သျှမ်းပြည်တောင်ပိုင်း၊ ဆီဆိုင်မြို့နယ်တွင် တိုက်ပွဲ အခြေနေများကြောင့် ဒေသခံများ ထပ်မံစစ်ဘေးရှောင်ရန် ပြင်ဆင်နေကြောင်း ဒေသခံများထံမှ စုံစမ်းသိရှိရသည်။

ဆီဆိုင်မြို့နယ် ထီဆုံကျေးရွာဖက်တွင် စစ်ကောင်စီ၊ ပအိုဝ်းပြည်သူ့စစ်(PNO)နှင့် တော်လှန်ရေးအင်အားစုတို့ နေ့စဉ်နီးပါး တိုက်ပွဲဖြစ်နေပြီး ကျေးရွာဖက်ကို စစ်ကောင်စီက လက်နက်ကြီးများဖြင့် ပစ်ခတ်နေသည်ဟု ဒေသခံ တစ်ဦးက ပြောသည်။

ယမန်နှစ်(၂၀၂၄ ခုနှစ် ဇန်နဝါရီလ ၂၄ ရက်)နေ့တွင် ဆီဆိုင်မြို့နှင့် ကျေးရွာများတွင် စစ်ကောင်စီ၊ PNOနှင့် ပအိုဝ်းအမျိုးသား လွတ်မြောက်ရေးတပ်မတော် (PNLA) တို့ တိုက်ပွဲဖြစ်ပွားခဲ့ပြီး ယခုနှစ် (ဇန်နဝါရီလ ၂၄ ရက်) နေ့ဆိုလျှင် တစ်နှစ်ပြည့်တော့မည် ဖြစ်ပြီး တိုက်ပွဲများ ဖြစ်လာနိုင်မည့် အခြေအနေရှိသည်ဟု ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“ဒီလ (၂၄ )ရက်ဆို တိုက်ပွဲက တစ်နှစ်ပြည့်တော့မှာ။ အခုထိ လက်နက်သံတွေ ကြားနေရတုန်းပဲ။ထီဆုံဘက်ဆို နေ့တိုင်း တိုက်ပွဲဖြစ်တယ်။ စစ်ထပ်ဖြစ်လာနိုင်တဲ့ အခြေအနေဆိုတော့ ရှောင်ဖို့တွေပါ ပြင်နေရတယ်။ အရင်က စစ်ရှောင်တာ နလန်မထူသေးဘူး။ခု ထပ်ရှောင်ဖို့ ပြင်နေရပြီ။” ဟု အဆိုပါ အမျိုးသမီးက ပြောသည်။

ထို့အပြင် တိုက်ပွဲဖြစ်ပွားပြီး ယနေ့ချိန်ထိ နေရပ် မပြန်နိုင်သေးသည့် စစ်ရှောင်များလည်း ရှိသေးကြောင်းနှင့် ဆီဆိုင်မြို့တွင်းသို့ လူဦးရေ သုံးပုံ နှစ်ပုံမျှသာ ပြန်လာကြကြောင်း ၎င်း အမျိုးသမီးတစ်ဦးက ထပ်လောင်းပြောသည်။

စစ်ရှောင်ရန်ပြင်ဆင်နေသော်လည်း သခိုးရန်ကိုလည်း ကြောက်နေရကြောင်းနှင့် စုဆောင်းထားသမျှ သခိုးလက်ထဲ ပါသွားမည် စိုးရိမ်ကြောင်း ဆီဆိုင် နေရပ်ပြန်စစ်ရှောင်တစ်ဦးက ပြောသည်။

“စစ်ရှောင်ဖို့ အထုတ်တွေ ကြိုပြင်ထားရတယ်။ ပြေးမယ်ဟေ့ဆိုရင် အရင်တစ်ခေါက်တုန်းကလို ဘာမှ မပါပဲ မပြေးရလေအောင် ပြင်ဆင်ထားရတယ်။ သခိုးရန်ကလည်း ကြောက်ရသေးတယ်။အရင်တစ်ခေါက်ကဆိုရင် ဘာမှ ရစရာမကျန်ဘူး။သခိုးတွေ ဝင်မွှေထားတာ။ အကုန်လုံး အသစ်ကနေ ပြန်စရတယ်။ လွယ်တော့ မလွယ်ဘူးပေါ့။” ဟု အဆိုပါ နေရပ်ပြန်စစ်ရှောင်တစ်ဦးက ပြောသည်။

ထို့အပြင် သူခိုးများသည် ပေါ်ပေါ်ထင်ထင် ခိုးမှုတွေ လုပ်ဆောင်နေပြီး ဒေသခံများမှ ရဲတိုင်လျှင်လည်း အရေးယူပေးမှုမရှိဘဲ ပြန်လွှတ်ပေးနေသောကြောင့် ၎င်းတို့သည် ပို၍ အတင့်ရဲနေကြောင်း ၎င်း စစ်ရှောင်တစ်ဦးက ဆိုသည်။

ယခုလက်ရှိ ဆီဆိုင်တွင် လက်နက်ကြီး၊ လက်နက်ငယ်အသံများ နေ့စဉ်ကြားလာနေရပြီး စစ်ကောင်စီနှင့် PNO က်မှလည်း နေ့စဉ် အဝင်အထွက် တင်းကျပ်စစ်ဆေးမှုတွေ လုပ်ဆောင်လာနေသည်ဟု သိရှိရသည်။

ဆီဆိုင်မြို့သည် ယခင် (၂၀၂၄ ခုနှစ် ဇန်နဝါရီလ ၂၄ ရက်) တိုက်ပွဲကြောင့် နေအိမ်နှင့် ဈေး အဆောက်အုံများ မီးလောင်ပျက်စီးခဲ့ပြီး ယနေ့အချိန်ထိအားလုံးနီးပါး ပြန်လည်ပြုပြင်နိုင်ခြင်း မရှိသေးပေ။

အလုပ်သင် သတင်းထောက် နန်းလရောင် ရေးသားသည်။