သျှမ်းပြည် တန့်ယန်းမြို့အတွင်း UWSA ‘ဝ’ တပ်သားတို့သည် စစ်ဝတ်စုံနှင့်လက်နက် အပြည်အစုံဖြင့် ပေါ်ပေါ်ထင်ထင် သွားလာလှုပ်ရှားနေကြောင်း စုံစမ်းသိရသည်။

တန့်ယန်းမြို့နယ်အတွင်းကို ‘ဝ’တပ်ဖွဲ့ UWSA က ပြီးခဲ့သည့် ၂၀၂၄ ခုနှစ် ဇူလိုင်လတွင် ဝင်ရောက် ထိန်းချုပ်ခဲ့ သည်။

ထိုသို့ ဝင်ရောက် ထိန်းချုပ်ပြီးနောက် လက်ရှိ တန်းယန်းမြို့အတွင်း၌ ‘ဝ’ တပ်သားများသည် စစ်ဝတ်စုံ၊ လက်နက် အပြည်အစုံတပ်ဆင်ကား ပေါ်ပေါ်ထင်ထင်သွားလာလှုပ်ရှားနေကြောင်း တန့်ယန်းမြို့အသက်၄၀ ဝန်းကျင် ဒေသခံတစ်ဉီးက သျှမ်းသံတော်ဆင့်ကိုပြောသည်။

“မြို့ထဲမှာတော့ “ဝ” စစ်သားတွေက ဝတ်စုံအပြည့်အစုံလက်နက်အပြည့်အစုံနဲ့ သွားသွားလာလာလုပ်နေတာ ဈေးထဲ ရပ်ကွက်ထဲမှာ မကျန်ပေါ့နေ့တိုင်းလိုလို မြင်နေရတယ်။ အရင်ကထက် ပိုရဲလာတယ်။ မြို့ထဲသွား လာနေတာ။”ဟု တန့်ယန်းမြို့ ဒေသခံအသက် ၄၀ ဝန်းကျင် အမျိုးသားတစ်ဦးက ပြောသည်။

‘ဝ’ တပ်သားများ ထိုသို့သွားလာလှုပ်ရှားခြင်းသည် အချို့သောပြည်သူများအတွက် အထူးဆန်းကဲ့သို့ ဖြစ်နေပြီး၊ အချို့သော ဒေသခံများအတွက်လည်း စိုးရိမ်းမှုများဖြစ်စေကြောင်း အသက် ၄၅နှစ်အရွယ်ရှိ အမျိုးသားတစ်ဉီးက ဆိုပြန်သည်။

“တချို့ ပြည်သူတွေ့အတွက်ကလည်း အထူးဆန်းတွေဖြစ်တာပေါ့။တချို့အတွက်ကလည်း လက်နက် အပြည်အစုံနဲ့ သွားတာဆိုတော့ ဘယ်ဖက်ကို တက်သွားမလဲမသိဘူး ဆိုပြီးစိုးရိမ် မိတာရှိတယ်။မြို့ထဲမှာ သွားလာလုပ်နေတာမျိုးကတော့ မြင်နေရပါတယ်။သူတို့က သူတို့ရဲ့ တာဝန်ပေါ့ ဖြစ်သလိုဝတ်လို့မရဘူး အပြည်စုံဝတ်ပြီးသွားလာရတာလို့တော့ သိရတယ်။”ဟု ၎င်းပြောသည်။

တန့်ယန်းမြို့နယ်တွင် ‘ဝ’ပြည်သွေးစည်းညီညွတ်ရေးတပ်မတော် UWSA တို့က ဝင်ရောက်ထိန်းချုပ် ပေးနေပြီး၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် ( SSPP/SSA) တို့ လည်း သွားလာလှုပ်ရှားနေသည့် ဒေသတစ် ခုလည်းဖြစ်သည်။

လက်ရှိအချိန်ထိ တန်းယန်းမြို့သို့ တင်သွင်းမည့် ကုန်ပစ္စည်များ၊အိမ်ဆောက်ပစ္စည်း၊စက်သုံးဆီများကို စစ်ကောင်စီ၏ နယ်မြေဗျူဟာမှူး ထောက်ခံစာ အထောက်အထားများ ယူရပြီး ကုန်ဈေးနှုန်းများအပြင် စက်သုံးဆီများလည်း ဈေးဆက်လက်မြှင့်တက်နေကြောင်း ဒေသခံများက ပြောသည်။

စစ်အာဏာသိမ်းပြီး သျှမ်းပြည်မြောက်ပိုင်းတွင် “၁၀၂၇စစ်ဆင်ရေး” ဖြစ်ပွားပြီးနောက် သျှမ်းမြောက်တကြော ကုန်စည်စီးဆင်းမှုပြတ်တောက်ပြီး၊ ကုန်စျေးနှုန်းများအဆမတန်မြင့်မားလာသကဲ့သို့ မြန်မာငွေစျေးနှုန်းလည်း တရိပ်ရိပ်ကျဆင်းလာခဲ့သည်။