ထိုင်း-မြန်မာနယ်စပ်ရှိ ကျားဖြန့်လုပ်ငန်းများ နှိမ်ရင်းရန်အတွက် ထိုင်းအစိုးရက လူသုံးကုန်ပစ္စည်းများ တင်သွင်းခွင့် ပိတ်ပင်မှုကြောင့် တာချီလိတ်မြို့တွင် မီးဖိုချောင်သုံးဂက်စ် (Gas)များ ဈေးနှုန်းမြင့်တက်နေကြောင်း ဒေသခံများထံမှ သိရသည်။

ထိုင်းနိုင်ငံမှ မြန်မာနိုင်ငံသို့ စက်သုံးဆီနှင့်အတူ ဂက်စ်တင်သွင်းမှု ပိတ်ထားသည့်အတွက် ဂက်စ်ဝင်ရောက်မှု နည်းလာကာ ဈေးနှုန်းမြင့်လာရခြင်း ဖြစ်ကြောင်း တာချီလိတ်မြို့ အိမ်ရှင်မတစ်ဦးက သျှမ်းသံတော်ဆင့်ကို ပြောသည်။

“မီးဖြတ်၊ ဆီဖြတ်နဲ့ အခုဂက်စ် (Gas) လည်း စနေပြီ။ တချို့ရောင်းတောင် မရောင်ပေးကြဘူး။ ပြတ်နေတယ်ဆိုပြီး ပြောတယ်။ ဂက်စ်ကတော့ ၂ ဆဖြစ်သွားပြီ” ဟု ၎င်းကပြောသည်။

တာချီလိတ်မြို့တွင် ယခင်က အလေးချိန် (15 Kg) ဂက်စ်အိုး ၁ အိုးလျှင် ထိုင်းဘတ်ငွေ ၈၅၀ ဘတ်ရှိ (မြန်မာကျပ်ငွေ တစ်သိန်းဝန်းကျင်)မှ ယခုအခါ ၁,၅၀၀ ဘတ် (မြန်မာကျပ်ငွေ တစ်သိန်းခွဲ နှစ်သိန်းဝန်းကျင် ) အထိ မြင့်တက်လာနေကြောင်း ဒေသခံများကပြောသည်။

ထို့ပြင် လူသုံးကုန် ပစ္စည်းများဖြစ်သည့် မိုဘိုင်းဖုန်း၊ ဘထ္ထရီ၊ အင်ဗာတာ၊ မီးစက်၊ ဆိုလာပြား၊ မိုဘိုင်းကိရိယာများ၊ ကေဘယ်လ်ကြိုး စသည့်ဖြင့် အွန်လိုင်းငွေလိမ် လုပ်ငန်းတွင် အသုံးပြုနိုင်သော လျှပ်စစ်နှင့် ကွန်ပျူတာ ဆော့ဖ်ဝဲများကို ထိုင်းအစိုးရက တင်သွင်းခွင့် ပိတ်ပင်ထားကြောင်း ဒေသခံများထံမှ သိရသည်။

ဖေဖော်ဝါရီလဆန်းပိုင်းမှစတင်ပြီး ထိုင်းအစိုးရသည် မြန်မာနယ်စပ်ဒေသမှာ အခြေစိုက်နေသည့် ကျားဖြန့်လုပ်ငန်းများ နှိမ်နှင်းမည်ဟုဆိုကာ လျှပ်စစ်နှင့် လောင်စာဆီများအပါအဝင် လူသုံးကုန်ပစ္စည်းများအား ကန့်သတ်ပိတ်ပင်လိုက်ပြီးနောက် ဒေသခံများ အခက်ခဲကြုံတွေ့နေရကြောင်း တာချီလိတ်မြို့ခံတစ်ဦး ကပြောသည်။

“အခုနောက်ပိုင်း တာချီလိတ်မှာနေရတာ သိပ်အဆင်မပြေတော့ဘူး။ ဈေးရောင်းလည်း တော်တော်ပါးတယ်။ မီးလည်း ၅ နာရီလာ၊ ၅ နာရီပျက်နေတာ။ သောက်ရေသန့်လည်း ၁၅ ဘတ်ကနေ ၂၀ အထိ ဖြစ်သွားပြီ” ဟု တာချီလိတ်မြို့ခံတစ်ဦးက ပြောသည်။

လက်ရှိ တာချီလိတ်မြို့တွင် ထိုင်းနိုင်ငံမှ ပေးလွှတ်သည့် လျှပ်စစ်မီးများ ဖြတ်တောက်ခံရသော်လည်း လာအိုနိုင်ငံမှ လျှပ်စစ်ဓာတ်အားလိုင်းများဖြင့် အသုံးပြုနေရသည်။

ပြီးခဲ့သည့် ဖေဖော်ဝါရီလ ၁၁ ရက်တွင် အထူးစုံစမ်းစစ်ဆေးဌာန (DSI) က ထိုင်း-မြန်မာနယ်စပ် မြိုဝတီမြို့နယ်အတွင်း အွန်လိုငွေလိမ်လုပ်ငန်း တည်ထောင်လုပ်နေကိုင်နေသည့် ကရင်နယ်ခြားစောင့် တပ်မှူး စောချစ်သူအပါအဝင် ခေါင်းဆောင် ၃ ဦးကို လူကုန်ကူးမှုသံသယဖြင့် ဝမ်းဝရမ်းထုတ်ရန် အစိုးရရှေ့ထံ တင်ပြခဲ့ကြောင်း ထိုင်းသတင်းမီဒီယာများက ဖော်ပြသည်။