သျှမ်းပြည်တောင်ပိုင်း၊ သျှမ်း-ကယားနယ်စပ် မိုးဗြဲမြို့တွင် စစ်ကောင်စီတပ်က ထိုးစစ်ဆင် တိုက်ခိုက် လာသောကြောင့် ကရင်နီအမျိုးသားကာကွယ်ရေးတပ် (KNDF)မှ ထိတွေ့တိုက်ပွားဖြစ်နေသည်ဟု သတင်းရင်းမြစ်ထံမှ သိရသည်။
ယမန်နေ့ ဖေဖော်ဝါရီလ ( ၅ )ရက်တွင် စစ်ကောင်စီတပ်နှင့် KNDF တို့တိုက်ပွဲ ဖြစ်ပွားခဲ့ပြီး စစ်ကောင်စီတပ်မှ လက်နက်ကြီး ဖြင့် ပစ်ခတ်တိုက်ခိုက်နေသောကြောင့် နေအိမ်များ မီးလောင်ပျက်စီးခဲ့သည်ဟု ကယ်ဆယ်ရေး လုပ်ငန်း လုပ်ကိုင်နေသူတစ်ဦးက သျှမ်းသံတော်ဆင့်ကို ပြောသည်။
“ မနေ့က တိုက်ပွဲဖြစ်ပွားပြီးတော့ ညအချိန်မှာ Y12 လေယာဉ်နဲ့ လက်နက်ကြီးလာချတာ နေအိမ်တွေ ပျက်စီးသွားတာတွေရှိတယ်။မီးလောင်သွားတာလည်းရှိတယ်။အကုန်တော့ အတည်မပြု နိုင်သေးဘူး။ လူထိခိုက်မှုတော့ မရှိဘူး။” ဟု အဆိုပါ ကယ်ဆယ်ရေးလုပ်ကိုင်နေသူ တစ်ဦးက ပြောသည်။
အဆိုပါ တိုက်ပွဲသည် မိုးဗြဲမြို့ မြောက်ဖက် အစပ်နားတွင် တိုက်ပွဲဖြစ်ပွားနေပြီး မြို့ထဲတွင် လူမနေတော့ သောကြောင့် ထိခိုက်သေဆုံးမှု မရှိကြောင်း ၎င်းက ထပ်လောင်းပြောသည်။
ထို့အပြင် မိုးဗြဲမြို့တွင်လူဦးရေ (၃သောင်း) ကျော်ရှိပြီး အဆိုပါ ပြည်သူများအားလုံး နီးစပ်ရာ ပင်လောင်းနှင့် ဖယ်ခုံဖက်ခြမ်းတွင် ရှောင်တိမ်းနေကြသည်။
ထို့အပြင် စစ်ကောင်စီ ထိုးစစ်ဆင် တိုက်ခိုက်နေသာ မိုးဗြဲမြို့ တိုက်ပွဲတွင် စစ်မှုထမ်းဟောင်းမပါဘဲ ပြည်သူ့စစ်မှုထမ်း အမှတ်စဉ်(၆)မှ လူသစ်များ အများအပြား သေဆုံးထိခိုက်ကြောင်း သတင်းရင်းမြစ်တစ်ဦး ထံမှ သိရသည်။
“ဒီတစ်ခေါက်ထိုးစစ်ဆင်တဲ့အထဲမှာ စစ်မှုထမ်းဟောင်းတွေ မပါဘူး။ လူသစ်တွေချည်းပဲ။ အမှတ်စဉ်(၆)ကလို့ သိရတယ်။ ထိုးကျွေးခံရတာပေါ့ဗျာ။” ဟု အဆိုပါ သတင်းရင်းမြစ်က ပြောသည်။
စစ်ကောင်စီတပ်သည် မိုးဗြဲမြို့ကို ပြန်လည်ထိန်းချုပ်နိုင်ရင် တကျော့ပြန် ထိုးစစ်ဆင်နေပြီး ခမရ (၄၂၂)တပ်မှ ဇန်နဝါရီလ (၄)ရက်နေ့မှ စပြီး ယနေ့ထိ တော်လှန်ရေးတပ်ဖွဲ့များနှင့် ထိတွေ့တိုက်ပွဲ ပြင်းထန်လျက်ရှိသည်။
ပြီးခဲ့သည့် ဇန်နဝါရီလ တစ်လ အတွင်း ကရင်နီပြည်နယ်နှင့် နယ်စပ်ဖြစ်သည့် လွိုင်ကော်၊ ဘော်လခဲ၊ဖားဆောင်း၊ မိုးဗြဲ နှင့် ဆီဆိုင်တို့တွင် စစ်ကောင်စီနှင့် KNDFတို့ တိုက်ပွဲဖြစ်ပွားခဲ့ပြီး စစ်ကောင်စီဘက်မှ (၃၀) ကျော် သေဆုံးကာ၊ (၁၀)ဉီး လက်နက်ချ အလင်းဝင်ခဲ့ကြောင်း KNDFက ထုတ်ပြည်ထားသည်။
စစ်ကောင်စီသည် မိုးဗြဲမြို့ကို ပြန်လည်ရယူရန် မြေပြင်မှာသာမက လေကြောင်းတိုက်ခိုက်မှုပါလုပ်ဆောင် နေလျက်ရှိသည်။
Leave a Comments