သျှမ်းပြည် မြောက်ပိုင်းကျောက်မဲမြို့နယ်တွင် စစ်ကောင်စီမှ လေကြောင်းတိုက်မှုပြန်လည် ပြုလုပ်ခြင်းကြောင့် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) မှ ဖုန်းလိုင်းများကို ပြန်လည်ပိတ်ထာရကြောင်း စုံစမ်းသိရသည်။

ကျောက်မဲမြို့နယ်ကို စစ်ကောင်စီမှ လေကြောင်းဗုံးကြဲတိုက်ခိုက်မှု ပြန်လည် ပြုလုပ်လာသည့်အတွက်ကြောင့် TNLA မှ ယမန်နေ့ (ဇန်နဝါရီလ ၂၈) ရက်တွင် ဖုန်းလိုင်းနှင့် အင်တာနက်များကို အကန့်သတ် ယာယီ ပြန်လည်ပိတ်ပင်ထားရကြောင်း အသက် ၃၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဒလန်တွေများတော့ လှုပ်ရှားမှုတွေ၊အခမ်းအနား တခုခုရှိရင် သတင်ပေးတော့ ဗုံးကြဲတိုက်ခိုက်လာတာတွေ ရှိတယ်။ Star Link နဲ့ CDMA ဖုန်း အသုံးပြုတာကို အကန့်သတ်ယာယီပြန်ပိတ်တာက စာတွေထုတ်ထားတယ်။ လိုင်းပေါ် မှာပြန်ကြားရေးမှာ တင်ထားတာတော့မရှိဘူး။ သူတို့က အဲ့ဖုန်းလိုင်းတွေကို ယာယီပိတ်တယ်ဆိုတာကို သက်ဆိုင်ရာ တွေဆီကိုတဆင့်ပြန်ပေးတာ။သက်ဆိုင်ရာ အုပ်ချုပ်ရေးနဲ့ လူထုတွေမြင် အောင် သိအောင် ကပ်တာ မျိုးတော့ လုပ်တယ်။”ဟု အသက် ၃၀ ဝန်းကျင် အမျိုးသားတစ်ဦးကပြောသည်။

‌ကျောက်မဲမြို့ပေါ်ကို စစ်ကောင်စီမှ ထပ်မံ၍ လေကြောင်းဗုံးကြဲတိုက်ခိုက်မည်ကိုလည်း ဒေသခံများက စိုးရိမ်ကြောက်လန့်နေကြရကြောင်း ဒေသခံအမျိုးသမီးတစ်ဦးက ထပ်မံလောင်းပြောသည်။

“ကျောက်မဲမြို့မှာက ဗုံးမကြဲရင်တောင် ဒေသခံတွေက စိုးရိမ်နေရတာလေ။ တချို့တွေကလည်း ပြန်ပြေးဖို့ ဆိုကလည်း မတက်နိုင်ဘူး။ ဒီလိုတွေ ဗုံးကြဲတာပြန်ဖြစ်လာတော့ တချို့တွေက ဈေးပြန်ရောင်းရမှာ ကြောက်ကြတာရှိတယ်။ စိုးရိမ်ရတာပေါ့။ အခုချိန်ထိတော့ လေယာဉ်သံကြားရရင်တော့ ကြဲတော့မှာလား ဘယ်ချိန်ကြဲမလဲဆိုတာ ကြောက်လန့်နေရတာ” ဟု ကျောက်မဲမြို့ ဒေသခံအမျိုးသမီးတစ်ဦးက ပြောသည်။

ယခုနှစ် ဇန်နဝါရီ အတွင်း စစ်ကောင်စီမှ လေကြောင်းဗုံးကြဲတိုက်ခိုက်မှု ၃ ကြိမ်ပြုလုပ်ခဲ့ပြီး၊ ကျောက်မဲမြို့ ပြည်သူ့ဆေးရုံ နှင့် ရဲစခန်းအနီး ၊ မြို့တော်ခန်းမ အနီးတဝိုက်၊ ပန်ပေါင်း တိုးဂိတ်အနီးတို့ကို ဗုံးကြဲတိုက်ခိုက်ခဲ့သည့်အတွက် ၃ ဦးသေဆုံးခဲ့ပြီး ၂၀ ဦးထပ်မနည်း သေဆုံးခဲ့ကြောင်း သိရသည်။

“ ၁၀၂၇ စစ်ဆင်ရေး” ဒုတိယလှိုင်းအတွင်း TNLA မှ ကျောက်မဲမြို့ကို ပြီးခဲ့သည့် ၂၀၂၄ ခုနစ် ဩဂုတ်လ (၆) ရက်တွင် သိမ်းပိုက်နိုင်ခဲ့သည်။

စစ်ကောင်စီနှင့် ကိုးကန့်တပ်ဖွဲ့ MNDAA အကြား တရုတ်နိုင်ငံ၏ ကြားဝင်စေ့စပ်မှုကြောင့် ဇန်နဝါရီလ (၁၈) ရက်မှစ အပစ်အခတ် ရပ်စဲရေး သဘောတူညီချက် ရရှိခဲ့သော်လည်း TNLA ထိန်းချုပ်သည့် နယ်မြေများတွင် စစ်ကောင်စီက လေ‌ကြောင်းဗုံးကြဲတိုက်မှုများ ဆက်လက်ပြုလုပ်နေကြောင်းသိရသည်။

တရုတ်ဘက်မှ စစ်ကောင်စီနှင့် TNLA အကြား အပစ်အခတ် ရပ်စဲနိုင်ရန် တရုတ်နိုင်ငံ၏ ကြားဝင်စေ့စပ်မှုဖြင့် ထပ်မံတွေ့ဆုံ ဆွေးနွေးနိုင်ကြောင်း နိုင်ငံရေးလေ့လာသုံးသပ် သူများက ပြောဆိုသည်။