သျှမ်းပြည်မြောက်ပိုင်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသော နမ့်ခမ်းမြို့ သို့ နေရပ်မပြန်လာသော စစ်ဘေးရှောင်များ၏နေအိမ်များကို ပြန်လည်ငှားရမ်းပြီး၊ ရရှိလာသော ငွေများကို TNLA က ပြန်လည်ထူထောင်ရေးတွင် အသုံးပြုမည်ဟု စုံစမ်းသိရသည်။

ပြီးခဲ့သည့် (ဇန်နဝါရီ ၇ ရက်)နေ့တွင် TNLA ၏ စစ်သားစုဆောင်းရေးရုံးမှ အစည်းအဝေး ပြုလုပ်ချိန်တွင် အိမ်ငှားရမ်းရငွေများကို ပြန်လည်ထူထောင်ရေးတွင် သုံးသွားမည်ဖြစ်ကြောင်း အစည်းအဝေး တက်ရောက်ခဲ့သည့် ဒေသခံတစ်ဦးက သျှမ်းသံတော်ဆင့်ကို ပြောသည်။

အဆိုပါ TNLA ငှားရမ်းပေးသည့် နေရာတွင် တအာင်းလူမျိုးနေထိုင်သည့် ကျေးရွာနှင့် မြို့ပေါ်တွင်ရှိ တအာင်းလူမျိုး အနေထိုင်များသည့် ရပ်ကွက် များဖြစ်ပြီး တရုတ်လူမျိုးကို အများဆုံးငှားရမ်းပေးကြောင်း ၎င်းက ဆက်ပြောသည်။

” ငှားလို့ရတဲ့ ပိုက်ဆံက သူတို့ ပြန်လည်ထူထောင်ရေးမှာ အသုံးပြုဖို့ လုပ်တယ်ပြောတယ်။ အိမ်ရှင်ကိုတော့ မပေးဘူး။ တရုတ်ကို အများဆုံးငှားပေးတယ် ပြီးတော့ ဒေသခံ တရုတ်လည်း မဟုတ်ဘူး။ ခုဆိုရင် ကျားဖြန့်တွေလည်း အရမ်းများလာတယ် KTV လည်း ပိုများလာတယ်”ဟု ၎င်းက ပြောသည်။

၂၀၂၄ ခုနှစ် (ဇန်နဝါရီလ) နမ့်ခမ်းမြို့တွင် စစ်ကောင်စီမှ လေကြောင်းဖြင့် ဗုံးကြဲတိုက်ခိုက်ပြီးနောက်ပိုင်းတွင် ဒေသခံအများစု စစ်ရှောင်နေကြအချိန်တွင် ၎င်းနေအိမ်များကို TNLA မှ ပြန်ငှားရမ်းများ ပြုလုပ်လာခြင်းသည်(၁) နှစ် ကျော်ရှိလာပြီး ဖြစ်ကြောင်း စစ်ရှောင်အမျိုးသားတစ်ဦးက ပြောသည်။

ထို့ကြောင့် လူမနေသည့် နေအိမ်များသည် စစ်ဘေးရှောင်ကြသူများ၏နေအိမ်များ ဖြစ်ပြီး။ ယင်းနေအိမ်များကို ငှားရမ်းမည် ဆိုပါက ၁ နှစ်စာချုပ် (သို့မဟုတ်) ၆ လစာချုပ်တို့ဖြင့် ချုပ်ဆိုငှားရမ်းနိုင်ကြောင်း နေအိမ်အမျိုးအစားပေါ် မူတည်၍ ဈေးနှုန်း ကွာဟမှု ရှိနေကြောင်း ၎င်းက ဆက်ပြောသည်။

“တကယ်တမ်းကျတော့ အရင်နှစ်ကတည်းကပဲ ကျနော်တို့အိမ်ရှေ့ ဗုံးမကျခင် ဇန်နဝါရီလလောက်ကတည်းက TNLA က သူများတွေကို ငှားပေးတာ။ အရင်နှစ်လည်း သူတို့ပြောတယ် ပြန်လာမနေရင် သော့ချိတ်ပိတ်မယ် ပြောသေးတယ်။ တချို့ကလည်း ကြောက်လို့ ပြန်မလာရဲသေးတာ။ အချို့ဆို့ ငှားပြီး ဆိုင်ဖွင့်တာ ၁ နှစ်တောင်ကျော်လာပြီ”ဟု ၎င်းက ပြောသည်။

အချို့သော စစ်ဘေးရှောင်များဟာ ၎င်းတို့နေအိမ်ကို ပြန်လာနေရန် ပြောဆိုခဲ့သော်လည်း ထို့အိမ်တွင် ငှားထားသည့် ပြည်သူက ရှောင်ပေးခြင်းမရှိခြင်း၊ အထက်က ရုံးချုပ်ကို သွားရောက်ပြောဆိုခဲ့သော်လည်း မည်သူမှ တာဝန်ယူ ဆောင်ရွက်ပေးခြင်းမရှိကြောင်း ၎င်းက ဆက်ပြောသည်။

နမ့်ခမ်းမြို့ လူမနေသည့် အိမ်များကို ဒေသခံ မဟုတ်သည့် အခြားသောမြို့က တရုတ်လူမျိုးများကို လက်ခံ ငှားရမ်းပေးခြင်း၊ တရုတ်များ လာရောက်နေထိုင်ပြီးနောက်တွင် ကျားဖြန့်လုပ်ငန်းလုပ်ကိုင်သူလည်း များပြားစွာ ဝင်လာနေကြောင်း ဒေသခံက ပြောသည်။

နမ့်ခမ်းမြို့တွင် ကချင်ပြည်နယ် ဗန်းမော်မြို့မှ ထွက်ပြေးလာသသည့် စစ်ရှောင်ဦးရေ (၂၀၀ ) ထပ်မနည်းရောက်ရှိနေကြောင်း သိရသည်။