အမျိုးသားညီညွတ်ရေး အစိုးရ NUG မှ စုဆောင်းထားသည့် အသက်မပြည့်သေးသောကလေးစစ်သားများဟု ရေးသား၍ ရုပ်သံဖိုင်တစ်ခုဖြင့် ဖြန့်ချိနေပါသည်။

စစ်ကောင်စီအာပေး တယ်လီဂရမ် ဝါဒဖြန့်ချန်နယ်လ်တစ်ခုဖြစ်သည့် People Media ချန်နယ်လ်မှ “စစ်သွေးကြွ NUG အုပ်စုမှ ကလေးငယ်များကို စစ်သားစုဆောင်းထားမှု မြင်ကွင်း” (မူရင်းအတိုင်း) ဟု ရေးသားကာ ဇန်နဝါရီလ ၁၈ ရက်က ရုပ်သံဖိုင်တစ်ခုဖြင့် ဖြန့်ချိခဲ့သည်။
ထိုဗီဒီယိုဖိုင်ကို ကြည်ရှုသူပေါင်း ၇၅,၀၀၀ ကျော်ရှိသည်။

မူရင်းလင့်ခ် – https://archive.ph/jIN2F

ရွှေနေကြာ – https://archive.ph/Uao8M

Min Chit Oo – https://archive.ph/ehHqj

သတင်းအမှားဖြန့်ချိသူတွေက ဖော်ပြသည့် အကြောင်းအရာကို MFCN အဖွဲ့ဝင် သျှမ်းသံတော်ဆင့်နှင့် Delta News Agency တို့၏ အချက်အလက်စစ်ဆေးသူများက ပူးပေါင်းစစ်ကြည့်သည့်အခါ မှားယွင်းနေကြောင်း တွေ့ရသည်။

သတင်း စစ်ဆေးတွေ့ရှိချက်

ရုပ်သံဖိုင်တွင် ကလေးငယ်တစ်ဦး ပျောက်ကြားဦးထုပ်ဆောင်း၍ Tiktok ဆော့ထားသည်ကို တွေ့ရသည်။

မူရင်း ရုပ်သံဖိုင်ကို ထပ်မံရှာဖွေကြည့်သည့်အခါ ပခုက္ကူခရိုင် ပြည်သူ့ကာကွယ်ရေးတပ် PDF တပ်ရင်း ၃ မှ @charcbeasih အမည်ဖြင့် တပ်သားတစ်ဦး တင်ထားသည်ကိုတွေ့ရသည်။
@charcbeasih – https://archive.ph/dQuyk

ထိုကိစ္စနှင့် ပတ်သက်၍ ပခုက္ကူခရိုင် ပြည်သူ့ကာကွယ်ရေးတပ် PDF တပ်ရင်း ၃ ကို ဆက်သွယ်မေးမြန်းခဲ့ရာ “ကလေးက တပ်ရင်းက မှန်ပါတယ်။ ရဲဘော်တော့ မဟုတ်ပါဘူး။ တော်လှန်ရေးနဲ့ နီးစပ်တဲ့ မိသားစု အသိုင်းအဝိုင်းကပါ။ အသက်မပြည့်တဲ့သူတစ်ယောက်က ရဲဘော်လို ဆော့တဲ့အပေါ် အမြင်မှားစရာတွေ ဖြစ်မလာဖို့၊ Tiktok မဆော့ဖို့ ပြောဆိုတားမြစ်ထားပါတယ်” ဟု ပြောရေးဆိုခွင့်ရှိသူတစ်ဦးက ပြောသည်။

ပြည်သူ့ကာကွယ်ရေးတပ်မတော် ပခုက္ကူခရိုင်တပ်ရင်း ၃ –

ထို့ပြင် အမျိုးသားညီညွတ်ရေး အစိုးရ NUG ၏ ကာကွယ်ရေးဝန်ကြီးဌာနတွင်လည်း တပ်သားသစ် ခေါ်ယူရာ၌ တပ်သားသစ် စုဆောင်းရေး မူဝါဒရှိထားသည်ဖြစ်ရာ အသက် ၁၈ နှစ်ပြည့်ပြီးမှသာလျှင် စစ်မှုထမ်းခွင့် ပြုထားကြောင်း NUG ပြောရေးဆိုခွင့်ရှိသူ ကိုနေဘုန်းလတ်က ပြောသည်။

