ထိုင်းနိုင်ငံ ချင်းမိုင်မြို့ အတွင်း ထိုင်းရဲတပ်ဖွဲ့များက ယခုရက်ပိုင်း နေအိမ်ထဲထိ ဝင်ရောက်စစ်ဆေးမှုရှိသကဲ့သို့ ရဲကင်းစောင့်များတွင်လည်း စစ်ဆေးမှု ပိုတင်းကြပ်လာကြောင်း စုံစမ်းသိရသည်။

ချင်းမိုင်မြို့အတွင်း ယခုရက်တစ်ပတ် ညအချိန်များတွင် ထိုင်းရဲ့တပ်ဖွဲ့များက ယခင်ထပ်ပို၍ စစ်ဆေးတင်း ကြပ်မှုများ ပြုလုပ်လာပြီး ရွှေ့ပြောင်းအလုပ်သမားများ သတိထားသွားလာရန် လိုအပ်ကြောင်း ရွှေ့ပြောင်း အလုပ်သမားကတ်ရရှိရေး ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူတို့ကတော့ ဒီရက်ပိုင်းမှာ စစ်ဆေးကြမ်းတယ်လို့ ပြောလို့ရတယ်။အိမ်တွေ တိုက်ခန်းတွေဝင်စစ်တာမျိုးတွေ ကလည်းရှိတယ်။ညစစ်ဆေးမှုတွေက ၁၀ နာရီ ကနေ စ စစ်တာာမျိုးတော့နည်းပေမဲ့ သတင်းရထားတာမျိုးရှိရင် လည်း စောစောစစ်တာမျိုးတွေလုပ်တယ်။သူတို့ ဒီလိုစစ်ဆေးမှုတွေကလည်း နေရာတိုးလာတာမျိုးတွေ ရှိတယ်” ဟု အလုပ်သမားကတ်ရရှိရေး ကူညီပေးနေသည့် အမျိုးသားတစ်ဦးက ပြောသည်။

ထိုအပြင်ယခင်တွင် ယာဉ်မောင်းလိုင်စင်၊ဆိုင်းကယ်ဦးထုပ် နှင့် မူးယစ်ဆေး စစ်ဆေးမှုများသာ အဓိကထား စစ်ဆေးသော်လည်း ယခုတွင် အထောက်အထား နှင့် အလုပ်လုပ်ခွင့် (Work Permit) တို့ကို အသေးစိတ်ထား စစ်ဆေးမှုများလည်းရှိလာကြောင်း ရွှေ့ပြောင်း အလုပ်သမားကတ်ရရှိရေး ကူညီပေးနေသည့် အမျိုးသား တစ်ဦးက ဆက်ဆိုသည်။

“အရင်က ညဆိုရင် အရက်သောက်သုံးတာ နဲ့ ယာဉ်မောင်းလိုင်စင်ကိုပဲစစ်တယ်။အခုတော့ အထက်အမိန့် ဆိုပြီးတော့ သူတို့က (Passport) ဒီနိုင်ငံကူး လက်မှတ်ထဲက visa က ဘာအလုပ်လုပ်လဲ။ အလုပ်တကယ်လုပ် မလုပ် ဆိုတာမျိုးတွေ အစ စစ်တာပေါ့။ ပြီးတော့ ကျောင်းသားလား၊အလည်းလာတာလား အကုန်စစ်တာတယ်။ အရင်နှစ်တွေမှာက ဒီလောက်အခြေအနေမဆိုးဘူး။”ဟု အလုပ်သမားကတ်ရရှိရေး ကူညီပေးနေသည့် အမျိုးသားတစ်ဦးက ပြောသည်။

ထိုင်းနိုင်ငံရောက် မြန်မာရွှေ့ပြောင်းအလုပ်သမားများကိုင်ဆောင်ထားသည့် အလုပ်လုပ်ကိုင်ခွင့် သက်တမ်းသည် ဖေဖော်ဝါရီ ၁၃ရက်တွင် ကုန်ဆုံးခဲ့သော်လည်း ထိုင်းအစိုးရအနေဖြင့် သြဂုတ်လအထိ ဆက်လက်နေထိုင်ခွင့် ပြုထားသည်။

