တအာင်း(ပလောင်)အမျိုးသားလွတ်မြောက်ရေးတပ်မတော် TNLA သည် စစ်ကောင်စီနှင့် တွေ့ဆုံဆွေးနွေးရန် တရုတ်နိုင်ငံ ကူမင်းမြို့သို့ ယနေ့ (ဖေဖော်ဝါရီ ၁၅ ရက်)တွင် ရောက်ရှိနေကြောင်း သတင်းသိရသည်။

ဖေဖော်ဝါရီ (၁၆) ရက်မှ စတင်ပြီး TNLA နှင့် စစ်ကောင်စီတို့သည် တရုတ်နိုင်ငံ၏ ကြားဝင်စီစဉ်မှုဖြင့် လက်ရှိစစ်ရေး ပြဿနာများကို ပြေလည်နိုင်ရန် တွေ့ဆုံဆွေးနွေးမှုများ စတင်မည်ဖြစ်ကြောင်း TNLA သတင်းနှင့် ပြန်ကြားရေးဌာနမှ ယနေ့ နေ့လယ်ပိုင်းတွင် သတင်းထုတ်ပြန်လာသည်။

PSLF/TNLA ကိုယ်စားလှယ်အဖွဲ့တွင် ဒုဗိုလ်ချုပ်ကြီး တားဂျုတ်ဂျား၊ မဟာမိတ်ဆက်ဆံရေးဌာနမှူး ဗိုလ်မှူးကြီး တားမိုးဟိန်း အပါအဝင် ကိုယ်စားလှယ် (၉) ဦး တက်ရောက်မည်ဖြစ်ပြီး စစ်ကောင်စီဘက်မှ ကိုးကန့်တပ်ဖွဲ့ MNDAA ကို တွေ့ဆုံဆွေးနွေးခဲ့သူ ကစထ(၁) မှူး ဒုဗိုလ်ချုပ်ကြီး ကိုကိုဦးမှ ဦးဆောင်မည်ဖြစ်ကြောင်း TNLA ထုတ်ပြန်ချက်အရ သိရသည်။

“အခုက MNDAA တို့က စစ်ကောင်စီနဲ့ ဆွေးနွေးပြီး တပ်ဆုတ်မယ်လို့ ကြေညာပေမယ့်လည်း အခုချိန်ထိ သူတို့ဆုတ်သွားတဲ့ အနေအထားတော့ မတွေ့ရသေးဘူး။ နောက်ပြီးတော့ နောင်ချို၊ ကျောက်မဲ၊ သီပေါတွေမှာ တိုက်ပွဲတွေ ဆက်တိုက်ပြင်းထန်တာကလည်း TNLA က ကိုးကန့်ဆီက ထောက်ပံ့မှုတွေ မရဘူးဆိုရင် ဆက်လက်ရပ်တည်ဖို့ ခက်သွားလိမ့်မယ်”ဟု စစ်ရေးကျွမ်းကျင်သူတစ်ဦးက သျှမ်းသံတော်ဆင့်ကို ပြောသည်။

ယမန်နှစ် ၂၀၂၄ နိုဝင်ဘာလ (၂၅) ရက်တွင် TNLA မှ စစ်ဘေးဒဏ် ဆိုးရွားစွာ ခံစားနေရသည့် ပြညသူအကျိုးကို ငဲ့ညှာထောက်ထားမှု၊ နယ်စပ်တည်ငြိမ်ရေးနှင့် တိုက်ပွဲရပ်စဲရေးအတွက် ကြားဝင်ဆောင်ရွက်နေသည့် တရုတ်နိုင်ငံအစိုးရ၏ ကြိုးပမ်းမှုကို လေးစားအသိအမှတ်ပြု၍ စစ်ကောင်စီနှင့် နှစ်ဘက်စစ်ရေး ပဋိပက္ခများ အဆုံးသတ်နိုင်ရန် တွေ့ဆုံဆွေးနွေးမည်ဖြစ်ကြောင်း ထုတ်ပြန်ခဲ့သည်။

၎င်းတွေ့ဆုံဆွေးနွေးရန် ထုတ်ပြန်ပြီးနောက်တွင် TNLA ထိန်းချုပ်နယ်မြေအတွင်း လေကြောင်းတိုက်ခိုက်မှု လျော့နည်းသွားခဲ့သော်လည်း MNDAA နှင့် စစ်ကောင်စီတို့အကြား ဇန်နဝါရီ (၁၈) ရက်မှ စတင်ပြီး တရားဝင်အပစ်ရပ်နိုင်ခဲ့ပြီးနောက် နောင်ချို၊ ကျောက်မဲနှင့် မိုးကုတ်မြို့နယ်များကို စစ်ကောင်စီမှ လေကြောင်းဖြင့် တဖန်ပြန်လည် ထိုးစစ်ဆင်ကာ TNLA ကို ဖိအားပေးခဲ့သည်။

ဇန်နဝါရီ (၂၁) ရက်မှ (၂၇) ရက်အတွင်း စစ်ကောင်စီက နောင်ချိုနှင့် ကျောက်မဲမြို့တို့တွင် လေကြောင်းတိုက်ခိုက်မှုများ ပြုလုပ်ခဲ့ရာ လူစည်ကားသည့် လ္ဘက်ရည်ဆိုင်နှင့် ဆေးရုံတို့မှ အရပ်သား (၁၅) ဦး သေဆုံးပြီး (၃၂) ဦး ထိခိုက်ဒဏ်ရာရရှိခဲ့ကြောင်း ရှမ်းလူ့အခွင့်အရေးမဏ္ဍိုင်မှ ဖေဖော်ဝါရီ (၄) ရက်တွင် သတင်းထုတ်ပြန်ထားသည်။

အလားတူ TNLA ထိန်းချုပ် မိုးကုတ်မြို့တွင်လည်း ကျောက်တူးဖော်နေသည့် လုပ်ကွက်များကို ဖေဖော်ဝါရီ (၁၀) ရက်တွင် စစ်ကောင်စီမှ လေကြောင်းဖြင့် ထပ်မံတိုက်ခိုက်ခဲ့ရာ အရပ်သား (၅) ဦး သေဆုံးပြီး (၁၉) ဦး ထိခိုက်ဒဏ်ရာရရှိခဲ့ကြောင်း TNLA က ပြောသည်။