“ကျောင်းသားလေးတွေကို ကျောင်းဆရာက လိင်ပိုင်းဆိုင်ရာ ပြုကျင့်မယ်လို့ မထင်ခဲ့သလို ကျောင်းဆရာကို ၆လပဲ ပြစ်ဒဏ်ပေးတာကမဖြစ်သင့်ဘူး” ဟု ဖယ်ခုံမြို့ ကလေးတစ်ဉီး၏ မိခင်က ရင်ဖွင့်ပြောလာသည်။

ပြီးခဲ့သည့် ဇန်နဝါရီလ (၂၄ )ရက်တွင် ဖယ်ခုံမြို့နယ် လယ်ထွန်ကျေးရွာမှ ကျောင်းတာဝန်ခံ ခွန်ဇော်ဇော်(ခ) ဇော်ဇော်ထွန်းသည် အသက်(၁၆)နှစ်အောက် Grade-9, နဲ့ Grade -10 မှ ကျောင်းသား(၇) ဦးကို လိင်ပိုင်းဆိုင်ရာ ထိပါးနှောင့်ယှက်မှုများ ကျူးလွန်ထားသည်ဟု ထွက်ဆိုခဲ့သည်။

ထိုထွက်ဆိုပြီးနောက်ပိုင်းတွင် ပြစ်မှုကျူးလွန်သည့် ကိုဇော်ဇော်ထွန်းကို ဇန်နဝါရီ ၂၈ရက်တွင် ဖယ်ခုံမြို့နယ် ပြည်သူ့လုံခြုံရေး တပ်ဖွဲ့က အချုပ်(၆)လ ချမှတ်လိုက်ပြီး၊ ၎င်းက ကျူးလွန်ခံရသူများကို ကျပ်သိန်း (၂၀)စီပေးကာ ကျေအေးလိုက်ရသည်။

“ကျူးလွန်ခံရတဲ့ ကျောင်းသားတွေနဲ့ ကျောင်းသားမိဘတွေရဲ့ သဘောဆန္ဒအရ အဲ့ကျောင်းဆရာကို အရေးမယူလိုဘူး။ ကျောင်းနဲ့သက်ဆိုင်ရာ တာဝန်တွေ ရပ်နားစေလိုတယ်ဆိုပြီး ထုတ်ပြန်ခဲ့တယ်။ တကယ်တော့ ဒါက ဘာမှ နားမလည်တဲ့ ကျောင်းသားမိဘတွေကို အခွင့်ကောင်းယူ အနိုင်ကျင့်တာပဲ” ဟု ဖယ်ခုံမြို့ ကလေးမိခင်တစ်ဉီးက ဆိုပြန်သည်။

ဖယ်ခုံမြို့နယ် ပြည်သူ့လုံခြုံရေး တပ်ဖွဲ့ (ပလဖ) သည် ကျောင်းသားတွေကို လိင်ပိုင်းဆိုင်ရာကျူးလွန်တဲ့ ကျောင်းဆရာကို ဖမ်းဆီးထားပြီး အချုပ်(၆)လ သာချမှတ်သော ကိစ္စသည် တရားမျှတမှုမရှိသည့်အပြင် ဝေဖန်မှုများလည်း မြင့်တက်နေသည်။

“ ကျောင်းဆရာဖြစ်ပြီး ကလေးတွေကို လိင်ပိုင်းဆိုင်ရာ မကာကွယ်တဲ့အပြင် ဒီလို အချုပ်(၆)လပဲချတာက မတရားဘူး။ သူ(ကျောင်းဆရာ) ကျူးလွန်ခဲ့တာက ကျောင်းသားတစ်ယောက်တည်းမဟုတ်ဘူးလေ (၇)ယောက်တောင်ဆိုတော့ ကြီးလေးတဲ့ ပြစ်ဒဏ်တော့ ချသင့်တယ်” ဟု ၎င်းမိခင်က ပြောသည်။

ကလေးများကို လိင်ပိုင်းဆိုင်ရာကျူးလွန်ခဲ့သည့် ကျောင်းဆရာ ဇော်ဇော်သည် ဖယ်ခုံမြို့နယ် လယ်ထွန်ကျေးရွာဇာတိ ဖြစ်ပြီး၊ စစ်အာဏာမသိမ်းမှုကြောင့် ကျောင်းသား CDM ပြုလုပ်လာပြီး တက္ကသိုလ် ဝင်တန်း အောင်မြင်မှုမရှိသေးပေ။

