သျှမ်းပြည် သီပေါမြို့နယ် ကုံးစုံရွာတွင် နေအိမ်အတွင်း ပေါက်ကွဲမှုဖြစ်ပြီး အရပ်သား (၂) ဦး သေဆုံးကာ မိသားစုဝင် (၄) ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယနေ့ (ဖေဖော်ဝါရီ ၂၁ ရက်) နံနက် ၈ နာရီခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် သီပေါမြို့နယ် ကုံးစုံရွာတွင် နေအိမ်ထဲ ပေါက်ကွဲမှု ဖြစ်ပွားခဲ့ရာ အမျိုးသမီးတစ်ဦး အပါအဝင် (၂) ဦး သေဆုံးပြီး မိသားစုဝင် (၃) ဦးနှင့် ကလေး တစ်ဦး ဒဏ်ရာပြင်းထန်ကြောင်း ဒေသခံများက ပြောသည်။
“နမ့်မော်လုံဘက် နေအိမ်ထဲ ပေါက်ကွဲမှုဖြစ်တာ၊ အိမ်သားအကုန်ထိတယ်။ ယောကျ်ားတစ်ယောက်၊ မိန်းမတစ်ယောက် ဆုံးတယ်။ ကလေးနဲ့ တခြားထိတဲ့လူကြီးတွေကို ဆေးခန်းခေါ်သွားတုန်း၊ ကုံးစုံက လတိုင်းလိုလို ဗုံးထိနေတာ။ ရွာထဲ ”ဟု သီပေါမြို့နယ် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ကုံးစုံရွာရှိ နေအိမ်အတွင်း ဖြစ်ပွားခဲ့သည့် ပေါက်ကွဲမှုဖြစ်စဉ် အသေးစိတ်ကို သျှမ်းသံတော်ဆင့်မှ ဆက်လက်စုံစမ်းနေပြီး လက်ရှိတွင် ထိခိုက်ဒဏ်ရာရသည့် ကလေးငယ်ကို သီပေါမြို့နယ် နယ်စည်းမခြား ပရဟိတအဖွဲ့ ဆေးခန်းသို့ ပို့ဆောင်ပြီး ဆေးကုသမှု ခံယူနေကြောင်း သိရသည်။
အလားတူ ဇန်နဝါရီလ (၇) ရက်ကလည်း သီပေါမြို့နယ် စံဖိတ်ကျေးရွာတွင် အမျိုးသားတစ်ဦး မြတ်ရိတ်နေစဉ် မြေမြှုပ်မိုင်း နင်းမိပြီး ခြေထောက်တစ်ဖက် ပြတ်သွားကြောင်း ဒေသခံများထံမှ သိရသည်။
သီပေါမြို့နယ်ရှိ ကုံးစုံ၊ စံဖိတ်၊ မိုးတေ စသည့် ရွာများမှာ စစ်ကောင်စီတပ်နှင့် TNLA တိုက်ပွဲ ပြင်းထန်ခဲ့စဉ် ကျေးရွာအတွင်း နှစ်ဘက်တပ်သားများ နေရာယူ တပ်စွဲခဲ့ခြင်းကြောင့် မြေမြှုပ်မိုင်းများအပြင် မပေါက်ကွဲသေးသည့် လက်နက်ကြီးကျည်များလည်း ကျန်ရှိနေသေးကြောင်း ဆိုသည်။
TNLA သည် သီပေါမြို့ကို ၂၀၂၄ ခုနှစ် အောက်တိုဘာနှောင်းပိုင်းတွင် ထိန်းချုပ်နိုင်ခဲ့သော်လည်း လက်ရှိအချိန်ထိ မိုင်းရှင်းလင်းရေး လုပ်ဆောင်မှုမရှိသေးသလို တာဝန်ယူဖြေရှင်းမှု နည်းသေးကြောင်း ဒေသခံများက ပြောသည်။
Leave a Comments