သျှမ်းပြည်မြောက်ပိုင်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့တွင် စစ်ကောင်စီမှ ဂျက်ဖိုက်တာဖြင့် ထပ်မံဗုံးကြဲတိုက်ခိုက်မှုကြောင့် အမျိုးသမီး တစ်ဦး သေဆုံးပြီး ကလေးငယ်အပါအဝင် ၄ ဦးဒဏ်ရာရရှိကြောင်း သတင်းရရှိသည်။

ယမန်နေ့ (ဖေဖော်ဝါရီ ၂၀ ရက်) ည ၉ နာရီဝန်းကျင်အချိန်တွင် နောင်ချိုမြို့ရှိ လောက်ဖန်းကျေးရွာကို စစ်ကောင်စီမှ ဂျက်ဖိုက်တာဖြင့် ထပ်မံဗုံးကြဲတိုက်ခိုက်ရာတွင် ဒေသခံ အသက်ကြီးသည့်အမျိုးသမီး တစ်ဉီး သဆုံးသွားပြီး၊ ကလေးငယ်အပါအဝင် ၄ ဦး ဒဏ်ရာရရှိနေကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မနေ့ညက ၈ နာရီကျော် ၉ နာရီဝန်းကျင်မှာ စစ်တပ်က ဂျက်ဖိုက်တာနဲ့ ၂ကြိမ် ထပ်မံလာကြဲတယ်။ လောက်ဖန်းရွာမှာ ချသွားတာ။ ဒေသခံ အဖွားတော့ သေသွားတယ် ဒဏ်ရာပြင်းထန်တော့ ကလေးလည်းအပါအဝင် ၄ ဦးဒဏ်ရာရထားတယ်” ဟု ၎င်းက ပြောသည်။

ထို့အပြင် ပြီးခဲ့သည့် (ဖေဖော်ဝါရီ ၁၉ ရက်) နေ့ ညနေ(၈)နာရီကျော်အချိန်တွင် တိုက်ပွဲဖြစ်ပွား ဖြစ်ပွားခြင်းမရှိဘဲ လေကြောင်းဖြင့် တိုက်ခိုက်သောကြောင့် နောင်ချိုမြို့ ဘူတာရပ်ကွက်နှင့် ပြည်သူ့ဆေးရုံပေါ် ဗုံးကျရောက် ပေါက်ကွဲခဲ့ပြီး ဒေသခံ (၃)ဦး သေဆုံးပြီး (၄)ဦး ထိခိုက်ဒဏ်ရာ ရရှိခဲ့သည်ဟု TNLAမှ ထုတ်ပြန်ထားသည်။

စစ်ကောင်စီနှင့် တအာင်း(ပလောင်)အမျိုးသားတပ်မတော် (TNLA)တို့ ဆွေးနွေးမှု မအောင်မြင်မှုကြောင့် စစ်ကောင်စီမှ နောင်ချိုကို ဂျက်ဖိုက်တာဖြင့် ၂ ရက် ဆက်တိုက် ဗုံးကြဲတိုက်ခိုက်ခဲ့ရာ စုစုပေါင်း ၄ ဦးသေဆုံးပြီး ၈ ဦးဒဏ်ရာရရှိသွားကြောင်း သိရသည်။

TNLA နှင့် စစ်ကောင်စီတို့ကြား ဆွေးနွေးပွဲတွင် နှစ်ဖက်အပြန်အလှန်တောင်းဆိုမှုများပြုလုပ်ခဲ့ပြီး ဆွေးနွေးညှိနိူင်းရန်ခက်ခဲသောကြောင့် ဖေဖော်ဝါရီလ (၁၇)ရက် ညနေပိုင်းတွင် တွေ့ဆုံပွဲ ရပ်ဆိုင်းခဲ့ရသည်။

စစ်ကောင်စီနှင့် TNLAတို့သည့် “၁၀၂၇ စစ်ဆင်ရေး” နောက်ပိုင်း ၂၀၁၄ခုနစ် အောက်တိုဘာလမှစတင်ကာ ထိတွေ့တိုက်ပွဲမဖြစ်ပွားခဲ့ဘဲ စစ်ကောင်စီဘက်မှ တဖက်သတ် လက်နက်ကြီးလက်နက်ငယ်နှင့် လေကြောင်းထိုစစ်ဆင်မှုသာ ရှိခဲ့သည်။