သျှမ်းပြည်တောင်ပိုင်း၊ ဆီဆိုင်မြို့နယ် လွယ်ချယ်-တပူး ရွာ လမ်းခွဲတွင် စပါးသယ်ပြီး ပြန်လာသည့် အရပ်သားနှစ်ဦးသည် စစ်ကောင်စီက ဒရုန်းဖြင့် ဗုံးကြဲတိုက်ခိုက်မှုကြောင့် ပွဲချင်းပြီးသေဆုံးသွားကြောင်း သတင်းရရှိသည်။
ယမန်နေ့ (ဖေဖော်ဝါရီ ၆)ရက် နေ့လည် (၂)နာရီတွင် ဆီဆိုင်မြို့နယ် ကောင်ထိုကျေးရွာနေ ခွန်ဖါလိန်နှင့်ဇနီး နန်းဆွေတို့ တောင်ယာမှ စပါးသယ်ပြီး ပြန်လာစဉ် စစ်ကောင်စီက တိုက်ပွဲဖြစ်ပွားခြင်းမရှိဘဲ ဒရုန်းဖြင့် ဗုံးကြဲတိုက်ခိုက်ခဲ့သဖြင့် ၎င်းလင်မယားနှစ်ဉီး ပွဲချင်းပြီး သေဆုံးသွားကြောင်း PNLA၏ ပြောရေးဆိုခွင့် ရှိသူ ခွန်ရိန်းယံက သျှမ်းသံတော်ဆင့်ကို ပြောသည်။
“မနေ့က ပဲ အကြဲခံရပြီး သေသွားတာ။ စပါးသယ်လာပြီး ပြန်လာတာကို စစ်ကောင်စီက ဒရုန်းနဲ့ ကြဲတော့ လင်မယား နှစ်ယောက်လုံး သေဆုံးသွားတယ်။ တိုက်ပွဲ ဖြစ်ပွားဖြင်း မရှိဘဲ ကြဲတာ။” ဟု ခွန်ရိန်းယံက ဆိုသည်။
ထို့ပြင် စစ်ကောင်စီနှင့် ပအိုဝ်းပြည်သူ့စစ် (PNO)တို့သည် ဆီဆိုင်မြို့နယ် ကျေးရွာတွေကို တိုက်ပွဲ ဖြစ်ပွားဖြင်းမရှိဘဲ လက်နက်ကြီးဖြင့် ပစ်ခတ်ခြင်း၊ ဒရုန်းဖြင့် ဗုံးကြဲတိုက်ခိုက်ခြင်းတို့ကို လုပ်ဆောင်နေကြောင်း ၎င်းက ဆက်ပြောသည်။
ဆက်လက်ပြီး ခွန်ရိန်းယံက “သူတို့ကျူးလွန်နေတဲ့ စစ်ရာဇဝတ်မှုတွေကို ပြောင်ပြောင်တင်းတင်း ကျူးလွန်နေတာ။ ပအိုဝ်းလူမျိုး ၊ ကျေးရွာတွေကို တမင်သက်သက် တိုက်ခိုက်ဖျက်ဆီးနေတာ ဖြစ်ပါတယ်။ PNOက ပအိုဝ်းလူမျိုးမဟုတ်တဲ့ ခရိုနီခေါင်းဆောင် နေဝင်းထွန်းရဲ့ အကျိုးစီးပွားကို ပအိုဝ်းပြည်သူ အသက်နဲ့ ကာကွယ်ပေးနေတာ။ PNOမှာ ရှိနေတဲ့ သူတွေ ပြန်စဉ်းစားကြပါ။ ကိုယ့်ပအိုဝ်းလူမျိုး၊ပအိုဝ်းကျေးရွာကို တစ်ပါးသူ အကျိုးစီးပွားအတွက် ဖျက်ဆီးနေတာ လိပ်ပြာလုံရဲ့လား ၊ တန်ရဲ့လားဆိုတာ စဉ်းစားကြပါ။” ဟု ထပ်လောင်းပြောသည်။
ပြီးခဲ့သည့် ဇန်နဝါရီလ (၁၄)ရက် ညနေ (၃)နာရီတွင်လည်း ဆီဆိုင်မြို့နယ် နောင်ထောဝ်ကျေးရွာကို စစ်ကောင်စီက ဗုံးကြဲ တိုက်ခိုက်ခဲ့ခြင်းကြောင့် ဓမ္မာရုံကြီး ပျက်စီးသွားခဲ့ကြောင်း သိရသည်။
အလုပ်သင် သတင်းထောက် နန်းခမ်းကူ ရေးသားသည်။
Leave a Comments