ပြစ်မှုကျူးလွန်ခဲ့သောနေရာသည့် ဖယ်ခုံမြို့နယ် လယ်ထွန်ကျေးရွာရှိ ကိုယ်ထူကိုယ်ထ ကျောင်းတွင်ဖြစ်ပြီး၊ ၎င်းကျောင်းတွင် ကျောင်းသားဉီးရေ (၁၅၀)ရှိကာ ကျေးရွာ ရန်ပုံငွေဖြင့် ရပ်တည်နေရသော ကျောင်းဖြစ်သည်။

ပြစ်မှုကျူးလွန်ခဲ့သူ(ဇော်ဇော်)သည် စစ်ဘေးရှောင်ကျောင်းအတွက် ရန်ပုံငွေများ ရှာပေးနိုင်သည့်သူဖြစ်သောကြောင့် ကျောင်းတာဝန်ခံ ရာထူးကို လည်း ယူထားသေးကြောင်း ဖယ်ခုံမြို့နယ်ရှိ သတင်းရင်းမြစ်တစ်ဉီးက ပြောပြသည်။

ဖယ်ခုံမြို့နယ် ပြည်သူ့လုံခြုံရေးတပ်ဖွဲ့ (ပလဖ) အနေဖြင့် ၎င်းအမှုကို ပြန်လည်စိစစ်ပြီး ထိရောက်စွာ အရေးယူသင့်ကြောင်း၊ ယခုကဲ့သို့ အချုပ် (၆)လချမှတ်ခြင်းသည် တော်လှန်ရေး ကို မျက်နှာပျက်စရာဖြစ်စေကြောင်းလည်း တော်လှန်ရေး အင်အားစုများက ထောက်ပြပြောဆိုလိုက်သည်။

“ကျနော်အနေနဲ့ကတော့ ဒီထက်ကြီးလေးတဲ့ပြစ်ဒဏ်ပေးဖို့ပြောချင်တယ်။ ကျောင်းဆရာတစ်ယောက်ဟာ စံပြသူဖြစ်ရမယ်။ ဒါကြောင့် တခြားသူတွေ ဒီလို ထပ်မလုပ်နိုင်အောင် ပြစ်ဒဏ်ကို ကြီးလေးချရမယ်။ ကျောင်းသား(၇)ယောက်ကို လိင်ပိုင်းဆိုင်ရာကျူးလွန်တဲ့အတွက် ပိုပြီး ပေးသင့်တယ်” ဟု ကရင်နီတော်လှန်ရေး တပ်သား တစ်ဉီးက ထောက်ပြပြောဆိုလိုက်သည်။

လိင်ပိုင်းဆိုင်ရာ ထိပါးနှောင့်ယှက်ခြင်း (Sexual harassment )သည် အာဏာကို အသုံးပြုပြီး ခန္ဓာကိုယ် အသားယူ ကိုင်တွင်ခြင်း ၊ အတင်းအဓမ္မ ဖိအားပေးကာ လိင်ပိုင်းဆိုင်ရာ စော်ကားခြင်း၊ မိမိမကြိုက်သည့် စကားအသုံးအနူန်း ဖြင့် ပြောဆိုခံရခြင်း၊ ညစ်ညမ်းသည့် စကားလုံးများဖြင့် အွန်လိုင်းပေါ်မှာ ဖြန့်ဝေခံရခြင်း စသည်တို့ဖြစ်သည်။

ထိုကဲ့သို့ လိင်ပိုင်းဆိုင်ရာ ကျူးလွန်လျှင် ရာဇသတ်ကြီး ပုဒ်မ (၃၇၆) ဖြင့် အရေးယူနိုင်ပြီး ကလေးသူငယ်များအား မုဒိမ်းကျင့်လျှင့် ထောင်ဒဏ် နှစ်(၂၀)မှ ထောင်ဒဏ်တစ်သက်ချမှတ်နိုင်သည်။