ထို့ကြောင့် မြန်မာရွှေ့ပြောင်းအလုပ်သမားကတ်ကိုင်ဆောင်ထားသောသူများသည် နယ်မြေကျော်လွန်ပြီး ခရီးမသွားသင့်ကြောင်း၊ ခရီးသွားမည်ဆိုလျှင် သက်ဆိုင်ရာ နယ်မြေ အာဏာပိုင်များ၏ ခရီးသွားထောက်ခံချက်များယူရန်၊ အိမ်ပြင်သို့ထွက်လျှင်လည်း အထောက်အထားများကို တပါးတည်း ယူဆောင်သွားရန် နှင့် ဆိုင်ကယ်မောင်းလျှင်လည်း ဦးထုပ်ဆောင်ရန် ယာဉ်မောင်းလိုင်စင်လုပ်ရန် လိုအပ်သည်။

ထိုင်နိုင်ငံတဝန်းရှိ ရဲတပ်ဖွဲ့ဝင်များအနေဖြင့် သက်ဆိုင်ရာ တရားစီရင်ပိုင်ခွင့်အတွင်းမှနေ၍ နိုင်ငံခြားသားများ၏ အပြုအမူများကို စောင့်ကြည့် ကြပ်မတ်ရန် ထိုင်းရဲချုပ် Kitrat Panphet က ဖေဖော်ဝါရီ ၁၇ ရက်တွင် အရေးပေါ် အမိန့် ထုတ်ပြန်ခဲ့သည်။

ထိုအမိန့်ထုတ်ပြန်ပြီးနောက် ထိုင်းနိုင်ငံတဝှမ်းနည်းတူ ချင်းမိုင်ရဲတပ်ဖွဲ့သည်လည်း လုံခြုံရေးအရ ရပ်ကွက်ထဲသို့ ဝင်ရောက် ကင်းလှည့်ခြင်း၊ နေအိမ်အတွင်းသို့ ဝင်ရောက်စစ်ဆေးမှုပြုလုပ်ခြင်း၊ ဈေး နှင့် ဆိုင်ခန်းများတွင် ဈေးရောင်းနေသည့် အလုပ်သမားဝင်ထမ်းများ၊ ဆိုင်ရှင်များ ကိုလည်း စစ်ဆေးမှုများပြုလုပ်နေပြီး ကိုယ်တိုင်မြင်တွေ့သည့် မြန်မာရွှေ့ပြောင်းအလုပ်သမား တစ်ဉီးက သျှမ်းသံတော်ဆင့်ကို ပြောသည်။

” ဒီရက်ပိုင်း ထိုင်းရဲတွေ အိမ်ထဲဝင်စစ်တာ၊သူတို့မသင်္ကာတဲ့အိမ်ကို ဝင်စစ်တာ၊နောက်လမ်းတွေမှာ ရဲတွေ အရင်က ထပ်စောင့်ပြီး မသင်္ကာရင်စစ်တာတွေရှိလာတယ်။ သတိထားသွားလာဖို့ နေထိုင်ဖို့လိုတယ်” ဟု မြန်မာရွှေ့ပြောင်းအလုပ်သမားက ဆိုသည်။

ယခုကဲ့သို့ ထိုင်းရဲတပ်ဖွဲ့များ စစ်ဆေးတင်းကြပ်မှုများပြုလုပ်နေစဉ် မိမိကိုင်‌ဆောင်ထားသည့် နိုင်ငံကူပြောင်း လက်မှတ်(Passport)၊ ပန်းရောင်ကတ် (Pink Card) နှင့် အလုပ်လုပ်ခွင့် (Work Permit)တို့ကို တပ်ကြပ်မကွာကိုယ်နှင့် ဆောင်ထားရန် လိုအပ်‌ကြောင်း ရွှေ့ပြောင်းအလုပ်သမား အရေးဆောင်ရွက်သူများ ကပြောသည်။