သျှမ်းပြည် မူဆယ်မြို့တွင် စစ်ကောင်စီလက်အောက်ခံ နမ့်ဖတ်ကာ ပြည်သူစစ်နှင့် မူးယစ်ဆေးသယ်ဆောင်လာသည့် အမျိုးသားတစ်ဦး ပစ်ခတ်မှု ဖြစ်ပွားရာ မူးယစ်ဆေးသယ်သူ သေဆုံးသွားကြောင်း စုံစမ်းသိရသည်။

ယမန်နေ့ (ဖေဖော်ဝါရီ ၉ ရက်) နံနက်ပိုင်းအစောပိုင်းတွင် KTV မှ ပြန်လာသည့် အမျိုးသား တစ်ဦးကို လမ်းတွင် စောင့်ဆိုင်းစစ်ဆေးနေသည့် ပြည်သူ့စစ်နှင့်ထိပ်တိုက်တွေ့ဆုံရာ အချင်းချင်းပစ်ခတ်မှုဖြစ်ပွားကာ မူးယစ်ဆေးသယ်ဆောင်လာသည့် အမျိုးသားတစ်ဉီး သေဆုံးသွားကြောင်း မူဆယ်ဒေသခံ တစ်ဉီးက သျှမ်းသံတော်ဆင့်ကိုပြောသည်။

အဆိုပါ သေဆုံးသွားသော အမျိုးသားသည် မူဆယ်မြို့လယ်ရှိ ပေါ်ရွှေCY ဖုန်းဆိုင်တွင် မန်နေဂျာရာထူးနေရာ တာဝန်ယူထားသူဖြစ်ပြီး၊ ပြည်သူ့စစ်အဖွဲ့များနှင့်လည်း ပူးပေါင်းနေထိုင်သူဖြစ်ကြောင်း သိရသည်။

“မနေ့က မနက်ပိုင်မှား ဖြစ်သွားတာ။ အမျိုးသမီးတစ်ဦးက KTV မှာ ပစ္စည်းလာယူဖို့ခေါ်လိုက်တာ အလာလမ်းမှာပဲ စစ်ဆေးမှု တာဝန်ကျတဲ့ ပြည်သူစစ်နဲ့တိုးတောာ့ သူကားမရပ်ဘဲ အချင်းချင်းပစ်ခတ်မှုဖြစ်ရင်း သူများအိမ်တံခါးနဲ့ ဖုန်းတိုင်ကို ဝင်တိုက်မိတယ်။ ထပ်မပစ်ဖို့ အဲအမျိုးသားက တောင်းဆိုပေမဲ့ ပြည်သူစစ်က မရပ်မနားသေအောင် ပစ်သတ်သွားတယ်”ဟု ၎င်းက ပြောသည်။

၎င်းသေဆုံးသွားသည့် အမျိုးသား၏ ကားအထဲတွင် မူးယစ်ဆေးဝါးများနှင့် သေနတ်‌ တွေ့ရှိနေကြောင်း မူဆယ်ဒေသခံက ဆက်ပြောသည်။

အလာတူ ပြီးခဲ့သည့် ဖေဖော်ဝါရီ ၂ ရက်နေ့ ညနေ ၃ နာရီကျော်တွင် မူးဆယ်မြို့ စွမ်စော်ရပ်ကွက်အတွင်း ကင်းလှည့်နေသည့် စစ်ကောင်စီလက်အောက်ခံ မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ဝင်တစ်ဦးကို အမည်မသိ လက်နက်ကိုင်မှ သေနတ်ဖြင့် အနီးကပ် ပစ်ခတ်လုပ်ကြံခဲ့ရာ ဦးခေါင်းတွင် သေနတ်ဒဏ်ရာဖြင့် ပွဲချင်းပြီး သေဆုံးသွားခဲ့ကြောင်း ဒေသခံများက ပြောသည်။

၂၀၂၅ ခုနှစ် နှစ်အစပိုင်း ဇန်နဝါရီလနှင့် ဖေဖော်ဝါရီလအတွင်းတွင် ဒေသခံ ပြန်ပေးခံရဆွဲမှုနှင့် ပြည်သူစစ်အချင်းချင်းပစ်ခတ်မှုသည် ၄ ကြိမ်မြောက်ရှိလာနေကြောင်း သိရသည်။

မြန်မာ-တရုတ် နယ်စပ်ဒေသဖြစ်သည့် မူဆယ်မြို့တွင် စစ်ကောင်စီလက်အောက်ခံ ပြည်သူ့စစ်အဖွဲ့ပေါင်း (၂၀) ကျော်ထက်မနည်း ရှိနေပြီး တရားဥပဒေစိုးမိုးမှု ကင်းမဲ့ကာ တရားမဝင် စီးပွားရေးနှင့် မူးယစ်ဆေးဝါးများ စုံလင်ပေါများခြင်းကြောင့် သေနတ်ပစ်ခတ်မှုများ မကြာခဏ ဖြစ်ပွားနေပြီး အမှုမှန်ပေါ်ပေါက်ခြင်း မရှိကြောင်း ဒေသခံများက ပြောသည်။

အလုပ်သင် သတင်းထောက် နန်းဆိုင်ခမ်း ရေးသားသည်။