“ကာကွယ်ရေးဝန်ကြီးဌာနမှာ တပ်သားသစ်စုဆောင်းရေး မူဝါဒဆိုတာရှိတယ်။ အဲ့ထဲမှာ အသက်၁၈နှစ် ပြည့်ပြီးသူဖြစ်ရမယ်။ စစ်မှုထမ်းရန်လုံလောက်တဲ့ကျန်းမာရေးအခြေနေရှိတဲ့သူဖြစ်ရမယ်။ ရာဇဝတ်မှု ကင်းရှင်းသူဖြစ်ရမယ်စသဖြင့် အဲ့အချက်တွေရှိပါတယ်။ ဒီမူဝါဒအရပဲ တပ်သားသစ်တွေစုဆောင်းတယ်”ဟု ကိုနေဘုန်းလတ်က ပြောသည်။

ထိုမူဝါဒအရ တပ်သားသစ် စုဆောင်းသည့်အခါ အတင်းအကျပ် စုဆောင်းခြင်းမဟုတ်ဘဲ ကာယကံရှင်၏ သဘောဆန္ဒအရ စုဆောင်းပြီး၊ အသက် ၁၈ နှစ်အောက် ကလေးများ စုဆောင်းထားခြင်းမရှိသလို တပ်ရင်းတပ်ဖွဲ့တွင်လည်း စုဆောင်းခွင့်မပြုထားကြောင်း ဆိုသည်။

အမျိုးသားညီညွှတ်ရေးအစိုးရ (NUG)၏ ပြည်သူ့ကာကွယ်ရေးတပ်မတော်၏ စစ်ဘက်ဆိုင်ရာ ကျင့်ဝတ်များ အကြောင်းလင့်ခ် – https://www.facebook.com/share/p/1BRvctbZJ8/

“ဒါအကြမ်းဖက်စစ်တပ်ရဲ့လုပ်လေ့လုပ်ထရှိတဲ့အလုပ်ပါပဲ၊ သူတို့ကိုယ်တိုင်လုပ်နေတဲ့အလုပ်တွေကို တခြားသူတွေလုပ်သယောင် နည်းလမ်းပေါင်းစုံနဲ့ဝါဒဖြန့်ပြီးတော့ သတင်းတု၊ သတင်းမှားတွေ ဖြန့်နေတာကတော့ သူတို့အလုပ်ကို သူတို့လုပ်နေတယ်လို့ပဲ ပြောရမှာပေါ့” ဟု ကိုနေဘုန်းလတ်က ဆက်ပြောသည်။

သုံးသပ်ချက်

ထိုကြောင့် အမျိုးသားညီညွတ်ရေး အစိုးရ NUG မှ ကလေးငယ်များကို စစ်သားစုဆောင်းသည်ဆိုသည့် ဖော်ပြချက်က မှားယွင်းနေသည်။

ရုပ်သံဖိုင်တွင် ပါဝင်သည့် ကလေးငယ်တစ်ဦးသည် ပခုက္ကူခရိုင် ပြည်သူ့ကာကွယ်ရေးတပ် PDF တပ်ရင်း ၃ မှ ရဲဘော်တစ်ဦး၏ မှီခိုမိသားစုဝင်တစ်ဦးဖြစ်သည်။

စာဖတ်ပရိတ်သတ်တွေအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းတွေကို ချက်ချင်းမယုံကြည်ဘဲ စိတ်ချရသော သတင်းမီဒီယာများမှာ သွားရောက်ဖတ်ရှု့ကြရန် တိုက်တွန်းပါသည်။

သတင်းတု၊ သတင်းမှားဟု ယူဆရသည့် သတင်းတွေကိုလည်း Myanmar Fact-checking Network Facebook Chat Box မှတစ်ဆင့် သတင်း၏ လင့်ခ် (သို့မဟုတ်) Screenshot ပုံပေးပို့ခြင်းဖြင့် စစ်ဆေးနိုင်ပါသည်။