သျှမ်းပြည်မြောက်ပိုင်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် သီပေါမြို့တွင် မိုင်းနင်းမိပြီး အမျိုးသား တစ်ဦးသေဆုံးကာ အမျိုးသမီးတစ်ဉီး ဒဏ်ရာရရှိကြောင်း စုံစမ်းသိရသည်။

ပြီးခဲ့သည့် (ဖေဖော်ဝါရီ ၆ရက်) ညနေပိုင်းတွင် သီပေါမြို့ မီးရထားရပ်ကွက်နေ မြရွှေဂူဘုန်းကြီးကျောင်းအနီးတွင် စစ်လက်နက်ကျန် ပစ္စည်းကို ကောက်ယူရာ ပေါက်ကွဲမှုဖြစ်ပွားပြီး လက်နှစ်ဖက်ပြတ်ထွက်သွားပြီး ၁ ဦးသေဆုံး၊ ၁ ဦးဒဏ်ရာရရှိနေကြောင်း သီပေါဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“အခုတလော မကြာခဏ မိုင်းနင်မိပြီး သေတာတွေ အတော်များလာတယ်။ ၆ ရက်နေ့က ညနေပိုင်းအချိန်ပဲ မြရွှေဂူဘုန်းကြီးကျောင်းအနီးပဲ မိုင်းတွေ့လို့ကောက်ယူရာကနေ ပေါက်ကွဲပြီး လက် ၂ဖက်လုံးပြတ်သွားပြီး ဒဏ်ရာပြင်းထန်လို့ သေသွားတယ်။ အမျိုးသမီးငယ်တော့ ဒဏ်ရာရနေတယ်”ဟု ၎င်းက ပြောသည်။

သျှမ်းပြည်မြောက်ပိုင်း TNLA ထိန်းချုပ်ထားသည့် မိုးမိတ်မြို့ ၊ ကွတ်ခိုင်မြို့နှင့် သီပေါမြို့နှင့် နမ့်ခမ်းမြို့ စသည့် တိုက်ပွဲဖြစ်ပွားသည့် ဒေသအသီးသီးတွင် စစ်လက်နက်ကျန် ပစ္စည်းကို ကိုင်တွယ်မိရာနှင့် မိုင်းနင်းမိရာတွင် သေဆုံးသူ များပြားလာကြောင်း သီပေါဒေသခံ အမျိုးသားတစ်ဦးက ဆက်ပြောသည်။

သျှမ်းပြည်တွင် ယခုလက်ရှိ မြေမြှုပ်မိုင်းနှင့် စစ်ကျန်လက်နက် ပေါက်ကွဲမှုများကြောင့် ပြည်သူများ နေ့စဉ် သေဆုံးမှု မြင့်တက်လာနေပြီး မိုင်းအန္တရာယ် အသိပေးပညာ လုပ်ဆောင်ရန်နှင့် လက််နက်ကျန်မိုင်းများကို ရှင်းလင်း‌ပေးနိုင်ရန် လိုအပ်နေကြောင်း သီပေါဒေသခံအမျိုးသမီးက ပြောသည်။

“ဖြစ်နိုင်ရင်တော့ ဘယ်အဖွဲ့အစည်းမဆို မိုင်းရှင်းလင်းရေးလာလုပ်ပေးဖို့ တောင်းဆိုချင်တယ်။ ပြီးတော့ မိုင်းအန္တရာယ် အသိပညာပေးတွေလည်း လုပ်ပေးစေချင်တယ်။ သီပေါမြို့မှာလည်း ဒေသခံ တော်တော်များများက ပြန်လာနေကြတယ်။ မိုင်းနင်းမိလို့ သေသွားတာလည်း မနည်းတော့ဘူး”ဟု ၎င်းက ပြေသည်။

ထို့အပြင် ပြီးခဲ့သည့် (ဖေဖော်ဝါရီ ၅ ရက်) ညနေ ၃ နာရီဝန်းကျင်တွင် TNLA ထိန်းချုပ်ထားသည့် နမ့်ခမ်းမြို့နယ် နောင်တိန်းကျေးရွာ၌ တောင်ယာထဲ ကြံစိုက်နေစဉ် စစ်လက်ကျန်ဗုံးကို ဓားခုတ်မိပြီး တောင်သူအမျိုးသားတစ်ဦး ဒဏ်ရာအပြင်းအထန် ရရှိခဲ့ကြောင်း ဒေသခံများက ပြောသည်။

ယခု ၂၀၂၅ ခုနှစ် (ဇန်နဝါရီလ) မှ ( ဖေဖော်ဝါရီလ ၈ ရက်)နေ့အထိ TNLA ထိန်းချုပ်ထားသည့် သျှမ်းမြောက်ဒေသတွင် မိုင်းနင်းမိရာနေ ၅ ဦးသေဆုံးပြီး ၇ ဦး ဒဏ်ရာရရှိကြောင်း သိရသည်။

သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး” ဖြစ်ပွားပြီးနောက် နယ်မြေထိန်းချုပ်ထားသည့် ညီနောင်မဟာမိတ်တပ်ဖွဲ့များသည် မြေမြှုပ်မိုင်းကဲ့သို့ စစ်ကျန်လက်နက်ပစ္စည်းများကို တာဝန်ယူဖြေရှင်းမှု အားနည်းသေးကြောင်း ပြည်သူများက ထောက်ပြပြောဆိုသည်။

အလုပ်သင် သတင်းထောက် နန်းဆိုင်ခမ်း ရေးသားသည်။