သျှမ်းပြည်မြောက်ပိုင်း ၂၀၂၅ နှစ်စအတွင်းတွင် မိုင်းနင်းမိပြီး ၄ ဦးသေဆုံးပြီး ၅ ဦးဒဏ်ရာရရှိကြောင်း စုံစမ်းသိရသည်။
သျှမ်းပြည်မြောက်ပိုင်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် မိုးမိတ်မြို့ ၊ ကွတ်ခိုင်မြို့နှင့် သီပေါမြို့ စသည့် တိုက်ပွဲဖြစ်ပွားသည့် ဒေသအသီးသီးတွင် စစ်လက်နက်ကျန် ပစ္စည်းကို ကိုင်တွယ်မိရာနှင့် မိုင်းနင်းမိရာတွင် သေဆုံးသူ များပြားလာကြောင်း သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယခု ၂၀၂၅ ခုနှစ် (ဇန်နဝါရီလ) မှ ( ဖေဖော်ဝါရီလ ၄ ရက်)နေ့အထိ TNLA ထိန်းချုပ်ထားသည့် သျှမ်းမြောက်ဒေသတွင် မိုင်းနင်းမိရာနေ ၄ ဦးသေဆုံးပြီး ၅ ဦး ဒဏ်ရာရရှိကြောင်း သိရသည်။
“အခုမိုင်းနင်းမိပြီး သေဆုံးတဲ့သူတွေ ခြေထောက် ၂ဘက်စလုံးပြတ်သွားတဲ့နေရာတွေက တိုက်ပွဲတွေ ဖြစ်ပြီးသွားတဲ့ နေရာတွေဖြစ်တယ်။ ဖြစ်နိုင်ရင် နယ်မြေကို ထိန်းချုပ်ထားတဲ့ အဖွဲ့အစည်းပဲဖြစ်ဖြစ် တာဝန်ရှိသူတွေပဲ ဖြစ်ဖြစ် လာရောက်ရှင်းလင်းတာမျိုး ရှိစေချင်တယ်။ အခုက တခုခုဆို ကျနော်တို့ ပြည်သူတွေပဲ ခံနေရတယ်”ဟု ၎င်းက ပြောသည်။
အဆိုပါ သေဆုံးသွားသည့် ၄ ဦးထဲတွင် ကလေးငယ် ၂ အပါအဝင် သေဆုံးပြီး ထို့ ကလေးငယ်သည် ပြီးခဲ့သော (ဖေဖော်ဝါရီ ၁ ရက်)နေ့ ကွတ်ခိုင်မြို့ နမ့်ဆိုင်းကျေးရွာရှိ ဒေသခံ ကလေးငယ် ၄ ဦးသည် ငါးဖမ်းရန်သွားရာနေ မိုင်းနင်းမိပြီး ၂ သေဆုံးပြီး ၂ ဦ ဒဏ်ရာရရှိသွားကြောင်း ကွတ်ခိုင်ဒေသခံတစ်ဦးက ပြောသည်။
ထို့အပြင် TNLA ထိန်းချုပ်ထားသည့် မိုးမိတ်မြို့တွင် ပြီးခဲ့သည့် (ဇန်နဝါရီ ၂၈ ရက်) နေ့လည်ပိုင်းတွင် အမျိုးသားတစ်ဦး ခြံသွားရှင်းရာ၌ လက်နက်ကြီးပေါက်ကွဲမှုဖြစ်ပြီး ဒဏ်ရာပြင်းထန်နေကြောင်း၊ သီပေါမြို့တွင်လည်း (ဇန်နဝါရီ ၂၅ ရက်)တွင်လည်း မိုင်းနင်းမိပြီး ၂ဦးသေဆုံးသွားသည်ဟု သိရသည်။
“ဒီနှစ် လအစပိုင်းလေးပဲ မိုင်းနင်းမိပြီး သေဆုံးတာတွေ ဒဏ်ရာရတာတွေ များနေပြီ။ ပြီးခဲ့တဲ့ ၁ ရက်နေ့ဆိုလည်း ကွတ်ခိုင်မြို့က ကျေးရွာက ကလေးငယ် ၄ ဦး ငါးသွားဖမ်းမယ်သွားရင် မိုင်းနင်းမိပြီး ၂ ဦးသေဆုံးသွားတယ်။ကျန် ၂ ဦးတော့ ဒဏ်ရာရသွားတယ်။ ကလေးငယ်တွေလည်း အသက်ငယ်ငယ်နဲ့ သေဆုံးရတာတွေ မိုင်းရှင်းလင်းမှု မရှိလို့” ဟု ၎င်းက ပြောသည်။
မူဆယ်မြို့တွင်လည်း ပြီးခဲ့သည့် (ဇန်နဝါရီ ၃၀ )ရက်နေ့တွင် မိုင်းယု(၁၀၅)မိုင်အုပ်စု အောက်နမ့်ဟွယ်ကျေးရွာတွင် အမျိုးသားတစ်ဦး ကြံခင်းသွားခုတ်ရာတွင် မိုင်းနင်းမိပြီး ခြေထောက် ၂ ဖက်ပြတ်တောက်သွားခဲ့သည်ဟု မူဆယ်ဒေသခံ တစ်ဦးက ပြောသည်။
သျှမ်းပြည်မြောက်ပိုင်း “၁၀၂၇” စစ်ဆင်ရေး ဖြစ်ပွားပြီးနောက် မြေမြှုပ်မိုင်းရှင်းလင်းမှုကို ညီနောင်မဟာမိတ်တပ်ဖွဲ့ နှင့် စစ်ကောင်စီတပ်ဖွဲ့တို့က တာဝန်ယူဖြေရှင်းမှုနည်းသေးကြောင်း ပြည်သူများက ပြောသည်။
Leave a Comments