သျှမ်းပြည် ညောင်ရွှေမြို့နယ်တွင် ထွက်ပြေးတိမ်းရှောင်နေသည့် စစ်ဘေးရှောင် (၃၀၀)ဝန်းကျင်အတွက် စားနပ်ရိက္ခာများ အရေးပေါ် လိုအပ်နေကြောင်း စုံစမ်းသိရသည်။
သျှမ်း-ကရင်နီ နယ်စပ် တလျှောက်နှင့် ကရင်နီ (ကယား) ပြည်နယ်အတွင်း “ ၁၁.၁၁ စစ်ဆင်ရေး” ခေါင်းစဉ်ဖြင့် စစ်ကောင်စီတပ်နှင့် ကရင်နီတော်လှန်ရေး ပူးပေါင်းတပ်ဖွဲ့တို့အကြား တိုက်ပွဲပြင်းထန်စွာ ဖြစ်ပွားခဲ့ခြင်းကြောင့် ဒေသခံများစွာ နေရပ်စွန့်ပြီး ထွက်ပြေးတိမ်းရှောင်ရသည်။
ညောင်ရွှေမြို့ပေါ်ရှိ ဘုန်းကြီးကျောင်း၊ ဘုရားကျောင်းတို့တွင် လာရောက်တိမ်းရှောင်နေသည့် ကရင်နီစစ်ဘေးရှောင် ၃၀၀ ခန့်အတွက် စားနပ်ရိက္ခာများ အရေးပေါ် လိုအပ်နေကြောင်း စစ်ဘေးရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ကရင်နီက စစ်ဘေးရှောင်တွေအတွက် စားနပ်ရိက္ခာတွေက အရေးပေါ် လိုအပ်နေတဲ့ အခြေအနေ ရောက်နေတယ်။ ၃ လပိုင်းကုန် ထိတောင် မလောက်တော့ဘူး ခုက၊ တခြား အခက်အခဲတော့ ရှိတာပေါ့။ တစ်ရက်ကို ထမင်း ၂ နပ်ပဲ ကျွေးနိုင်တော့တယ်။ ဟင်း၂ ခွက် ထပ်လည်း မပိုတော့ဘူး။ အကုန်လုံးကတော့ စုပေါင်းပြီး စားနေတယ်”ဟု စစ်ဘေးရှောင် ကူညီနေသည့် အမျိုးသားတစ်ဉီးက ဆိုသည်။
ညောင်ရွှေမြို့သို့ ရောက်ရှိနေသော ကရင်နီ စစ်ဘေးရှောင်များကို လာမည့် ၂၀၂၅ မတ်လအတွင်း နေရပ်ပြန်ရန် မြို့နယ်အထွေထွေအုပ်ချုပ်ရေးရုံးမှ သတိပေး ပြောဆိုထားကြောင်း ၎င်း အမျိုးသားတစ်ဦးက ဆက်ပြောသည်။
“သူတို့တွေ ပြန်ခိုင်းမယ်ဆိုရင် ပြန်ရဖို့ လူဦးရေက ၈ ထောင် ဝန်းကျင်လောက်ရှိမယ်။ ၃ လပိုင်း အကုန်မှာတော့ နေရပ်ပြန်ဖို့ကို ရပ်ကွက်အုပ်ချုပ်ရေးမှူးတွေ ဆီကနေတဆင့် အကြောင်းကြားမယ် လို့တော့ ပြောလာတယ်။ တချို့ဆို တွေးရခက်ပြီး အိပ်မပျော်တာတောင် ဖြစ်ကုန်ပြီ။ ပြန်ဖို့ လမ်းစရိတ်တွေက အခက်အခဲ ဖြစ်တယ်လေ”ဟု ၎င်းက ပြောသည်။
လက်ရှိ ညောင်ရွှေမြို့နယ်အတွင်း စစ်ဘေးရှောင် တစ်သောင်း ဝန်းကျင်အထိ ကျန်ရှိနေပြီး ညောင်ရွှေမြို့၏ နန်းသဲ၊ ရွှေချမ်းသာ၊ ရွှေရည်ကျ၊ ဘုရားကျိန်း၊ ရန်ကုန်ကျောင်း စသည့် ဘုန်းကြီးကျောင်း၊ ဘုရားကျောင်းနှင့် ဆွေမျိုးအိမ်တို့တွင် နေထိုင်နေကြပြီး၊ စစ်ဘေးရှောင်စခန်း ၁၈ ခု ကျန်ရှိနေကြောင်း သိရသည်။
ညောင်ရွှေမြို့နယ် မှော်ဘီကျေးရွာရှိ စစ်ကောင်စီ စစ်ဆေးရေးဂိတ်သည် ပြီးခဲ့သည့် ၂၀၂၄ အောက်တိုဘာလမှ စ၍ ယခု ဖေဖော်ဝါရီ လလယ်အထိ (၅) လကျော်ကြာ ဆန်၊ ဆီနှင့် ဆေးဝါးတို့အပြင် အိမ်သုံး စက်သုံးဆီပုံးများကိုပါ သယ်ဆောင်ခွင့်မပြုခြင်းကြောင့် စားနပ်ရိက္ခာ ခက်ခဲနေကြောင်း သိရသည်။
Leave a Comments