တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကျောက်မဲမြို့နယ်အတွင်း အမျိုးသားတစ်ဉီး ရိုက်နှက်ဒဏ်ရာဖြင့် သေဆုံးနေသည့် အလောင်း တွေ့ရှိခဲ့ကြောင်း ဒေသခံများ ပြောပြချက်အရ သိရသည်။

ပြီးခဲ့သည့် ဇန်နဝါရီ (၂၅) ရက်တွင် ကျောက်မဲမြို့နယ် ဟူးဆွန်ကျေးရွာအုပ်စု ထွန်ဟိတ်ကျေးရွာတွင် နေထိုင်သည့် အမျိုးသားတစ်ဉီးသည် လက်ဖက်ကြိတ်စက်ဝယ်ရန် ကျောက်မဲမြို့ပေါ်သို့ သွားစဉ် လမ်းတွင်ပျောက်ဆုံးခဲ့သည်။

ထိုသို့ ပျောက်ဆုံးပြီးနောက် မိသားစုဝင်များက လိုက်လံရှာဖွေခဲ့ရာ ဖေဖော်ဝါရီ (၅) ရက်တွင် ၎င်း၏ ရုပ်အလောင်းကို ဝမ်ပန်ကျေးရွာ အနီးရှိ တောစပ်တစ်ခုတွင် ရိုက်နှက်ဒဏ်ရာများဖြင့် သေဆုံးနေသည်ကို ပြန်လည်တွေ့ရှိခဲ့ကြောင်း နီးစပ်သူ မိသားစုဝင်တစ်ဉီးက သျှမ်းသံတော်ဆင့်ကို ပြောသည်။

“ပျောက်သွားတာ ၁၀ ရက်ကျော်မှာ ရိုက်နှက်ဒဏ်ရာနဲ့ ပြန်တွေ့တာ။ ဒဏ်ရာတွေက တော်တော်များတယ်။ ဘယ်သူ့လက်ချက်လည်း ဆိုတာတော့ သေချာမသိဘူး”ဟု ၎င်းနီးစပ်သူ မိသားစုဝင်တစ်ဉီးက ပြောဆိုသည်။

ရိုက်နှက်ဒဏ်ရာဖြင့် သေဆုံးသွားသူသည် အသက် (၇၇) အရွယ်ရှိ လုံးဆိုင်ခွန်(ခ) လုံးခွန် ဖြစ်ပြီး ကျောက်မဲမြို့နယ် ဟူးဆွန်ကျေးရွာအုပ်စု ထွန်ဟိတ်ကျေးရွာတွင် နေထိုင်သူဖြစ်ကြောင်း သိရသည်။

လုံးဆိုင်ခွန် သည် လက်ဖက်ကြိတ်စက် ဝယ်ယူရန် ၎င်းနေထိုင်ရာ ထွန်ဟိတ်ကျေးရွာမှ ကျောက်မဲမြို့ပေါ်သို့ သွားရန်အတွက် ထွန်ဟိတ်ကျေးရွာ တံတားနားတွင် ကားစောင့်နေစဉ် TNLA တပ်သားများက ကားအမဲရောင်ဖြင့် လာရောက်ခေါ်ဆောင်သွားကြောင်း မျက်မြင်တွေ့ရှိသူ ပြောပြချက်အရ သိရသည်။

ရိုက်နှက်ဒဏ်ရာများဖြင့် သေဆုံးနေသည့် လုံးဆိုင်ခွန် ၏ ရုပ်အလောင်းကို ပြန်လည်တွေ့ရှိပြီးနောက် ဒေသတွင်းရှိ TNLA တာဝန်ရှိသူများက လုံးဆိုင်ခွန်၏ မိသားစုနှင့် ရွာသားများကို ခေါ်ယူတွေ့ဆုံခဲ့ကာ သတင်းမပေါက်ကြားစေရန်အတွက် တားမြစ်ခဲ့ကြောင်း ၎င်းနီးစပ်သူ အမျိုးသားတစ်ဉီးက ဆိုသည်။

ဆက်လက်၍ TNLA တာဝန်ရှိသူများက ၎င်းအမှုကိစ္စနှင့် ပတ်သက်ပြီး အမှုမှန် ပေါ်ပေါက်ရေးအတွက် လုပ်ဆောင်ပေးမည်ဟုလည်း ပြောဆိုသွားခဲ့ကြောင်း ဒေသခံများထံမှ သိရသည်။

အဆိုပါ သေဆုံးမှုနှင့် ပတ်သက်၍ TNLA ၏ ပြန်ကြားရေး တာဝန်ခံ လွေးယေဦးကို သျှမ်းသံတော်ဆင့်မှ ဆက်သွယ်မေးမြန်းခဲ့သော်လည်း လတ်တလောတွင် ပြန်လည်ဖြေကြားခြင်း မရှိသေးပေ။

ယခုကဲ့သို့ တရားခံ မသိရှိရဘဲ လုံးဆိုင်ခွန် သေဆုံးမှုအပေါ် သက်ဆိုင်ရာ တာဝန်ရှိသူများအနေဖြင့် ဖြစ်စဉ်အမှန် ဖော်ထုတ်ပေးစေလိုကြောင်း မိသားစုဝင်များက တောင်းဆိုသည်။

“ဖြစ်နိုင်ရင်တော့ ဒီအမှုကို အချိန်အကြာကြီး မဆွဲပဲနဲ့ မြန်မြန် ဖော်ထုတ်ပေးစေချင်ပါတယ်။ ဘာဖြစ်လို့လဲဆိုတော့ သေသွားတာက သျှမ်းလူမျိုး၊ သတ်တဲ့သူတွေအဖြစ် သံသယ ဖြစ်နေတာက TNLA စစ်သားတွေဆိုတော့ ဒီအမှု အမြန်မဖြေရှင်းနိုင်ဘူးဆိုရင် လူမျိုးရေးပြဿနာတွေ ဖြစ်လာနိုင်ပါတယ်” ဟု သေဆုံးသူ၏ မိသားစုဝင်တစ်ဦးက ပြောသည်။

ကျောက်မဲမြို့နယ် ဟူးဆွန်ကျေးရွာအုပ်စုသည် လွန်ခဲ့သည့် ၂၀၁၆ ခုနှစ် အစောပိုင်းတွင် သျှမ်းပြည် ပြန်လည်ထူထောင်ရေးပါတီ၊ သျှမ်းပြည်တပ်မတော် (RCSS/SSA) နှင့် TNLA တို့ စစ်ရေး ပြင်းထန်ခဲ့သည့် ဒေသတစ်ခုလည်း ဖြစ်သည်။