မြန်မာငွေတန်းဖိုးဆက်တိုက်ကျဆင်းလာမှုကြောင့် သျှမ်းပြည် တန့်ယန်းမြို့ရှိ စီးပွားရေးလုပ်ငန်းရှင်နှင့် စျေးဆိုင်အချို့ တရုတ်ယွမ်းငွေများ စတင် သုံးစွဲလာကြောင်း သတင်းရရှိသည်။

ပြီးခဲ့သည့် ၂၀၂၄ နှစ် မြန်မာငွေဈေးနှုန်းများ ဆက်တိုက် ကျပြီးနောက်ကားရောင်းဝယ်သူများ နှင့် မြေကွက်များသည် တရုတ်ယွမ်ငွေများဖြင့်သာ ပေးချေကြောင်း၊ တရုတ်ယွမ်ငွေ လဲလှယ်သည့် ဆိုင်များလည်း ပို၍ပေါများလာကြောင်း တန့်ယန်းမြို့ ဒေသခံအမျိုးသားတစ်ဦးက သျှမ်းသံတော်ဆင့် ကို ပြောသည်။

“ကားတွေ နဲ့ မြေကွက်တွေတောင် ယွမ်ငွေတွေ နဲ့ ဈေးဖြတ်ပြီး သုံးလာတယ်။ကုန်စုံဆိုင်တွေမှာတရုတ်ငွေတွေ သိပ်တော့မသုံးသေးဘူးပေါ့။ဒါမဲ့ သုံးရင်တော့ ယူကြတယ်” ဟု တန့်ယန်းမြို့ ဒေသခံအမျိုးသားတစ်ဉီးက ဆိုသည်။

လက်ရှိ မြန်မာ-တရုတ်ငွေလဲလှယ်သူများသည် စျေးထဲရှိ မုန့်ဆိုင်များ၊ ဆေးဆိုင်များတွင်လည်း လဲလှယ်ပေးကြောင်း သိရသည်။

“အရင်က တန့်ယန်းမြို့မှာက မြန်မာငွေပဲသုံးလာတာ။ ဒီနိုင်ငံရေး စစ်ရေး “1027” စစ်ဆင်ရေးပြီးနောက် တရုတ်ယွမ်ငွေသုံးလာတာပါပဲ” ဟု ၎င်းကဆိုသည်။

စစ်အာဏာသိမ်းပြီး သျှမ်းပြည်မြောက်ပိုင်းတွင် “၁၀၂၇စစ်ဆင်ရေး” ဖြစ်ပွားပြီးနောက် သျှမ်းမြောက်တကြော ကုန်စည်စီးဆင်းမှုပြတ်တောက်ပြီး၊ ကုန်စျေးနှုန်းများအဆမတန်မြင့်မားလာသကဲ့သို့ မြန်မာငွေစျေးနှုန်းလည်း တရိပ်ရိပ်ကျဆင်းလာခဲ့သည်။

ထို့နောက် ငွေစျေးတည်ငြိမ်သည့် တရုတ်ယွမ်ငွေကို အသုံးပြုရန် အားသန်လာကြခြင်းဖြစ်ကြောင်းလည်း တန့်ယန်းဒေသခံများက မှတ်ချက်ပြုသည်။

ပြီးခဲ့သည့် ၂၀၂၄ ခုနစ်တ ဇူလိုင်လ စပြီး တန့်ယန်းမြို့နယ်တွင် ‘ဝ’ပြည်သွေးစည်းညီညွတ်ရေးတပ်မတော် UWSA တို့က ဝင်ရောက်ထိန်းချုပ်ပေးခဲ့ပြီး၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် ( SSPP/SSA) တို့ လည်း သွားလာလှုပ်ရှားနေသည့် ဒေသတစ်ခုလည်းဖြစ်သည်။