ထိုင်းနိုင်ငံ မဲဆောက်မြို့တွင် ပြောင်းစေ့များတင်ဆောင်လာသည့် ကားပေါ်သို့ လိုက်ပါလာသည့် မြန်မာနိုင်ငံသား (၈) ဦး ဖမ်းဆီးခံရကြောင်း ထိုင်းသတင်းတွင် ဖော်ပြသည်။

ယနေ့ (ဖေဖော်ဝါရီလ ၆) ရက် နံနက်အစောပိုင်း ၁ နာရီဝန်းကျင်တွင် မဲဆောက်မြို့အထွက်ရှိ ဟွေ့ဟင်ဖွန် ပူးပေါင်းစစ်ဆေးရေးဂိတ်တွင် ကုန်တင်ကားတစ်စီးအား ပူးပေါင်းအဖွဲ့က ရပ်တန့်စစ်ဆေးရှာဖွေရာ ကားအတွင်းရှိ ပြောင်းစေ့များအောက်သို့ ပုန်းအောင်းလိုက်ပါလာသော မြန်မာနိုင်ငံသား (၈) ဦးကို ဖမ်းဆီးရမိခြင်း ဖြစ်ကြောင်းသိရသည်။

ဖမ်းဆီးခံရသူ မြန်မာနိုင်ငံသား (၈) ဦးမှာ အမျိုးသား (၆) ဦးနှင့် အမျိုးသမီး (၂) ဦးတို့ ဖြစ်ပြီး ၎င်းတို့သည် ထိုင်းနိုင်ငံအတွင်း စမွတ်ပရာကန်ပြည်နယ်သို့ သွားရောက်ကာ အလုပ်လုပ်ကိုင်မည့်သူများဖြစ်ကြောင်း သိရသည်။

လက်ရှိတွင် ၎င်းတို့အား တရားမဝင်နည်းလမ်းဖြင့် ဝင်ရောက်လာမှုဖြင့် ဖမ်းဆီးပြီး မဲဆောက်မြို့မရဲစခန်းသို့ ပို့ဆောင်ထားကြောင်း သိရသည်။

အလားတူ ဇန်နဝါရီလ ၃၀ ရက်တွင် ပြောင်းဖူးတင်ဆောင်လာသည့် ကားပေါ်သို့ လိုက်ပါလာသည့် မြန်မာနိုင်ငံသား ၂၆ ဦးလည်း မဲဆောင်ခရိုင် ဂိတ်တစ်ခု၌ ဖမ်းဆီးခံခဲ့ရသည်။

ထိုင်း-မြန်မာနိုင်ငံနယ်စပ်တစ်လျှောက် အထူးသဖြင့် မဲဆောင်ခရိုင်းအတွင်း ကျားဖြန့်လုပ်ငန်းကို ဦးတည်ပြီး လူမှောင်ခိုတားဆီးသည့် စီမံချက်ကို ထိုင်းအစိုးရ အရှိန်အဟုန်မြင့် လုပ်ဆောင်နေလျက်ရှိသည်။

ထိုကြောင့် နိုင်ငံအတွင်း တရားမဝင် နည်းလမ်းမျိုးစုံဖြင့် ဝင်ရောက်ရန် ကြိုးပမ်းနေသည့် မြန်မာနိုင်ငံသားများ၊ တရားမဝင် အလုပ်လုပ်နေသော ရွှေ့ပြောင်းအလုပ်သမား အများအပြား ဖမ်းဆီးခံရနေသဖြင့် သတိထားသွားလာကြရန် ရွှေ့ပြောင်းအလုပ်သမားအရေးဆောင်ရွက်သူများက အသိပေးသည်။