သျှမ်းပြည် မူဆယ်မြို့ပေါ်တွင် မူးယစ်ဆေးဝါးတားဆီးနှိမ်နှင်းရေး ကင်းလှည့်သည့် ရဲတပ်ဖွဲ့ဝင်တစ်ဦး သေနတ်ဖြင့် အနီးကပ်ပစ်ခတ်ခံရပြီး သေဆုံးသွားကြောင်း စုံစမ်းသိရသည်။
ဖေဖော်ဝါရီလ (၂) ရက် ညနေ ၃ နာရီကျော်တွင် မူဆယ်မြို့ စွမ်စော်ရပ်ကွက်အတွင်း ကင်းလှည့်နေသည့် စစ်ကောင်စီလက်အောက်ခံ မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ဝင်တစ်ဦးကို အမည်မသိ လက်နက်ကိုင်မှ သေနတ်ဖြင့် အနီးကပ် ပစ်ခတ်လုပ်ကြံခဲ့ရာ ဦးခေါင်းတွင် သေနတ်ဒဏ်ရာဖြင့် ပွဲချင်းပြီး သေဆုံးသွားခဲ့ကြောင်း ဒေသခံများက ပြောသည်။
“ညနေ ၃ နာရီကျော်လောက်က သေနတ်သံထွက်တာ ကြားတယ်။ သေနတ်မှန်တာ မူးယစ်ရဲ နယ်မြေမှူး အနီးကပ် ပစ်သတ်ခံရသူ၊ မန့်ဝိန်းနဲ့ စွမ်စော်ဘက်မှာ ကင်းလှည့်ပြီး လိုက်ဖမ်းနေတဲ့ မူးယစ်ရဲလို့ ပြောတယ်။ ဘာကြောင့်ပစ်ခံရလဲတော့ မသိဘူး”ဟု မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အနီးကပ်ပစ်ခတ် လုပ်ကြံခံရသည့် ၎င်းမူးယစ်ရဲသည် နားထင်နှင့် နားရွက်အောက်တွင် သေနတ်ဒဏ်ရာဖြင့် ပွဲချင်းပြီး သေဆုံးသွားခဲ့ကာ ဖြစ်စဉ်အသေးစိတ်ကို မသိရှိရဘဲ ပြစ်မှုကျူးလွန်သူကိုလည်း ဖမ်းဆီးရမိခြင်း မရှိသေးကြောင်း ၎င်းဒေသခံအမျိုးသားက ဆက်ပြောသည်။
အလားတူ ဇန်နဝါရီလ (၁၉) ရက်ကလည်း မူဆယ်မြို့ တော်ရွက်ရပ်ကွက် ဧက (၄၀) ဘက်တွင် စစ်ကောင်စီလက်အောက်ခံ မန်ပြိန်းပြည်သူ့စစအဖွဲ့ဝင်များ မူးယစ်ဆေးဝါးနှင့် အရက်သောက်သုံးပြီးနောက် သေနတ်ဖြင့် အချင်းချင်း လိုက်လံပစ်ခတ်ခဲ့ရာ ပြည်သူ့စစ်တစ်ဦး သေဆုံးသွားပြီး ၎င်းရုပ်အလောင်းကို မီးရှို့ဖျက်ဆီးခဲ့သည်။
၎င်းနောက် ပြည်သူ့စစ်အဖွဲ့ဝင်အချင်းချင်း သေနတ်ပစ်ခတ်၍ သေဆုံးခဲ့သူကို မီးရှို့အလောင်းဖျက်ရန် ကျူးလွန်သူများအား စစ်ကောင်စီတပ်မှ ဖမ်းဆီးရမိပြီး မည်ကဲ့သို့ ဆက်လက်အရေးယူ ဆောင်ရွက်နေသည်ကို မသိရကြောင်း မူဆယ်ဒေသခံများထံမှ သိရသည်။
မြန်မာ-တရုတ် နယ်စပ်ဒေသဖြစ်သည့် မူဆယ်မြို့တွင် စစ်ကောင်စီလက်အောက်ခံ ပြည်သူ့စစ်အဖွဲ့ပေါင်း (၂၀) ကျော်ထက်မနည်း ရှိနေပြီး တရားဥပဒေစိုးမိုးမှု ကင်းမဲ့ကာ တရားမဝင် စီးပွားရေးနှင့် မူးယစ်ဆေးဝါးများ စုံလင်ပေါများခြင်းကြောင့် သေနတ်ပစ်ခတ်မှုများ မကြာခဏ ဖြစ်ပွားနေပြီး အမှုမှန်ပေါ်ပေါက်ခြင်း မရှိကြောင်း ဒေသခံများက ပြောသည်။
Leave a Comments