သျှမ်းပြည် မူဆယ်မြို့တွင် စစ်ကောင်စီလက်အောက်ခံ မန်ပြိန်းပြည်သူ့စစ်အဖွဲ့ဝင် အချင်းချင်း မူးယစ်ဆေးသုံးစွဲကာ သေနတ်ပစ်ခတ်မှု ဖြစ်ပွားခဲ့ပြီး သေဆုံးသူ၏ ရုပ်အလောင်းကို မီးရှို့ဖျက်ဆီးခဲ့ကြောင်း စုံစမ်းသိရသည်။
ဇန်နဝါရီလ (၁၉) ရက် ညပိုင်းတွင် မူဆယ်မြို့ တော်ရွက်ရပ်ကွက် ဧက (၄၀) ဘက်တွင် စစ်ကောင်စီလက်အောက်ခံ မန်ပြိန်းပြည်သူ့စစ်အဖွဲ့ဝင်များ မူးယစ်ဆေးဝါးနှင့် အရက်သောက်သုံးပြီးနောက် အချင်းချင်း လိုက်လံပစ်ခတ်ခဲ့ရာ ပြည်သူ့စစ်တစ်ဦး သေဆုံးသွားပြီး ၎င်းရုပ်အလောင်းကို မီးရှို့ဖျက်ဆီးခဲ့ကြောင်း ဒေသခံများက ပြောသည်။
“မန်ပိန်းပြည်သူ့စစ်အချင်းချင်း ပစ်သတ်ကြတာ။ K သုံးတာ များသွားလို့ အချင်းချင်း သေနတ်ပြန်ပစ်ကြတယ်။ လူ ၃ ယောက် အရက်မူးပြီးတော့ ၂ ယောက်က နောက်တစ်ယောက်ကို သေနတ်လိုက်ပစ်တာလို့ ပြောတယ်၊ ပြီးတော့ အလောင်းကို မီးရှို့တာ။ တော်ရွက်ရပ်ကွက်မှာ ဖြစ်သွားတာ၊ လူလည်း ဖမ်းမိတယ်”ဟု မူဆယ်ဒေသခံ အသက်(၄၀) ကျော်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ပြည်သူ့စစ်တပ်ဖွဲ့ဝင်အချင်းချင်း သေနတ်ပစ်ခတ်၍ သေဆုံးသူကို မီးရှို့အလောင်းဖျက်ရန် ကျူးလွန်ခဲ့သူများကို စစ်ကောင်စီတပ်မှ ဖမ်းဆီးရမိထားကြောင်း သိရပြီး မည်ကဲ့သို့ ဆက်လက်အရေးယူ ဆောင်ရွက်နေသည်ကို မသိရကြောင်း ၎င်းဒေသခံ အမျိုးသားက ဆက်ပြောသည်။
မြန်မာ-တရုတ် နယ်စပ်ဒေသဖြစ်သည့် မူဆယ်မြို့တွင် စစ်ကောင်စီလက်အောက်ခံ ပြည်သူ့စစ်အဖွဲ့ပေါင်း (၂၀) ကျော်ထက်မနည်း ရှိနေပြီး တရားဥပဒေစိုးမိုးမှု ကင်းမဲ့ကာ တရားမဝင် စီးပွားရေးနှင့် မူးယစ်ဆေးဝါးများ စုံလင်ပေါများခြင်းကြောင့် သေနတ်ပစ်ခတ်မှုများ မကြာခဏ ဖြစ်ပွားနေကြောင်း ဒေသခံများက ပြောသည်။
ထို့အတူ မူဆယ်မြို့နယ်တွင် လက်နက်ကိုင်တပ်ဖွဲ့များ ပေါများနေသော်လည်း ပြည်သူများ လုံခြုံရေး ကင်းမဲ့နေခြင်းကြောင့် ဒေသခံများ စိုးရိမ်ထိတ်လန့်နေရကြောင်း သိရသည်။
လက်ရှိတွင် မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များမှာ ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိသည်။
Leave a Comments