သို့သော် ယခု ဖယ်ခုံမြို့နယ် (ပလဖ) မှ လိင်ပိုင်းဆိုင်ရာ ကျူးလွန်သည့် ကျောင်းဆရာဇော်ဇော်ကို အချုပ် (၆)လ ချမှတ်ခြင်းသည် ကျောင်းသားသူငယ်များ၊ အမျိုးသမီးများကို လိင်ပိုင်းဆိုင်ရာကျူးလွန်မှုများလာအောင် ပြုလုပ်လိုက်ခြင်းဖြစ်ကြောင်း ဖယ်ခုံဒေသခံများက မှတ်ချက်ပြုသည်။

“ ဒီလို လူတွေကို အပြီးသတ်အဆုံးစီရင်ရမှာ။ ၆လ ချမှတ်လိုက်တာက နောက်နောင်ကျူးလွန်မယ်သူကို အခွင့်အရေး ပေးသလို နောက်ပြီး လိင်ပိုင်းဆိုင်ရာတွေက ငွေပေးပြီး ကျေအေးလို့ရတယ်ဆိုတာ ပြလိုက်တဲ့သဘောပဲ။ တော်လှန်ရေးသမား တွေက မပြတ်သားဘူး” ဟု ဖယ်ခုံမြို့ဒေသခံ မောင်ထွန်း က ပြောသည်။

လက်ရှိ ကျူးလွန်ခံရသောကလေးငယ်များသည် ရှက်စိတ်ဖြင့် ကျောင်းမသွားကြတော့ဘဲ အိမ်ထဲတွင် နေနေကြောင်း ကျူးလွန်ခံရသည့် ကျောင်းသားတစ်ဉီး၏ မိခင်က စိတ်မကောင်းစွာဖြင့်ပြောသည်။

“ ကလေးတွေက ရှက်လို့ကျောင်းမသွားတော့ဘူး။ တချို့ကလေးတွေက လှောင်ကြတယ်။ အိမ်ထဲကနေအိမ်ပြင် တောင်မထွက်တဲ့ကလေးရှိတယ်။ သူတို့က နောက်ထပ်ဖြစ်မှာစိတ်ပူနေကြတာ” ဟု ၎င်းမိခင်က ဆိုသည်။

ယခုကိစ္စသည် တော်လှန်ရေးကို ထိခိုက်ပြီး၊ ထိရောက်စွာ အရေးမယူနိုင်သည့်အတွက် နောက်နောင်ကျူးလွန်မည့်သူကို အခွင့်အရေး ပေးသကဲ့သို့ဖြစ်နေကြောင်း အမျိုးသမီးများအဖွဲ့ချုပ် (မြန်မာနိုင်ငံ) မှ အတွင်းရေးမှူး နာင်းမို့မို့ က ပြောဆိုလိုက်သည်။

“အခုကိစ္စက တော်လှန်ရေးမှာဆို အရမ်းထိခိုက်တယ်။တော်လှန်ရေးဆိုတာက အာဏာရှင်ကို တော်လှန်ရုံတင်မဟုတ်ဘူး စနစ်တစ်ခုလုံး ပြီးတော့ အယူအဆ အတွေးအခေါ်တွေ ကမှအစ တော်လှန်တာ။အမျိုးသမီး ၊ကလေးအစရှိသဖြင့် သူတို့အပေါ် အကြမ်းဖက်မှုမျိုးလဲ တော်လှန်နေတာဖြစ်တော့ ဒီကိစ္စကို ပေါ့ပေါ့တန်တန် မဆုံးဖြတ်သင့်ဘူး” ဟု နာင်းမို့မို့ က ထောက်ပြပြောဆိုသည်။

ကလေးများအပေါ် လိင်ပိုင်းဆိုင်ရာ နှောင့်ယှက်မှုသည် ကြီးလေးသည် ပြစ်ဒစ်ချမှတ်သင့်ကြောင်း၊ ကလေးငယ်များ၏ ပြင်ပနာကျင်မှု အပြင် စိတ်ပိုင်းဆိုင်ရာ ထိခိုက်နာကျင်မှုကိုလည်း ထည့်သွင်းစဉ်းစားကာ တရားမျှတမှုရှိရှိ အပြစ်ပေး အရေးယူသင့်ကြောင်း နာင်းမို့မို့ က ဆိုပြန်သည်။

