ထိုင်းနိုင်ငံ ချင်းမိုင်မြို့ စားသောက်ဆိုင်တစ်ခုကို ထိုင်းလူဝင်မှုကြီးကြပ်ရေး အရာရှိများက ဝင်ရောက်စစ်ဆေးရာ တရားမဝင်အလုပ်လုပ်နေသော မြန်မာအပါအဝင် အလုပ်သမား ၁၅ ဦး ဖမ်းဆီးရမိကြောင်း ထိုင်းသတင်းတွင် ဖော်ပြသည်။

ယမန်နေ့ (ဖေဖော်ဝါရီလ ၄ ရက်) က ချင်းမိုင်ခရိုင် ဟန်တုံးမြို့နယ် နောင်ခွဲကျေးရွာအုပ်စုရှိ စားသောက်ဆိုင်တစ်ခုကို ထိုင်းလူဝင်မှုကြီးကြပ်ရေး အရာရှိများက ဝင်ရောက်စစ်ဆေးရာမှ ဖမ်းဆီးရမိခြင်း ဖြစ်ကြောင်း သိရသည်။

ထိုဖမ်းဆီးမှုတွင် မြန်မာရွှေ့ပြောင်းအလုပ်သမား ၉ ဦးနှင့် တရုတ်နိုင်ငံသား ၆ ဦးဖြစ်ကြောင်း သိရသည်။

ထိုင်းသတင်းများ၏ ဖော်ပြချက်အရ ဖမ်းဆီးခံရသော မြန်မာရွှေ့ပြောင်းအလုပ်သမားများသည် ထိုစားသောက်ဆိုင်မှာ ဝန်ထမ်းအဖြစ် လုပ်ကိုင်နေသည်မှာ ၁ ပတ်ခန့်သာရှိပြီး လုပ်အားခ တစ်ရက်ကို ဘတ် ၃၀၀ ပေးသော်လည်း လစာမရသေးကြောင်း၊ တရားဝင်အလုပ်လုပ်ကိုင်ခွင့် (Work Permit) မလျှောက်ရသေးကြောင်း ဝန်ခံခဲ့သည်ဟု ဖော်ပြသည်။

ထို့ပြင် တရုတ်လူမျိုး ၆ လည်း တရားဝင်အလုပ်လုပ်ကိုင်ခွင့် (Work Permit) လျှောက်ထားခြင်းမရှိဘဲ ထိုစားသောက်ဆိုင်တွင် ဆိုင်မန်နေဂျာနှင့် စားဖိုမှုးအဖြစ် အလုပ်လုပ်ကိုင်နေကြောင်း ဆိုသည်။

လက်ရှိ ထိုင်းနိုင်ငံနယ်စပ်တွင် ကျားဖြန့်နှိမ်နင်းရေး ဂယက်ကြောင့် ချင်းမိုင်၊ မဲဆောက်၊ ဘန်ကောက် စသည့် မြို့များတွင် စစ်ဆေးမေးမြန်းခြင်း၊ ဖမ်းဆီးခြင်းများ ပြုလုပ်နေသဖြင့် မြန်မာရွှေ့ပြောင်းအလုပ်သမားများ အနေဖြင့် သတိထားသွားလာရန် ရွှေ့ပြောင်းအလုပ်သမားအရေး ဆောင်ရွက်သူများက အသိပေးသည်။