သျှမ်းပြည်မြောက်၊ နောင်ချိုမြို့နယ် တောင်ခမ်း တိုက်ပွဲ၌ တိုက်ပွဲ ပြင်းထန်နေပြီး စစ်ကောင်စီ ရဲဘော်နှင့် ဓနုပြည်သူ့လွတ်မြောက်ရေး တပ်မတော် (DPLA) ရဲဘော်တို့ ပြန်လည် တွေ့ဆုံခဲ့သည်ဟု သိရှိရသည်။
ယနေ့ ဖေဖော်ဝါရီလ (၄) ရက်နေ့တွင် စစ်ကောင်စီတပ်နှင့် တအာင်းအမျိုးသား လွတ်မြောက်ရေး တပ်မတော် (TNLA)၊ ဓနုပြည်သူ့ လွတ်မြောက်ရေး တပ်မတော် (DPLA) ပူးပေါင်းတပ်တို့ တိုက်ပွဲဖြစ်ပွားပြီး စစ်ကောင်စီ တပ်သား (၅) ဦးကို အရှင်ဖမ်းမိရာ တစ်ဦးမှာ DPLA ရဲဘော် တစ်ဦး၏ အကို ဖြစ်နေသည်ဟု DPLA ပြောရေးဆိုခွင့်ရှိသူက သျှမ်းသံတော်ဆင့်ကို ပြောသည်။
“တောင်ခမ်းမှာ ဖမ်းမိတာ၊ သူတို့က အလင်းဝင်လာတာတော့ မဟုတ်ဘူး။ တစ်ဦးကတော့ ကျနော်တို့ DPLA ရဲဘော်ရဲ့ အကိုအရင်း ဖြစ်နေတာ။ သူ့အကိုက စစ်ကောင်စီ ဘက်က။ ပေါ်တာဆွဲ ခံရတာ မဟုတ်ဘူး။ ဟိုးအရင်ကတည်းက စစ်ကောင်စီတပ်ထဲမှာ ရှိနေတာ။ သူတို့ ပြန်တွေ့တော့ ဝမ်းသာတာပေါ့ဗျာ” ဟု DPLA ပြောရေးဆိုခွင့်ရှိသူက ရှင်းပြသည်။
လက်ရှိ တောင်ခမ်းတွင် စစ်ကောင်စီနှင့် TNLA၊ DPLA ပူးပေါင်းတပ်ဖွဲ့တို့ တိုက်ပွဲပြင်းထန်နေပြီး စစ်ကောင်စီတပ် အကျဆုံး ရှိသော်လည်း အတိကျ မသိရှိရသေးဟု ၎င်းကဆိုသည်။
လအတန်ကြာနေပြီ ဖြစ်သည့် နာမည်ကျော် တောင်ခမ်းဒေသ တိုက်ပွဲများ အတွင်း နှစ်ဘက်တပ် ရင်ဆိုင် တိုက်ပွဲ ဖြစ်ပွားနေရာ စစ်ကောင်စီတပ်က တေင်ခမ်းမှ တဆင့် TNLA သိမ်းပိုက်ထားသည့် နောင်ချို့မြို့ ပြန်လည် သိမ်းပိုက်နိုင်ရေး ကြိုးစားနေခြင်း ဖြစ်သည်။
အလုပ်သင် သတင်းထောက် နန်းခမ်းကူ ရေးသားသည်။
Leave a Comments