သျှမ်းပြည်မြောက်ပိုင်း နောင်ချိုမြို့နယ် အုမ္မတီးကျေးရွာရှိ နေအိမ် အလုံး ၂၀ ဝန်းကျင်ကို စစ်ကောင်စီက မီးရှို့ဖျက်ဆီးလိုက်ကြောင်း စုံစမ်းသိရသည်။
ယမန်နေ့ (ဇန်နဝါရီ ၂၆ ရက်) နံနက်ပိုင်းအချိန်တွေ တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့ အုမ္မတီးကျေးရွာကို စစ်ကောင်စီတပ်မှ ရှော့ဒုန်းဖြင့် နေအိမ် အလုံး ၂၀ ဝန်းကျင် မီးရှို့ဖျက်ဆီးခဲ့ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့က မနက်ပိုင်းလောက်ကတည်းက မီးခိုးငွေ့တွေ ထွက်တာ စစ်တပ်က ရှော့ဒုန်းနဲ့ ပစ်တာ နေအိမ်တော်တော်များများ ပါသွားတယ်။ တစ်နေကုန် ပစ်ခတ်သံတွေ တော်တော်ပြင်းထန်တယ်။ မီးရှိုးတာ ဒီတခါမှ မဟုတ်ဘူး ၃ ခါတောင်ရှိပြီ။ အဲအိမ်တွေထဲကို TNLA တွေဝင်ရောက်ခိုလုံတယ်ကြားလို့ စစ်တပ်က နေအိမ်အကောင်းတွေ အကုန်ပစ်ရှိုးတယ်”ဟု ၎င်းက ပြောသည်။
လက်ရှိ စစ်ကောင်စီတပ်နှင့် TNLA တို့ကြား တိုက်ပွဲပြင်းထန်းနေပြီး၊ စစ်ကောင်စီတပ်သည် မြို့အတွင်းတွင် လူနေများသည့် နေရာကိုသာ ဦးတည်ပြီး လေယာဉ်ဖြင့် ဗုံးကြဲမှု ထပ်မံပြုလုပ်လာနေကြောင်း ဒေသခံ အများအပြား ထပ်မံသေဆုံးနေရကြောင်း ဒေသခံ အမျိုးသမီးတစ်ဦးက ပြောသည်။
“အခုတော့ တိုက်ပွဲတွေ ပြန်ပြင်းထန်နေတယ်။ ပြည်သူတွေလည်း နည်းနည်းငြိမ်သွားတယ်ဆိုပြီး မြို့ကို ခဏပြန်ကျတာ။ စစ်တပ်လက်နက်ကြီးကြောင့် သေသွားတာအများကြီးပဲ။ သူတို့လည်း လူနေများတဲ့ နေရာကို ဦးတည်ပြီးမှ ပစ်တာ ရည်ရွယ်ချက်ရှိရှိနဲ့ လုပ်တယ်”ဟု ၎င်းက ပြောသည်။
ကိုးကန့်တပ်ဖွဲ့ MNDAA နှင့် စစ်ကောင်စီတို့ ဇန်နဝါရီ (၁၈) ရက်မှ စတင်ပြီး တရားဝင် အပစ်အခတ် ရပ်စဲကြောင်း တရုတ်နိုင်ငံဘက်မှ ထုတ်ဖော်ပြောကြားခဲ့ပြီးနောက် ညီနောင်မဟာမိတ်ဖြစ်သည့် TNLA ထိန်းချုပ်နယ်မြေထဲ စစ်ကောင်စီက လေကြောင်းဖြင့် ပြန်လည်ထိုးစစ်ဆင်ကာ TNLA ကို ဖိအားပေးနေကြောင်း နိုင်ငံရေးလေ့လာသုံးသပ်သူများက ပြောဆိုသည်။
ထို့အပြင် ပြီးခဲ့သည့် ၂၀၂၄ ခုနှစ် (နိုဝင်ဘာ ၂၅ ရက်)နေ့ ညနေပိုင်းအချိန် ဆမ္မဆယ်ရွာတွင် လက်နက်ကြီးကျ ပေါက်ကွဲမှုကြောင်း နေအိမ်အဆောက်အအုံများ မီးလောင်ပျက်စီးသွားခဲ့သည်ဟု သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments