သျှမ်းတောင်၊ ရပ်စောက်မြို့နယ်၊ ကျောက်ဂူဒေသတွင် စစ်ကောင်စီတပ် စစ်ကြောင်းထိုးရာ ရွာအတွင်းရှိ နေအိမ်များကို ဖောက်ထွင်း ခိုးယူသွားသဖြင့် ယင်းစစ်ကြောင်းအား ဒေသခံများက သူခိုး စစ်ကြောင်းဟု နာမ်စားသုံး ရည်ညွှန်း ပြောဆိုနေကြကြောင်း ဒေသခံများထံ သိရသည်။

တိုက်ပွဲများ ပြင်းထန်ခဲ့သည့် ကျောက်ဂူဒေသတွင် ပြီးခဲ့သည့် ဇန်နဝါရီလ ၁၈ ရက်က စတင်၍ စစ်ကြောင်းထိုးရာ ကျေးရွာ အတွင်း လူနေအိမ်များ၊ ဆိုင်များအား ဖောက်ထွင်းခိုးယူ၍ ကျေက်ဂူဒေသ အခြေစိုက် အမတ (၃၄၉) အမြောက်တပ် အတွင်း သယ်ဆောင်သွားကြောင်း ဒေသခံများက ဆိုသည်။

“စိတ်ကြိုက် မွှေပြီး ခိုးသွားတာ။ မသယ်နိုင်တဲ့ဟာတွေ ဖျက်ဆီးခဲ့တာ။ သူခိုးတွေ၊ အိမ်အများကြီး အဖောက်ခံရတယ်။ တခြားအဖွဲ့တွေ အဲလိုမခိုးဘူး။ သူတို့ပဲ၊ အဲ့ကြောင့် သူခိုးစစ်ကြောင်းလို့ ခေါ်တာ” ဟု ဒေသခံ တဦးက ဆိုသည်။

ပြီးခဲ့သည့် နှစ်ကုန်ပိုင်းကစ၍ ကျောက်ဂူဒေသတွင် စစ်ကောင်စီနှင့် ဓနုတပ် (DPLF) တိုက်ပွဲ ပြင်းထန်ခဲ့ရာက ကျောက်ဂူတိုက်နယ် ဒေသခံများ ထွက်ပြေးနေစဥ◌် ဇန်နဝါရီ ၁၆ ရက်နေ့ စစ်ကောင်စီ လေကြောင်းမှ ဗုံး ၅၆ လုံး ကြဲချ တိုက်ခိုက်ခဲ့ရာ ဒေသခံပြည်သူ ၃ ဦး သေဆုံးပြီး ၁၀ ဦး ဒဏ်ရာရရှိခဲ့သည်။

ယင်းသို့ ဗုံးကြဲချမှုကြောင့် ကျောက်ဂူရွာအတွင်း အိမ်စောင့်ကျန်ခဲ့သူများပါ ထွက်ပြေးခဲ့ရပြီးနောက် စစ်ကောင်စီ စစ်ကြောင်း ဝင်ရောက်ကာ ပြည်သူ နေအိမ်နှင့် ဈေးဆိုင်များအား စိတ်ကြိုက် ဖောက်ထွင်းခိုးယူသွားခြင်းဖြစ်ကြောင်း ဒေသခံများက ဆိုသည်။

“သွားကြည့်တဲ့လူက ပြောတယ်၊ ခိုးသွားတာ တရွာလုံး ဘာမှမကျန်ဘူးတဲ့။ မနက်ဖြန်လောက် ပြန်ကြည့်မလား စဥ်းစားနေတာ၊ ခိုးလို့ဝပြီ ဆိုတော့ ထပ်မလာလောက်တော့ဘူး ထင်တယ်” ဟု ဒေသခံ အမျိုးသမီး တစ်ဦးက ပြောသည်။

ဗုံးကြဲပြီးနောက် ကျောက်ဂူဒေသသို့ စစ်တပ် စစ်ကြောင်း ဝင်ရောက်ခဲ့ရာက ယနေ့အထိ တိုက်ပွဲများ ငြိမ်သက်နေပြီး ရွာအတွင်းမှ သူခိုး စစ်ကြောင်း ပြန်ထွက်သွား သဖြင့် စစ်ဘေးရှောင် ဒေသခံများ နေအိမ်ပြန်ရန် ပြင်ဆင်နေကြကြောင်း သိရသည်။

သျှမ်းတောင်နှင့် သျှမ်းမြောက် ဆက်သွယ်ရာ စစ်ရေးအရ အချက်အခြာကျသည့် ကျေက်ဂူဒေသတွင် သျှမ်းတပ် ၂ ခုဖြစ်သည့် SSPP နှင့်RCSS သာမက ပအိုဝ်းပြည်သူ့စစ် PNO တို့ လှုပ်ရှားနေပြီး လက်ရှိ အသစ်ဖွဲ့စည်းထားသည့် ဓနုတပ် (DPLF) လှုပ်ရှားနေသည်။

နာမည်ကျော် တိုက်ပွဲ ဖြစ်ပွားနေသည့် နောင်ချိုမြို့နယ်၊ တောင်းခမ်းကျေးရွာနှင့် မိုင် ၃၀ ခန့်သာ ကွာဝေးသည့် ကျောက်ဂူဒေသတွင် စစ်ကောင်စီ စစ်ကြောင်းများကို DPLF က ကြားဖြတ် တိုက်ခိုက်နေရာ တိုက်ပွဲများ ပြင်းထန်ခဲ့ပြီး ဒေသခံများ စစ်ဘေးလွတ်ရာ ထွက်ပြေးနေရခြင်း ဖြစ်သည်။