန်နှင့် ဆိုင်ကယ်မောင်းလျှင်လည်း ဦးထုပ်ဆောင်ရန် ယာဉ်မောင်းလိုင်စင် ပါရှိရန် လိုအပ်သည်။