သျှမ်းပြည်တောင်ပိုင်း၊ ပုံးအင်းဒေသတွင် ရေကြီးပြီးနောက် စပါးမျိုးစေ့ပျောက်ကွယ်သွားပြီး မျိုးစေ့အတွက် အကူအညီ လိုအပ်နေကြောင်း ဒေသခံများထံမှ စုံစမ်းသိရှိရသည်။

ပြီးခဲ့သည့် (၂၀၂၄ ခုနှစ် )ဩဂုတ်လအတွင်း ပုံးအင်းဒေသတွင်း ရေကြီးရေလျှံမှုဖြစ်ခဲ့ပြီး ရွာပေါင်း(၂၅) ရွာပျက်စီးကာ စပါးဧက (၂သောင်း)ကျော် ပျက်စီးဆုံးရှုံးသွားခဲ့သည်။

ထို့ကြောင့် ယနေ့အချိန်ထိ ပုံးအင်းဒေသတွင် မြေနုံးများကို မဆည်ယူနိုင်သေးသဖြင့် လယ်ဧက အတွင်း ရေများကျန်ရှိနေသေးကြောင်း ပုံးအင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်သည် နွေစပါးစိုက်ပျိုးရန် အချိန်ဖြစ်သဖြင့် စပါးမျိုးစေ့များ အကူအညီလိုအပ်နေကြောင်း စိုက်ပျိုးရေးဦးစီး ဌာနကို စာတင်အကြောင်းကြားထားသော်လည်း ယနေ့အထိ အကြောင်းမပြန်လာ သေးကြောင်း ၎င်းအမျိုးသားက ပြောသည်။

“စပါးမျိုးက လုံးဝကို မကျန်ရှိတော့တာ။ အခုက နွေစပါး စိုက်ရတော့မှာဆိုတော့ မျိုးစေ့တွေ လိုတယ်။ စိုက်ပျိုးရေးနဲ့ပဲ အသက်မွေး ရတာဆိုတော့။ ဒေသဦးစီးတို့၊ စိုက်ပျိုးရေးဦးစီး တို့ကို တော့စာတင်ထားတယ်။ သူတို့ အစည်းဝေးထိုင်နေတုန်းမို့ ထင်တယ်။ အကြောင်းမပြန်သေးဘူး။” ဟု၎င်းကဆိုသည်။

ယခင်က စပါးစိုက်ပျိုးလျှင် ဒေသခံများ၏ စားဝတ်နေရေးအပြင် အပိုဝင်ငွေပါရရှိသည်။
သျှမ်းပြည်နယ်တစ်ခုလုံးနီးပါးသည် ပုံးအင်းဒေသစပါးများဖြင့် စားသုံးနေနိုင်ကြောင်း သိရသည်။

ထိုကဲ့သို့ စပါးမျိုးစေ့များ ဆုံးရှုံးကာ စိုက်ပျိုးစရာမကျန်ရှိသောကြောင့် ငါးဖမ်းရင်း အသက်မွေး ဝမ်းကြောင်း ပြုနေရပြီး တပိုင်နိုင်ဖြစ်သည့် ကြက်သွန်ဖြူ နှင့် ဟင်းသီးဟင်းရွက်များကို စိုက်ပျိုးရင်း ဝမ်းရေးဖြေရှင်းနေရသည်ဟု အသက် (၄၀) အရွယ် ဒေသခံ အမျိုးသားတစ်ဦးက ပြောသည်။

“ကျန်တဲ့ ကြက်သွန်ဖြူတို့ကိုပဲ နဲနဲစိုက်ထားတယ်။မျိုးမတုံးအောင်ပေါ့လေ။ စပါးလည်း စိုက်မရတော့ ငါးပဲ ရှာပြီး ရောင်းစားနေရတာပေါ့။ ငါးတွေလည်း မျိုးတုံးကုန်ပြီ။ဈေးပေါတဲ့ ဆလားဗီးယားငါးပဲ ကျန်တော့တာ။တခြားမျိုးစိတ်ဆို ရှာမရတော့ဘူး။ ရေထဲမြုပ်တဲ့ ပျက်နေတဲ့ စပါးကို နေလှန်းပြီး ပဲ ပြန်စားရတာပေါ့။ မတတ်နိုင်ဘူး။ရွှံ့စော်လဲ နံတယ်၊ ဒါနဲ့ပဲ အသက်ရှင်ရတယ်။” ဟု ၎င်း အသက် (၄၀) အရွယ် အမျိုးသားတစ်ဦးက ပြောသည်။

ထိုကဲ့သို့ ရေကြီးမှုကြောင့် စားဝတ်နေရေးခက်ခဲမှုကြုံတွေနေရပြီး၊ အလုပ်အကိုင်အခွင့်အလမ်းရှားပါးမှုကြောင့် နေရပ်စွန့်ခွာပြီး နိုင်ငံခြားထွက်သွားသည့် ပြည်သူများလည်းရှိကြောင်း ၎င်းအမျိုးသားက ထပ်လောင်းပြောသည်။

ထို့အပြင် စပါးစိုက်ပျိုးရာတွင် နောက်ထပ်ရေကြီးရေလျှံမှုကြောင့် စပါးဧကများ ဆုံးရှုံးသွားမည်ကို စိုးရိမ်နေပြီး ယခင်နှစ်ကဲ့သို့ သဘာဝဘေး မကျရောက်ဖို့ မျှော်လင့်နေသည်ဟု အသက် (၃၀)ကျော်အရွယ် ဒေသခံ အမျိုးသမီးတစ်ဦးက ဆိုသည်။

ပုံးအင်းဒေသသည် ဆန်စပါးအများဆုံးထွက်ရှိရာဒေသဖြစ်ပြီး ဒေသခံအများစုသည် စိုက်ပျိုးရေးဖြင့် အသက်မွေးဝမ်းကြောင်း ပြုကာနေထိုင်ကြသည်။

အလုပ်သင် သတင်းထောက် နန်းလရောင် ရေးသားသည်။