“ ကျူးလွန်သူကိုလည်း ထိရောက်စွာ အပြစ်ပေးအရေးယူရမယ်။ ကျူးလွန်ခံရတဲ့ကလေးတွေကိုလည်း ကူညီပံ့ပိုးမှု ဆက်လက်လုပ်ဆောင်ရမယ်” ဟု သူက ဆက်လက်ပြောသည်။

ကလေးငယ်များသည် တိုင်းပြည်၏ အနာဂတ်ဖြစ်အလျောက် ယခုကဲ့သို့ လိင်ပိုင်းဆိုင်ရာကျူးလွန်ခံရကာ စိတ်ဒဏ်ရာဖြင့် ဘဝတလျောက်လုံး အရိပ်မဲကြီးဖြစ်သွားနိုင်ကြောင်း ဖယ်ခုံလူထုက ဆိုသည်။

“ ကလေးတွေရဲ့ စိတ်ဒဏ်ရာကို ကြည့်ဖို့လိုတယ်။ ကလေးတွေရဲ့ မိဘတွေက ဒီကိစ္စတွေကို သိရှိနားလည်တာမဟုတ်ဘူး၊ အသက်မပြည့်သေးတဲ့ကလေးကိစ္စကိုပိုပြီးအလေးအနက်ထားပြီး ကလေးမိဘတွေကျေအေးရင်တောင် တော်လှန်ရေးတပ်ဖွဲ့တွေက ဥပဒေအရဆောင်ရွက်ဖို့လိုအပ်တယ်” ဟု လူ့အခွင့်အရေး တက်ကြွလှုပ်ရှားသူ တစ်ဉီးက မှတ်ချက်ပြုသည်။

ထို့အပြင် ပြစ်မှုကျူးလွန်ခဲ့သည့် ဇော်ဇော်ပြန်လွတ်မြောက်လာပါက ကျောင်းသားများနှင့် မိဘများကို ဆက်လက် ဒုက္ခပေးမည်ကို စိုရိမ်နေကြသည်။

“ပြစ်ဒဏ်က (၆)လတည်းဆိုတော့ ခဏလေးပဲ။ ပြန်လွတ်လာပြီး ဒုက္ခပေးရင် ဘယ်လိုလုပ်မှာတုန်း။ တွေးပြီး ကြောက်နေရတယ်”ကျောင်းသားမိဘတစ်ဉီးက ဆိုသည်။

စစ်အာဏာရှင် အမြစ်ဖြတ် တိုက်ပွဲဝင်နေချိန်ကာလတွင် တော်လှန်ရေးတပ်သားများ၊ တော်လှန်ရေးတွင်ပါဝင်နေသော ပြည်သူများအဖွဲ့အစည်းများအားလုံကို လေးစားသည့်အနေဖြင့် လိင်ပိုင်းဆိုင်ရာကျူးလွန်သည့် ကျောင်းဆရာ၏ အမှုကို ပြန်လည်စိစစ်ရန်နှင့် ကလေးငယ်များကို လိင်ပိုင်းဆိုင်ရာကျူးလွန်သည့်အမှုကို ပေါ့လျော့စွာ မထားဘဲ အလေးအနက် ထည့်သွင်းစဉ်းစားပေးရန် ဖယ်ခုံမြို့နယ် ကျောင်းသားမိခင်တစ်ဉီးက တောင်းဆိုလိုက်သည်။

“တော်လှန်ရေးမှာ ဒီလိုဖြစ်တာတော့ ကျမအနေနဲ့လက်မခံဘူး။ ကျမတို့က စစ်တပ်ကိုလည်းကြောက်ရတယ်။ အခုက တော်လှန်ရေး ဘက်တော်သားတွေကိုပါကြောက်ရတော့မယ့်သဘောပဲ။ ကလေးတွေက စစ်ရှောင်ရတဲ့အပြင် အခုက ကျောင်းဆရာကပါ လိင်ပိုင်းဆိုင်ရာကျူးလွန်တော့ ကျမတို့ အနေေနဲ့ ကလေးတွေကို ဘယ်လို ကျောင်းလွှတ်ရမှာလဲ၊ အရေးယူသူကလည်း အပေါ်ယံပဲလုပ်တော့ ကျမတို့ပြည်သူကို စိတ်ချစေချင်တယ်” ၎င်းက တောင်းဆိုလိုက်သည်။

အလုပ်သင် သတင်းထောက် နန်းခမ်းကူ ရေးသားသည်။