သျှမ်းပြည် ညောင်ရွှေမြို့နယ်အတွင်းရောက်ရှိနေသည့် ကရင်နီစစ်ဘေးရှောင်များကို မတ်လကုန်တွင် နေရပ်ပြန်ရန် ပြောဆိုနေကြသည့်အပေါ် စစ်ဘေးရှောင်များ စိုးရိမ်နေကြရကြောင်း သတင်းရရှိသည်။

ညောင်ရွှေမြို့သို့ရောက်ရှိနေသော ကရင်နီစစ်ဘေးရှောင်များကို လာမည့် ၂၀၂၅ မတ်လအတွင်း နေရပ် ပြန်ရန် မြို့နယ်အထွေထွေအုပ်ချုပ်ရေးရုံးမှ သတိပေးပြောဆိုမှုရှိခဲ့ကြောင်းညောင်ရွှေမြို့ ဒေသခံအမျိုးသားတစ်ဉီးက သျှမ်းသံတော်ဆင့်ကို ပြောသည်။

“မတ်လမှာ ပြောင်းဖို့နေရပ်ပြန်ဖို့ တရားဝင်စာထွက်တာမျိုးတော့ မရှိသေးပါဘူး။ အထွေထွေအုပ်ချုပ်‌ရေးရုံးရဲ့ အောက်ကလူတွေပြောနေတာ။အစည်းအဝေးထဲမှာလည်း ပြောတာမျိုးရှိတယ်။ သတင်းတွေ ထွက်နေတာ ကလည်း အဲ့အောက်ကလူတွေဆီကသိကြရတာ။စာထွက်မယ်ဆိုရင်တောင် ၂ လပိုင်းထဲမှာ တရားဝင်ထွက်ဖို့ ရှိလောက်မယ် အဲ့မှ သူတို့လည်း ပြင်ဆင်ချိန်ရှိမှာလေ။”ဟု ၎င်းက ပြောသည်။

ထိုသို့နေရပ်ပြန်ဖို့ ပြောဆိုလာသည့်အပေါ် ကရင်နီစစ်ဘေးရှောင်များအတွက် စိုးရိမ်မှုများဖြစ်နေပြီး နေရပ်ပြန်ရန်လည်း အခက်အခဲမျာ ကြုံတွေ့နိုင်ကြောင်း စစ်ဘေးရှောင် အသက် ၄၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ပြန်ရမယ်ဆိုရင်တော့ စိုးရိမ်နေကြတာပေါ့။တော်တော်များများက အိမ်မှ မရှိတော့တာ မြေပဲကျန်တော့ တာလေ။တကယ်လို့ ပေးမနေတော့ဘူး လက်မခံတော့ဘူးဆိုရင် ဘယ်လိုဖြစ်ဖြစ် ပြန်ရမှာပဲ။ကျနော်တို့ အိမ်တောင်မရှိတော့ပါဘူး။ ပြန်ရင်လည်း တဲထိုးပြီးနေရမှာပေါ့” ဟု ၎င်း က ဆိုသည်။

ညောင်ရွှေမြို့မှ လွိုင်ကော်သို့ ပြန်ရမည်ဆိုလျှင် လမ်းစရိတ်လည်း မရှိကြောင်း တိုက်ပွဲပြန်ဖြစ်ပါက ထပ်မံပြေးလွှားရန် အတွက် ငွေကြေးလည်း မသက်နိုင်တော့ကြောင်း စစ်ဘေးရှာင်က ထပ်လောင်းပြောသည်။

လက်ရှိညောင်ရွှေမြို့နယ်အတွင်းတွင် စစ်ဘေးရှောင် တစ်သောင်း ဝန်းကျင်ထိကျန်ရှိနေပြီး စစ်ဘေးရှောင်စခန်း ၁၈ တွင်ရှိနေသည့်အပြင် ဘုန်းကြီးကျောင်း နှင့် ဆွေမျိုးအိမ်များတွင် နေထိုင်နေကြကြောင်း သိရသည်။

ထိုပြင် ညောင်ရွှေမြို့နယ်ရှိ စစ်ဘေးရှောင်များအတွက် စားဝတ်နေရေးကူညီ လှူဒါန်းနေသည့် အဖွဲ့အစည်းများ နည်းပါးလာပြီး လာမည့် နွေရာသီအတွက် စားနပ်ရိက္ခာအခက်အခဲများ ကြုံတွေ့လာနိုင်ကြောင်း စစ်ဘေးရှောင်ကူညီသူတစ်ဦးက ပြောသည်။