သျှမ်းပြည် မိုးဗြဲမြို့တွင် စစ်ကောင်စီနှင့် ကရင်တော်လှန်ရေးတပ် KNDF ၊ PDF ပူးပေါင်းတပ်ဖွဲ့တို့ကြား တိုက်ပွဲဆက်လက်ပြင်းထန်နေကြောင်း စုံစမ်းသိရသည်။

မိုးဗြဲမြို့တွင် စစ်ကောင်စီနှင့် တော်လှန်ရေးတပ် KNDF ၊ PDF ပူးပေါင်းတပ်ဖွဲ့တို့ မြို့မြောက်ဘက်အစပ်ရှိ စစ်ကေင်စီတပ် အမှတ် ၄၂၂ ခြေမြန်တပ်ရင်းတွင် တိုက်ပွဲများ ဆက်တိုက်ဖြစ်ပွားနေပြီး စစ်ကောင်စီတပ်သည် လေယာဉ်ဖြင့် နေ့စဉ်ဗုံးကြဲချနေကြောင်း စစ်ရေးသတင်းအရင်းအမြစ်က သျှမ်းသံတော်ဆင့်ကို ပြောသည်။

အဆိုပါတိုက်ပွဲတွင် စစ်ကောင်စီနှင့် တော်လှန်ရေးတပ်သား (PDF)တို့ တိုက်ပွဲဖြစ်ပွားခြင်းသည် (၂)လနီးပါး ရှိနေကြောင်း ၎င်းက ဆက်ပြောသည်။

“မြို့တွင်းဖြစ်တာမဟုတ်ဘူး။ မြို့ရဲ့ မြောက်ဖက်အစပ် စစ်တပ် အမှတ် ၄၂၂ ခြေမန်တပ်ရင်းမှာ တိုက်ပွဲတွေ ဆက်လက်ပြင်းထန်နေတယ်။ စစ်တပ်က နေ့တိုင်းဗုံးကြဲတယ် တခါကြဲရင် ၃လုံး ၄ လုံးကြဲချတယ်။ ဒီတစ်မနက်က လက်နက်တွေပစ်တာတော့ မြို့ထဲကျတယ် အခုထိပစ်တုန်းပဲ။ ဒီတခါတိုက်ပွဲက ( ၂) လ နီးပါးလောက်တော့ ရှိနေပြီ”ဟု ၎င်းက ပြောသည်။

မိုးဗြဲမြို့၊လွိုင်ကော်နှင့် ဖယ်ခုံမြို့ကို စစ်ကောင်စီမှ ပြန်လည်ထိန်းချုပ်နိုင်ရန် အပြင်းအထန် စစ်ကြောင်းထိုးနေပြီး။ စစ်ရှောင်စခန်းများကို ဦးတည်ပြီး မကြာခဏဗုံးကြဲတိုက်ခိုက်မှုကြောင့် စစ်ရှောင်အများအပြား သေဆုံးခဲ့ ရကြောင်း စစ်ရှောင်ဒေသခံတစ်ဦးက ပြောသည်။

စစ်ကောင်စီသည် မကြာခဏစစ်ရှောင်စခန်းကို ဗုံးကြဲတိုက်ခိုက်နေသော်လည်း ပြည်သူများသည် အခြားသောနေရာတွင် သွားရောက်ရှောင်နိုင်ရန် နေရာမရှိတော့ကြောင်း ၎င်းက ဆက်ပြောသည်။

“တိုက်ပွဲတော့ သူတို့ ပင်လောင်းဘက်ကနေ စဖောက်ဝင်ကတည်းကပေါ့၊ စစ်ရှောင်တွေလည်း ထပ်မံရှောင်စရာနေရာလည်း မရှိတော့ဘူး။ ရှောင်ရင်လည်း လိုအပ်ချက်တွေ အများကြီးရှိနေတာမို့ ဒီတိုင်းပဲ ဆက်နေနေရတယ်။ စစ်တပ်က စစ်ရှောင်စခန်းကို ဦးတည်ပြီးပစ်တော့ သေဆုံးနှုန်းလည်း တော်တော်များလာတယ်”ဟု ၎င်းက ပြောသည်။

ပြီးခဲ့သည့် (ဒီဇင်ဘာလ ၇)၊နှင့် (ဒီဇင်ဘာ ၈ ) ရက်တွင် မိုးဗြဲမြို့နှင့်ပတ်ဝန်းကျင် အနီးတစ်ဝိုက်ကို ဒရုန်းဖြင့် ဗုံးကြဲတိုက်ခိုက်ရာတွင် S – PHOS (အက်စ်ဖော့စ်) တံဆိပ်ပါ ၅၆၀ အဆိပ်ငွေ့ပြားများကို ထည့်သွင်းအသုံးပြုခဲ့ကြောင်း သိရသည်။

စစ်ကောင်စီတပ်မှ ဖယ်ခုံ၊ လွိုင်ကော်နှင့် မိုးဗြဲဘက်သို့ စစ်အင်အား အလုံးအရင်းဖြင့် တိုးချဲ့အင်အားဖြည့်တင်းပြီးနောက် ကရင်နီတော်လှန်ရေးတပ်ပေါင်းစုတို့နှင့် လက်ရှိ တိုက်ပွဲ ဆက်လက်ပြင်းထန်နေကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။