ကရင်နီပြည်နယ်(ကယား)၊ ဘော်လခဲမြို့နယ်တွင် စစ်ရေးပြင်းထန်လာနိုင်သောကြောင့် ဒေသခံများကို ပြောင်းရွှေ့ရန် ဘော်လခဲ တော်လှန်ရေး တပ်ပေါင်းစုမှဖေဖော်ဝါရီလ (၂)ရက်တွင် အသိပေးထုတ်ပြန်ထားသည်။
ဘော်လခဲမြို့နယ် အခြေစိုက် ခြေမြန်တပ်ရင်း ခမရ(၃၃၇)၊ ခမရ(၄၂၉) ၊ခမရ( ၄၃၀) နှင့် ဘော်လခဲမြို့မ ရဲစခန်းကို စစ်ကောင်စီတပ်မှ စစ်အင်အားဖြည့်တင်းခြင်း ၊ရိက္ခာ ဆေးဝါးများ ဖြည့်တင်းခြင်းများ နေ့စဉ်လုပ်ဆောင်နေပြီး အချိန်မရွေးတိုက်ပွဲဖြစ်လာနိုင်သဖြင့် ဒေသခံများကို ပြောင်းရွှေ့ရန် အသိပေးထုတ်ပြန်ထားသည်။
အဆိုပါ ထုတ်ပြန်ချက်တွင် စစ်ကောင်စီ၏ ယန္တရားထောက်တိုင်များနှင့် မပတ်သက်ရန်နှင့် စစ်ကောင်စီတပ်စခန်း အနီးသွားလာနေထိုင်ခြင်းမပြုရန် အသိပေးထားပြီး Non CDM များကိုလည်း ဘော်လခဲမြို့အတွင်း ယန္တရားလည်ပတ်မှုကို မလုပ်ကြရန် ဖော်ပြထားသည်။
ထို့အပြင် ဖေဖော်ဝါရီလ ၂ရက်နေ့မှ ၁၁ ရက်နေ့အထိ ဆယ်ရက်အတွင်း ပြောင်းရွှေ့ကြရန်နှင့် မပြောင်းရွှေ့ပါက နောက်ဆက်တွဲကိစ္စရပ်များကို ထာဝန်ယူမည်မ ဟုတ်ကြောင်း ထည့်သွင်း ဖော်ပြထားသည်။
ဆက်လက်ပြီး ဘော်လခဲဒေသခံများကို အချိန်ရသည်နှင့် အမြန်ဆုံးခွာသင့်ကြောင်းနှင့် တိုက်ပွဲဖြစ်မှ ထွက်လျှင် မလွယ်ကူကြောင်း ထွက်ပြေးတိမ်းရှောင်လာသူ တစ်ဦးမှ သျှမ်းသံတော်ဆင့်ကို ပြောသည်။
“အချိန်ရတုန်း အမြန်ထွက်စေချင်တယ်။ တကယ်လို့ ထိတွေ့တိုက်ပွဲဖြစ်မှ ဆိုရင် သူတို့အတွက်လည်း အဆင်မပြေသလို တော်လှန်ရေးတပ်ပေါင်းစုအတွက်လည်း အဆင်ပြေမှာ မဟုတ်ဘူး။ တချို့ဆိုရင်တော့ အပြီး ထွက်ခွာလာသူတွေ ရှိနေပြီ။ အားလုံးဘေးကင်းဖို့ မျှော်လင့်ပါတယ်။” ဟု အဆိုပါ ထွက်ပြေးလာသူ အမျိုးသမီးက ပြောသည်။
ပြီးခဲ့သည့် ဇန်နဝါရီလ (၃၁ )ရက်တွင်လည်း ဘော်လခဲမြို့နယ်၊ ချိကွဲကျေးရွာအတွင်း တိုက်ပွဲဖြစ်ပွားခြင်းမရှိဘဲ လေကြောင်းဖြင့် ဗုံးကျဲတိုက်ခိုက်မှုကြောင့် အသက်(၅၀) ကျော်ဒေသခံ အမျိုးသမီးတစ်ဦး သေဆုံးသွားပြီး နေအိမ်(၁၀)လုံး ထက်မနည်းထိခိုက်ဆုံးရှုံးသွားခဲ့ကြောင်း သတင်းရင်းမြစ်များထံမှ သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments