ကယားပြည်( ကရင်နီ) ဒီးမော့ဆို မြို့အနီးရှိ စာသင်ကျောင်းနှင့် ပြည်သူနေအိမ်ကို စစ်ကောင်မှ လက်နက်ကြီး ပစ်ခတ်မှုများ ပြုလုပ်သဖြင့် ပျက်စီးသွားကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၁၃ ရက်) ညနေပိုင်း ၃ နာရီတွင် စစ်ကောင်စီတပ်သည် လေကြောင်းဖြင့် ဗုံးကြဲတိုက်ခိုက်မှုကြောင့် စာသင်ကျောင်းအပါအဝင် ပြည်သူ့နေအိမ် ၄ လုံး ပျက်စီးသွားခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့က ညနေပိုင်းအချိန်ဖြစ်သွားတယ်။ တော်သေးလို့ လူထိခိုက်တာ မရှိလို့ ။ တိုက်ပွဲဖြစ်နေတော့ ဒေသခံတွေ အကုန်ရှောင်နေကြတယ်။ စာသင်ကျောင်းနဲ့ နေအိမ် ၄ လုံး ပျက်စီးသွားတယ် ရစရာမရှိအောင် အကုန်ပျက်သွားတာ။ စစ်တပ်က ရည်ရွယ်ချက်ရှိရှိနဲ့ကို လာကြဲသွားတယ်”ဟု ၎င်းက ပြောသည်။
ထိုအပြင် ပြီးခဲ့သည့် (ဇန်နဝါရီ ၁၅ ရက်)နေ့တွင်လည်း ဒီးမော့ဆိုမြို့နယ်အတွင်းရှိ ကျေးရွာ ၂ ရွာကို စစ်ကောင်စီမှ လေကြောင်း ဗုံးကြဲတိုက်ခိုက်မှု ပြုလုပ်ခြင်းကြောင်း စစ်ရှောင် ၃ ဦးသေဆုံးပြီး ၄ ဦးဒဏ်ရာရရှိခဲ့ကြောင်း သိရသည်။
စစ်ကောင်စီတပ်သည် မိုးဗြဲ ၊ ဖယ်ခုံ ၊ ဒီးမော့ဆို နှင့် လွိုင်ကော်မြို့တွင် ပြန်လည် ထိန်းချုပ်နိုင်ရန်အတွက် လေကြောင်းဖြင့် အပြင်းအထန် တိုက်ခိုက်မှုများ ဆက်တိုက် ပြုလုပ်လာကြောင်း ဒေသခံပြောပြချက်အရ သိရသည်။
အဆိုပါ လေကြောင်းဖြင့် မကြာခဏ တိုက်ခိုက်မှုကြောင့် စစ်ရှောင် သေဆုံးနှုန်း ပိုမို မြင့်တက်လာနေကြောင်း သိရသည်။
Leave a Comments