၂၀၂၅ ဖေဖေါ်ဝါရီလ ၁ ရက် နေ့မှာ စစ်ကောင်စီ SAC က တိုင်းပြည်အာဏာကို သိမ်းယူလာခဲ့တာ ၄ နှစ် ပြည့်ပြီ ဖြစ်ပါတယ်။ ဒီ ၄ နှစ်တာ ကာလာမှာ လူထု သေကြေရတယ်၊ မိသားစုတွေ ခွဲခွါကြရတယ်၊ အသက်အိုးအိမ် စည်းစိမ် ပျက်စီး ဆုံးရှုံးကြရတယ်၊ ခိုကိုးရာမဲ့မှု ငတ်ပြတ်မှုတွေ အလူးအလဲ ခံခဲ့ရပါတယ်။
ကမ္ဘာ့ကုလသမဂ္ဂ စားနပ်ရိက္ခာအစီအစဉ် WFP ရဲ့ ဇန်နဝါရီလ ၂၉ ရက် ရက်စွဲ နဲ့ ထုတ်ပြန်ချက်မှာ လက်ရှိ ဖြစ်ပွားနေတဲ့ မြန်မာ့နိုင်ငံရေး စစ်ရေးအခင်းအကျင်းကြောင့် မြန်မာပြည်တွင်းမှာလူဉီးရေ ၁၅ သန်း က အငတ်ဘေး ရင်ဆိုင်နိုင်ခြေရှိတယ်လို့ ဆိုပါတယ်။
လက်ရှိ မြန်မာပြည်က တိုင်းပြည်ကျဆုံးဖို့ ပြိုကွဲ ပျက်စီးဖို့ လမ်းကြောင်းဘက် ဉီးတည်လာနေပါတယ်။
၁၉၅၈ ပထမ အကြိမ်အာဏာသိမ်းမှု ကနေ ဒီစတုတ္ထ အကြိမ် ဗိုလ်မင်းအောင်လှိုင် အာဏာသိမ်းလာ တဲ့ ခေတ်အဆက်ဆက် အာဏာသိမ်းမှုမှာ ဘယ်သူအကျိုးအမြတ်ရလဲ။ လူထုနစ်နာရှုံးဆုံးမှုနဲ့အတူ ဒီတစ်ကြိမ် အာဏာသိမ်းမှုက စစ်ကောင်စီဘက်ကလဲ အဘက်ဘက် ချွတ်ခြုံကျလာနေပါတယ်။ နှစ်ပေါင်း ၇၀ မှာ မော်ကွန်းတင်လောက်တဲ့ ကျဆုံးခန်းကြီးလို့ ပြောရင်လဲမှားမယ်မထင်ပါဘူး။
မြန်မာ့တပ်မတော် ရဲ့ တိုက်ခိုက်ရေးအင်အား ခမရ နဲ့ ခလယ တပ်ရင်းပေါင်း ၆၀၀ လောက်ရှိရာမှာ အရှေ့မြောက်ပိုင်းတိုင်းစစ်ဌာနချုပ်နဲ့ အနောက်ပိုင်းတိုင်း စစ်ဌာနချုပ် တွေနဲ့အတူ တပ်ရင်းပေါင်း ၂၀၀ ထက်မနည်း နွေဉီးတော်လှန်ရေးမှာ အညံ့ခံကျဆုံးခဲ့ပါပြီ။ အာဏာရှင်ကို အမြစ်ပြုတ် ခြေမှုန်းရေး တိုက်ပွဲဝင်နေတဲ့ လူထု အတွက် ခွန်အားပါပဲ။
ဒီလို မြန်မာပြည်တွင်း စစ်မီးလောင်ကျွမ်းနေတာ လူထုနွေဉီးတော်လှန်ရေးဆင်နွဲနေတာဟာ တိုင်း ပြည် အာဏာကို သိမ်းယူထားတဲ့ စစ်အာဏာရှင်ကို လူထု မနှစ်သက် မကျေနပ်လို့ အမြစ်ပြုတ်တိုက်ပွဲ ဆင်နွှဲနေရတယ်ဆိုတာ တရုတ်အစိုးရ အနေနဲ့ နားလည် သဘောပေါက်သင့်ပါတယ်။
အနောက်ကြောက်ရောဂါနဲ့ ကျားဖြန့်အကြောင်းပြ မြောက်ပိုင်းအဖွဲ့ကို လက်နက်တပ်ဆင်ပေးပြီး နယ်မြေသိမ်းယူခိုင်းထားလို့ အခုအခါကျမှ အပစ်ရပ်ပါ တပ်ဆုတ်ခွာပါ ဆိုတာဟာ မြန်မာပြည်ရှိ တရုတ်အကျိုးစီးပွား လုံခြုံမှုရှိလာနိုင်မှာလား။ မြန်မာပြည်ငြိမ်းချမ်းလာမလား။ ဒီအခြေအနေမှာ ရွေးကောက်ပွဲလုပ်ရုံနဲ့ လူထုတော်လှန်ရေး အရှိန် ရပ်တန့်သွားစေမလား။
ကိုးကန့်တပ် တအာင်းပလောင်တပ် အထူးနယ်မြေရပြီဆိုရုံနဲ့ တိုင်းပြည် ငြိမ်းချမ်းသွားမလား။
သျှမ်းပြည်မြောက်ပိုင်းအတွင်း ၎င်းတို့ ဆင်နွှဲခဲ့တဲ့ တိုက်ပွဲကြောင့် စစ်ကောင်စီတန်ပြန်ဗုံးကြဲ တိုက်ခိုက်မှုကြောင့် ပျက်စီးဆုံးရှုံးသွားရတဲ့ လူထု အသက်အိုးအိမ် ဘယ်လိုတာဝန်ယူပေးကြမလဲ။ စတာတွေ တရုတ် အနေနဲ့ ထည့်သွင်းစဉ်းစားပေးရမှာ ဖြစ်ပါတယ်။
သေချာတာကတော့ စစ်အာဏာရှင် တည်ရှိနေသရွေ့ လူထုတော်လှန်ရေးကလည်း ငြိမ်သက် ပျောက် ကွယ် သွားမှာမဟုတ်ပါဘူး။ အာဏာလုယူထားတဲ့ စစ်အာဏာရှင်ဟာ လူထု ရန်သူဖြစ်နေတယ်။ စစ်အာဏာရှင်ကို ပံ့ပိုးကူညီသူ လက်တွဲဖေးမနေသူ မှန်သမျှဟာလည်း လူထုရန်သူ ဖြစ်လာမှာ မလွှဲပါဘူး။
လက်ရှိ ဖြစ်ပွားနေတဲ့ မြန်မာ့အရေးမှာ လူထုလိုအပ်ချက်က စစ်အာဏာရှင် မရှိဖို့ပါပဲ။ စစ်အာဏာရှင် တည်ရှိနေသရွေ့ လူထုတော်လှန်ရေးကလည်း ဆက်လက်ရှိနေဉီးမှာဖြစ်တဲ့ အတွက် တရုတ်အစိုးရ အနေနဲ့ မြန်မာလူထု လိုအပ်ချက်ကို ငဲ့ကွက်ပြီး အနာဂတ်မြန်မာပြည်မှာ စစ်အာဏာရှင်မရှိစေဖို့ တွန်းအားပေးပေးမှသာ တရုတ်အကျိုးစီးပွား ရေရှည်စိတ်ချလုံခြုံမှာဖြစ်တယ်လို့ သံတော်ဆင့် အပ်ပါတယ်။
သျှမ်းသံတော်ဆင့်
Leave a Comments